US plane with second batch of 119 deported Indians lands in Amritsar
Indian deportees : అగ్ర రాజ్యం అమెరికా నుంచి అక్రమ వలసదారులను వెనక్కి పంపించే ప్రక్రియ కొనసాగుతోనే ఉంది. ఇప్పటికే ఒక బ్యాచ్ భారత్ పంపేసిన ట్రంప్ ప్రభుత్వం రెండో బ్యాచ్ కూడా వెనక్కి పంపింది.
అక్రమంగా నివసిస్తున్న 119 మంది భారతీయులతో ప్రయాణిస్తున్న అమెరికన్ విమానం C-17 గ్లోబ్ మాస్టర్ శనివారం రాత్రి 11:40 గంటలకు అమృత్‌సర్ విమానాశ్రయంలో ల్యాండ్ అయింది. వెనక్కి పంపిన వారి బంధువులను కలుసుకునేందుకు వారి కుటుంబ సభ్యులు కూడా అమృత్‌సర్ విమానాశ్రయం వెలుపల చేరుకున్నారు.
Read Also : Russian Beer : బీర్ బాటిల్ మీద గాంధీ తాత ఫొటో.. కంపెనీని లెఫ్ట్ అండ్ రైట్ వాయిస్తున్న నెటిజన్లు..!
అధ్యక్షుడు ట్రంప్ ప్రమాణ స్వీకారం చేసిన తర్వాత 100 మందికి పైగా భారతీయులను అమెరికా నుండి వెనక్కి పంపడం ఇది రెండోసారి. వెనక్కి పంపిన ఈ 119 మందిలో 100 మంది పంజాబ్, హర్యానాకు చెందినవారు. వీరిలో పంజాబ్ నుంచి 67 మంది, హర్యానా నుంచి 33 మంది, గుజరాత్ నుంచి 8 మంది, ఉత్తరప్రదేశ్ నుంచి ముగ్గురు, గోవా, మహారాష్ట్ర, రాజస్థాన్ నుంచి ఇద్దరు చొప్పున, హిమాచల్ ప్రదేశ్, జమ్మూ కాశ్మీర్ నుంచి ఒక్కొక్కరు ఉన్నారు.
రెండో బ్యాచ్‌లో ఉన్నది వీరే :
ఏజెన్సీ నివేదిక ప్రకారం.. అక్రమ వలసదారుల ఈ రెండో బ్యాచ్‌లో నలుగురు మహిళలు, ఇద్దరు మైనర్లు ఉన్నారు. వీరిలో 6 ఏళ్ల బాలిక కూడా ఉంది. వెనక్కి వచ్చిన వారిలో ఎక్కువ మంది 18 ఏళ్ల నుంచి 30 ఏళ్ల మధ్య వయస్సు గలవారు ఉన్నారు. ఇంతలో, వెనక్కి పంపిన భారతీయులను తీసుకెళ్తున్న మూడో విమానం ఆదివారం భారత్‌కు చేరుకుంటుందని వార్తలు వస్తున్నాయి. ఈ విమానంలో 157 మంది భారతీయులు ఉంటారని సంబంధిత వర్గాలు తెలిపాయి.
అంతకుముందు, ఫిబ్రవరి 5న, ట్రంప్ ప్రమాణ స్వీకారోత్సవం జరిగిన కొద్ది రోజుల తర్వాత, 104 మంది అక్రమ వలసదారులతో ఒక అమెరికన్ సైనిక విమానం అమృత్‌సర్ చేరుకుంది. ఈ 104 మందిలో అనేక రాష్ట్రాల వాళ్లు ఉన్నారు. వీరికి చేతులకు సంకెళ్లు, కాళ్లకు సంకెళ్లు వేసి తీసుకువచ్చారు. దీనిపై దేశవ్యాప్తంగా విస్తృతంగా విమర్శలు వచ్చాయి. విమానాశ్రయంలో ఈ వ్యక్తుల రికార్డులను చెక్ చేసిన తర్వాత, వారిని వారి వారి ఇళ్లకు పంపించారు.
ప్రతిపక్షాల విమర్శల మధ్య, విదేశాంగ మంత్రి జైశంకర్ స్పందిస్తూ.. ఈ విషయంపై మేం అమెరికా అధికారులతో మాట్లాడుతున్నామని చెప్పారు. అమెరికా అక్రమ వలసదారులను వెనక్కి పంపే ఈ ఆచారం కొత్తది కాదని అన్నారు. సంవత్సరాలుగా కొనసాగుతోందని ఆయన అన్నారు.
అమెరికా పర్యటనలో ఉన్న ప్రధాని మోదీ కూడా ఈ విషయంలో తన వైఖరిని స్పష్టం చేశారు. ధృవీకరించిన భారతీయుడు ఎవరైనా అమెరికాలో పత్రాలు లేకుండా నివసిస్తుంటే.. భారత్ వారిని వెనక్కి రప్పించేందుకు సిద్ధంగా ఉందని అన్నారు.
అమృత్‌సర్‌లో విమానం ల్యాండ్.. సీఎం మాన్ అభ్యంతరం :
అమెరికా నుంచి వెనక్కి పంపుతున్న భారతీయుల రెండవ విమానాన్ని అమృత్‌సర్‌లో ల్యాండ్ అయ్యేందుకు అనుమతించడంపై పంజాబ్ ముఖ్యమంత్రి మాన్ కూడా అభ్యంతరం వ్యక్తం చేశారు. అమెరికా నుంచి వస్తున్న విమానాలను పంజాబ్‌లో పదే పదే ల్యాండ్ చేయడం ద్వారా కేంద్ర ప్రభుత్వం రాష్ట్రాన్ని అప్రతిష్టపాలు చేయడానికి కుట్ర పన్నుతోందని మాన్ విమర్శించారు.
