Celina Jaitly : ప్రముఖ నటిపై భర్త లైంగిక వేధింపులు, గృహహింస.. లుక్ అవుట్ నోటీస్ జారీ చేసిన పోలీసులు

Celina Jaitly : ప్రముఖ బాలీవుడ్ నటి ఒకరు తన భర్త మీద లైగింక వేధింపులు ఆరోపణలు చేస్తూ పోలీసులకు ఫిర్యాదు చేశారు.

FIR Filed and look out circular issued Against Celina Jaitly Husband Peter Haag After Actress Alleges

Celina Jaitly : బాలీవుడ్ నటి సెలీనా జైట్లీ తన భర్త, వ్యాపారవేత్త పీటర్ హాగ్ మీద సంచలన ఆరోపణలు చేశారు. తన భర్త తనను శారీరకంగా, మానసికగా వేధిస్తున్నాడంటూ ముంబై పోలీసులకు ఫిర్యాదు చేయడంతో.. ఆయనపై కఠిన చర్యలకు ఉపక్రమించారు. సెలీనా ఫిర్యాదు మేరకు ముంబై పోలీసులు పీటర్ హాగ్ మీద భారతీయ న్యాయ సంహిత (BNS)లోని వివిధ సెక్షన్ల ప్రకారం కేసులు నమోదు చేశారు. వీటిలో గృహహింసతో పాటు భార్య పట్ల క్రూరంగా ప్రవర్తించడం, గాయపరచడం, క్రిమినల్ బెదిరింపులకు సంబంధించిన ఆరోపణలు ఉన్నాయి. పీటర్ ప్రస్తుతం ఇండియాలో లేనందున.. అతడు విచారణ నుంచి తప్పించుకునే అవకాశం ఉండటంతో.. పోలీసులు అతడిపై లుకౌట్ సర్క్యులర్ (LOC) జారీ చేశారు. దీనివల్ల అతడు విమానాశ్రయాల్లో పట్టుబడే అవకాశం ఉంది.

తన భర్త పీటర్ హాగ్ తనను కేవలం శారీరకంగా మాత్రమే కాక ఆర్థికంగా కూడా వేధించారని నటి సెలీనా ఆరోపించారు. తన సంపాదనను పీటర్ దుర్వినియోగం చేశారని, తన కెరీర్ కు అడ్డంకులు సృష్టించారని.. ఈ చర్యల వల్ల తాను జీవితంలో చాలా నష్టపోయానని.. అందుకు గాను భర్త వద్ద నుంచి తనకు రూ. 50 కోట్ల నష్టపరిహారాన్ని ఇప్పించాలని డిమాండ్ చేశారు. అలానే గృహ హింస చట్టం కింద తన ముగ్గురు పిల్లల బాధ్యత, రక్షణను కూడా తనకే అప్పగించాలని ఆమె కోరుతున్నారు.

పీటర్ హాగ్ మీద పోలీసులకు ఫిర్యాదు చేసిన కాసేపటికే నటి సెలీనా తన ఇన్‌స్టాగ్రామ్‌లో ఒక దీర్ఘమైన పోస్ట్ షేర్ చేశారు. ఒక బుక్ లోని పేజీని ఫోటో తీసి.. దాన్ని ఇన్ స్టాలో పోస్ట్ చేస్తూ.. అందులోని కొన్ని ముఖ్యాంశాలను హైలైట్ చేశారు. “నార్సిసిస్ట్‌తో బంధాన్ని తెంచుకోవడం అంటే కేవలం విడిపోవడం కాదు.. వారు మీ గురించి సృష్టించిన తప్పుడు ప్రచారం, అబద్ధాల ప్రపంచం నుంచి మీరు విముక్తి పొందడం. ఈ ప్రక్రియలో మీరు మీ గొంతును, మీ గుర్తింపును, మీ జీవితాన్ని మళ్లీ పొందుతారు. మీ కథను మీరే మళ్లీ రాసుకోవాలి” అంటూ తన భర్తతో తనకున్న బంధం గురించి పరోక్షంగా వ్యాఖ్యానిస్తూ ఈ పోస్ట్ చేశారు.

పీటర్ హాగ్-సెలీనా జైట్లీ దంపతులకు 2011లో వివాహం అయ్యింది. అయితే పెళ్ళైన కొంత కాలం నుంచే వీరి మధ్య విభేదాలు నడుస్తున్నాయి. ఈ క్రమంలోనే సెలీనా జైట్లీ భర్త మీద పోలీసులకు ఫిర్యాదు చేయడం.. గృహ హింసపై పోరాడటం బాలీవుడ్‌లో సంచలనం సృష్టిస్తోంది. ఈ కేసు దర్యాప్తు ప్రస్తుతం ముమ్మరంగా సాగుతోంది. పీటర్ హాగ్ ఈ ఆరోపణలపై స్పందించాల్సి ఉంది.