Israel Palestine Conflict: హమాస్ తీవ్రవాద సంస్థ దాడి అనంతరం.. గాజా పట్టీపై ఇజ్రాయెల్ గత 9 రోజులుగా (అక్టోబర్ 7 నుంచి) తీవ్రంగా దాడి చేస్తోంది. ఇజ్రాయెల్ ప్రధాన మంత్రి బెంజమిన్ నెతన్యాహు యుద్ధ ప్రకటన చేసినప్పటి నుంచి నీరు, భూమి, గాలి.. ఇలా అన్ని రకాలుగా గాజా పట్టీపై ఇజ్రాయెల్ రక్షణ దళాలు భీకర దాడులను కొనసాగిస్తున్నారు. ఇప్పటికే వేలాది క్షిపణులను ప్రయోగించారు. గాజా పట్టీను పూర్తిగా స్వాధీనం చేసుకుంటామని నెతన్యాహు ప్రకటించారు. 9 రోజులు గడుస్తున్నా యుద్ధం మాత్రం ముగియడం లేదు. ఈ నేపథ్యంలో అసలు గాజా పట్టీని ఇజ్రాయెల్ నిజానంగానే ఆక్రమించుకుందా, అది సాధ్యమేనా అనే ప్రశ్నలు వస్తున్నాయి.
గాజా పట్టి చిన్న ప్రాంతమే అయినప్పటికీ, ప్రపంచంలోని అత్యంత అత్యాధునిక ఆయుధాలను కలిగి ఉన్న ఇజ్రాయెల్ దళాలకు దానిని స్వాధీనం చేసుకోవడం అంత సులభం కాదు. దీనికి కారణం కేవలం 6 కిలోమీటర్ల వెడల్పు, దాదాపు 45 కిలోమీటర్ల పొడవు ఉన్న ఈ చిన్న ప్రాంతంలో హమాస్ అడుగడుగునా మృత్యువు ఉచ్చు బిగించడమే. నివేదికల ప్రకారం.. గాజాలో 11 లక్షల మంది పాలస్తీనియన్లు నివసిస్తున్నారు. వీరిలో 30 వేల మంది హమాస్ యోధులు ఉన్నారు. వీరు చనిపోవడానికి సిద్ధంగా ఉన్నారు. మరోవైపు, ఇజ్రాయెల్ సోమవారం నుంచి తన మూడు లక్షల రిజర్వ్ సైనికులను సైన్యంలోకి దింపి గాజాపై తుది దాడికి ప్లాన్ చేసింది.
ఇది కూడా చదవండి: China On Israel Gaza Attack: ఇజ్రాయెల్-హమాస్ యుద్ధంపై అమెరికా ప్రకటన అనంతరం చైనా భారీ హెచ్చరిక
ఇద్దరి మధ్య దళాల సంఖ్యలో భారీ వ్యత్యాసం ఖచ్చితంగా ఇజ్రాయెల్‌కు అనుకూలంగానే ఉన్నప్పటికీ.. గాజాపై ఈ దాడి తర్వాత, ఇజ్రాయెల్‌పై ప్రపంచవ్యాప్తంగా ఒత్తిడి పెరుగుతుంది. ఇది కాకుండా, ఇజ్రాయెల్‌పైకి ప్రవేశించి దాడి చేసిన హమాస్‌కు ఇజ్రాయెల్ రక్షణ దళాల బలం గురించి బాగా తెలుసు. ప్రతీకార దాడిని వారు ఊహించే ఉంటారు. అందుకోసం ముందస్తుగా రెస్క్యూకు సన్నాహాలు చేశారు. గాజా స్ట్రిప్ అంతటా వ్యాపించిన సొరంగాల నెట్‌వర్క్ ఉంది. ఇందులో ఇజ్రాయెల్ బాంబు దాడి నుంచి తప్పించుకోవడానికి హమాస్ యోధులు దాక్కున్నారు. మరోవైపు, ఇజ్రాయెల్ సైన్యం ట్యాంకులు, ఇతర వాహనాలతో గాజాలోకి ప్రవేశిస్తే, హమాస్ ఫైటర్లు ఈ సొరంగాల నుంచి దాడి చేస్తారు. లోపలికి ప్రవేశించి వారిని చంపడం పెద్ద సవాలే అంటున్నారు.
ఈ సొరంగాలు 70 మీటర్ల లోతు వరకు ఉన్నట్లు తెలుస్తోంది. ఇది కాకుండా, గాజా మొత్తం ప్రాంతం అత్యంత జనసాంద్రత కలిగిన ప్రాంతం. ఇందులో పెద్ద సంఖ్యలో పౌరులు ఉన్నారు. వారి మధ్య హమాస్ యోధులు దాక్కుని ఇజ్రాయెల్ దళాలపై ఆకస్మిక దాడులు చేసేందుకు అది మరింత అనుకూలం. ఇక్కడ నివసిస్తున్న ప్రజలను గాజాను విడిచిపెట్టమని ఇజ్రాయెల్ కోరినప్పటికీ, ఇంత పెద్ద సంఖ్యలో ప్రజలు ఇతర దేశాలకు వలస వెల్లడం అంత సులభం కాదు. ఇంతలో, ఇజ్రాయెల్ సైన్యం గాజా పట్టీలోకి ప్రవేశించి హమాస్ యోధులపై నేరుగా దాడి చేస్తే, అది భారీ నష్టాన్ని కలిగిస్తుంది. ప్రపంచం నలుమూలల నుంచి భారీ ఒత్తిడిని ఎదుర్కోవలసి ఉంటుంది.
ఇది కూడా చదవండి: Afghanistan Earthquake : అఫ్గానిస్థాన్ లో మరోసారి భూకంపం.. భయంతో వణికిపోయిన స్థానికులు
అంతేకాకుండా, హమాస్ యోధులు ఇజ్రాయెల్ దళాలకు వ్యతిరేకంగా రహస్యంగా ఉపయోగించగల సొరంగాల నెట్‌వర్క్‌లో మందుగుండు సామగ్రి, ఇతర ప్రాణాంతక ఆయుధాలను దాచిపెట్టి ఉండవచ్చని అంటున్నారు. అందువల్ల, గాజా స్ట్రిప్‌ను జయించాలనే ఇజ్రాయెల్ ప్రణాళికను అమలు చేయడం చాలా సులభం కాదు. ఇజ్రాయెల్ రక్షణ దళాలు గాజా మొత్తం ప్రాంతాన్ని అన్ని వైపుల నుంచి నిరోధించాయని, హమాస్ నెట్‌వర్క్‌ను పూర్తిగా నాశనం చేయడానికి ఒక ఆపరేషన్‌కు సిద్ధమవుతున్నాయని తెలుస్తోంది. కాగా సైనికాధికారులు, సిబ్బందిని కలుసుకుని తదుపరి ఆపరేషన్‌కు సిద్ధంగా ఉండాలని ఇజ్రాయెల్ ప్రధాని బెంజమిన్ నెతన్యాహు ఇప్పటికే ఆదేశాలు జారీ చేశారు.
