PMVBRJY Scheme: ఉద్యోగులకు, ఉద్యోగాలు ఇచ్చే కంపెనీలకు ఆర్థిక సాయం అందించడం కోసం ప్రభుత్వం ఏర్పాటు చేసిన ఉపాధి పోర్టల్ ప్రధాన్ మంత్రి వికసిత్ భారత్ రోజ్‌గార్ యోజన. ఉద్యోగ అవకాశాల కోసం చూస్తున్న వారి కోసం, కొత్త ప్రతిభను నియమించుకోవడానికి సిద్ధంగా ఉన్న కంపెనీల కోసం ఈ స్కీమ్ తీసుకొచ్చారు. https://pmvbry.epfindia.gov.in/).
స్వాతంత్ర్య దినోత్సవం నాడు ఎర్రకోట వేదికగా ప్రధాని మోదీ ఈ పథకాన్ని ప్రకటించారు. అలా ప్రకటించిన మూడు రోజుల్లోనే కేంద్రం పోర్టల్‌ను ప్రత్యక్ష ప్రసారం చేసింది.
యువతకు ఉద్యోగాలు కల్పించేందుకు ఈ పథకాన్ని ప్రారంభించారు. కొత్తగా ఉద్యోగాల్లో చేరిన వారికి PMVBRJY కింద రూ.15 వేలు అందజేస్తారు. ఉద్యోగం ఇచ్చే కంపెనీకి కూడా ఒక్క ఉద్యోగికి నెలకు రూ.3 వేల వరకు ప్రోత్సాహకం అందించనున్నారు.
ప్రధాన్ మంత్రి వికసిత్ భారత్ రోజ్‌గార్ యోజన అధికారిక పోర్టల్ సోమవారం ప్రత్యక్ష ప్రసారం అయ్యిందని కేంద్ర కార్మిక ఉపాధి శాఖ మంత్రి మన్సుఖ్ మాండవీయ తెలిపారు. రాబోయే రెండేళ్లలో 3.5 కోట్లకు పైగా ఉపాధి అవకాశాలను సృష్టించడమే ఈ ఉద్యోగ పథకం లక్ష్యం అని ఆయన చెప్పారు.
“జూలై 1, 2025న కేంద్ర మంత్రివర్గం ప్రధాన్ మంత్రి వికసిత్ భారత్ రోజ్‌గార్ యోజనగా పిలువబడే ఉపాధి-సంబంధిత ప్రోత్సాహక పథకాన్ని ఆమోదించింది. తయారీ రంగంపై ప్రత్యేక దృష్టి సారించి, అన్ని రంగాలలో ఉపాధి కల్పనకు మద్దతివ్వడం, ఉపాధిని పెంచడం, సామాజిక భద్రతను పెంపొందించడం ఈ పథకం లక్ష్యం. ఇది కేంద్ర రంగ పథకం.
దాదాపు లక్ష కోట్ల రూపాయల వ్యయంతో ఈ పథకం 2 సంవత్సరాల కాలంలో దేశంలో 3.5 కోట్లకు పైగా ఉద్యోగాల సృష్టిని ప్రోత్సహించడం లక్ష్యంగా పెట్టుకుంది” అని కేంద్రమంత్రి మాండవీయ వివరించారు.
ఆగస్టు 1, 2025 నుంచి జూలై 31, 2027 మధ్య సృష్టించబడిన ఉద్యోగాలకు ఈ పథకం వర్తిస్తుందని వెల్లడించారు.
జూలై 1న కేంద్ర మంత్రివర్గం ఉపాధి ఆధారిత ప్రోత్సాహక పథకం ప్రధాన మంత్రి వికసిత్ భారత్ రోజ్‌గార్ యోజనను ఆమోదించింది. ఈ విధానం అన్ని రంగాలలో ఉపాధి కల్పనకు మద్దతివ్వడానికి, ఉపాధిని పెంచడానికి, సామాజిక భద్రతను పెంచడానికి, తయారీ రంగంపై ప్రత్యేక దృష్టి సారించడానికి ప్రతిపాదించబడింది.
