Pawan Kalyan
Pawan Kalyan : జులై 24న గ్రాండ్ రిలీజ్‌కు సిద్ధమవుతోంది హరిహర వీరమల్లు మూవీ. పవర్ స్టార్ పవన్ కళ్యాణ్ రెండేళ్ల గ్యాప్‌ తర్వాత వెండితెరమీద కనిపిస్తున్న సినిమా ఇది. ఈ సినిమాపై ఓ రేంజ్‌లో హైప్ క్రియేట్ అయింది. ఫ్యాన్స్ అంచనాలు కూడా అదే స్థాయిలో ఉన్నాయి. ఈ హైప్, బజ్‌ను పీక్‌ లెవల్‌కి తీసుకెళ్లేందుకు హరిహర వీరమల్లు మూవీ ప్రీమియర్స్ వేసేందుకు నిర్మాతలు రెడీ అవుతున్నారట.
ఏపీలో టికెట్ రేట్ల పెంపుకు, ప్రీమియర్స్ కు, అర్ధరాత్రి షోలకు ఎలాంటి ఇబ్బంది లేదు. కానీ పుష్ప-2 రిలీజ్ సందర్భంగా జరిగిన ఘటనతో తెలంగాణలో ప్రీమియర్స్‌కు పర్మీషన్ దొరకడం కాస్త కష్టంగా మారింది. తెలంగాణ ప్రభుత్వం గతంలోనే ప్రీమియర్స్‌కు, టికెట్ల రేట్ల పెంపునకు అనుమతి ఇవ్వమంటూ చెప్పింది. ఆ తర్వాత ఒకటి, రెండు సినిమాలకు టికెట్లు రేట్లు పెంచినా ప్రీమియర్స్‌కు, మిడ్ నైట్ షో లకు మాత్రం అనుమతివ్వలేదు.
Also Read : RK Sagar : మొగలిరేకులు ఫేమ్ ‘ఆర్కే నాయుడు’ భార్య ఏం చేస్తుందో తెలుసా?
పుష్ప-2 తర్వాత టాలీవుడ్‌లో పెద్ద సినిమాలకు స్పెషల్ షోలు, ఈవెంట్స్‌పై భారీ ఆంక్షలు వచ్చాయి. థియేటర్ యాజమాన్యాలు, పోలీసులు భద్రతా విషయంలో స్ట్రిక్ట్‌గా వ్యవహరిస్తున్నారు. ఈ నిబంధనల మధ్యలో హరిహర వీరమల్లు సినిమాకు స్పెషల్ ప్రీమియర్స్ కోసం నిర్మాతలు గట్టిగా ప్రయత్నిస్తున్నారట. పవన్ కళ్యాణ్ హీరోగా, క్రిష్ జాగర్లమూడి, జ్యోతి కృష్ణ దర్శకత్వంలో తెరకెక్కుతున్న ఈ పీరియాడిక్ యాక్షన్ డ్రామాగా రిలీజ్ కానుంది.
ఇప్పటికే ఈ సినిమా ట్రైలర్ 24 గంటల్లో 48 మిలియన్ వ్యూస్‌తో పుష్ప-2 రికార్డ్‌ను బద్దలు కొట్టింది. ఈ హైప్‌తో నిర్మాతలు ప్రీమియర్స్‌తో జోష్‌ను మరింత పెంచాలనుకుంటున్నారట. కానీ జులై 2న సంధ్య థియేటర్‌లో జరగాల్సిన హరిహర వీరమల్లు ట్రైలర్ స్క్రీనింగే క్యాన్సిల్ అయింది. అభిమానుల రద్దీతో పరిస్థితి అదుపు తప్పడంతో భద్రతా కారణాలతో ట్రైలర్ ప్రదర్శనను ఆపేశారు.
ఇప్పుడు స్పెషల్ ప్రీమియర్స్ కోసం నిర్మాతలు, థియేటర్ యాజమాన్యాలు పోలీసులతో చర్చలు జరుపుతున్నట్లు టాక్. అభిమానుల ఉత్సాహాన్ని కంట్రోల్ చేస్తూ, భద్రతా జాగ్రత్తలు తీసుకుంటూ ప్రీమియర్స్ వేసేందుకు పకడ్బందీ ప్లాన్‌ చేస్తున్నారట. ఈ ప్రీమియర్స్ జులై 24న తెల్లవారుజామున జరిగే అవకాశం ఉందని సమాచారం. ఈ రూమర్ తో పవన్ ఫ్యాన్స్ ఫుల్ జోష్‌లో ఉన్నారు. పుష్ప 2 తర్వాత ఎవరికీ పర్మిషన్ ఇవ్వని తెలంగాణ ప్రభుత్వం పవన్ కళ్యాణ్ హరిహర వీరమల్లు ప్రీమియర్స్‌కు అనుమతి ఇస్తుందా చూడాలి.
