Kerala High Court to watch 'Haal' movie amid Beef biryani, burqa scene row
Haal: మలయాళ చిత్రం ‘హాల్’ ఇప్పుడు కేరళ హైకోర్టు దృష్టిని ఆకర్షించింది. సెంట్రల్ బోర్డ్ ఆఫ్ ఫిల్మ్ సర్టిఫికేషన్ (CBFC) సూచించిన కొన్ని సన్నివేశాలు, సంభాషణల తొలగింపును సవాల్ చేస్తూ నిర్మాతలు దాఖలు చేసిన పిటిషన్ నేపథ్యంలో అక్టోబర్ 25, శనివారం నాడు కోర్టు ఈ చిత్రాన్ని ప్రత్యేకంగా వీక్షించనుంది.
బీఫ్, మతపరమైన వస్త్రధారణ: CBFC అభ్యంతరాలేంటి?
నిర్మాతలు, దర్శకుల ప్రకారం, CBFC తొలగించమని కోరిన సన్నివేశాలు చిత్ర(Haal) కథనానికి అత్యంత కీలకం. వీటిలో బీఫ్ బిర్యానీ తినే సన్నివేశాలు, ఒక పాత్ర ధరించిన మతపరమైన వస్త్రధారణకు సంబంధించినవి ఉన్నాయి. దర్శకుడు ముహమ్మద్ రఫీక్ (వీరా), నిర్మాత జూబీ థామస్ దాఖలు చేసిన పిటిషన్‌లో ఈ అంశాలను కోర్టు దృష్టికి తీసుకెళ్లారు. అంతేకాకుండా, రాఖీ (పవిత్ర దారం) దృశ్యాన్ని కూడా బ్లర్ చేయాలని CBFC కోరినట్లు సమాచారం.ఈ వివాదంలో కాథలిక్ కాంగ్రెస్ సంస్థ కూడా చేరింది. ‘హాల్’ చిత్రంలో థమరశేరి బిషప్ హౌస్‌పై అభ్యంతరకర సూచనలు ఉన్నాయని, బిషప్‌ను డయోసిస్ అనుమతి లేకుండా చూపించారని వారు ఆరోపించారు. ఈ చిత్రం విడుదల క్రైస్తవుల మనోభావాలను దెబ్బతీసి, సామాజిక సౌహార్దాన్ని భంగపరుస్తుందని ఆందోళన వ్యక్తం చేశారు.
సుమారు రూ. 15 కోట్ల వ్యయంతో రూపొందిన ఈ చిత్రం కొన్ని సామాజిక అంశాలను చూపిస్తుందే తప్ప, శత్రుత్వం లేదా హింసను ప్రోత్సహించదని చిత్ర బృందం హైకోర్టుకు తెలిపింది. చిత్ర సర్టిఫికేషన్ అలాగే విడుదల అంశంపై తుది విచారణ అక్టోబర్ 30న జరగనుంది. ఈ కేసు సినీ పరిశ్రమలో సెన్సార్‌షిప్ పరిమితులపై విస్తృత చర్చకు దారితీసే అవకాశం ఉంది.