ఈ పథకం రెండు భాగాలను కలిగి ఉంటుంది. (పార్ట్ A, పార్ట్ B)
ప్రధాన మంత్రి వికసిత్ భారత్ రోజ్‌గార్ యోజన పార్ట్-ఎ:
ఈ పథకం పార్ట్ ఎ కింద, మొదటిసారిగా ఉద్యోగంలో చేరే ఉద్యోగులకు ప్రోత్సాహకం ఇవ్వబడుతుంది. ఇది సగటున ఒక నెల వేతనం (బేసిక్ ప్లస్ డిఎ) రూ. 15000 వరకు ఉంటుంది. దీనిని రెండు వాయిదాలలో చెల్లిస్తారు. జీతం లక్ష లేదా అంతకంటే తక్కువ ఉన్న ఉద్యోగులు ఈ ప్రోత్సాహకానికి అర్హులు.
పార్ట్ B.. ఉద్యోగాలు ఇచ్చే యజమానుల కోసం. తయారీ రంగంపై ప్రత్యేక దృష్టి సారించి, అన్ని రంగాలలో ఉద్యోగ అవకాశాలను అందించడానికి వారికి మద్దతిస్తుంది. ఈ ప్రత్యేక భాగం ప్రకారం, కొత్త ఉద్యోగిని నియమించినందుకు కంపెనీలకు ప్రతి ఉద్యోగికి నెలకు రూ.3,000 చొప్పున ప్రోత్సాహకం అందిస్తారు.
ఈ ప్రోత్సాహకం రెండేళ్ల పాటు చెల్లిస్తారు. తయారీ రంగంలోని సంస్థలకు నాలుగు సంవత్సరాల వరకు ఇస్తారు.
పార్ట్ బి కింద ప్రయోజనాలకు అర్హత పొందేందుకు ఈ పథకం షరతులను నిర్దేశిస్తుంది. 50 కంటే తక్కువ మంది ఉద్యోగులున్న సంస్థలు కనీసం ఇద్దరు అదనపు ఉద్యోగులను నియమించుకోవాలి.
50 లేదా అంతకంటే ఎక్కువ మంది ఉద్యోగులున్న సంస్థలు ప్రోత్సాహకానికి అర్హత పొందాలంటే కనీసం ఐదుగురు అదనపు ఉద్యోగులను నియమించుకోవాలి.
కొత్త నియామకాలను కనీసం ఆరు నెలల పాటు నిర్వహించాలి. ఉద్యోగుల ప్రావిడెంట్ ఫండ్ ఇతర నిబంధనల చట్టం 1952 కింద మినహాయింపు పొందిన సంస్థలు కూడా ఈ పథకంలో చేర్చబడ్డాయి.
ఈ కంపెనీలు UMANG యాప్‌లో అందించిన సౌకర్యాన్ని ఉపయోగించి వారి ప్రస్తుత, కొత్త ఉద్యోగులందరికీ ఎలక్ట్రానిక్ చలాన్-కమ్-రిటర్న్‌ను దాఖలు చేయాలి. యూనివర్సల్ ఖాతా నంబర్‌లను తెరవాలి.
ప్రధాన మంత్రి వికసిత్ భారత్ రోజ్‌గార్ యోజన పోర్టల్‌లో ఎలా నమోదు చేసుకోవాలి?
ఉద్యోగులు ఏ పోర్టల్‌లోనూ ఎలాంటి రిజిస్ట్రేషన్ చేయవలసిన అవసరం లేదు.
జాబ్ పోర్టల్ ప్రకారం, EPFOలో వారి సంస్థ దాఖలు చేసిన వివరాల ఆధారంగా ఉద్యోగులకు ప్రోత్సాహకం అందించబడుతుంది.
సంస్థల విషయానికొస్తే, EPFOలో ఇప్పటికే నమోదు చేసుకున్న వారు ఈ పథకం కోసం అలా చేయవలసిన అవసరం లేదు. అయితే, వారు ఈ కింది వివరాలను అందించాలి:
1. సంస్థ పాన్
2. GSTN (వస్తువులు సేవల పన్ను సంఖ్య)
3. యజమాని పాన్-లింక్డ్ బ్యాంక్ ఖాతా సంఖ్య
కార్మిక ఉపాధి మంత్రిత్వ శాఖ శ్రమ సువిధ పోర్టల్ లేదా కార్పొరేట్ వ్యవహారాల మంత్రిత్వ శాఖ (MCA) పోర్టల్ ద్వారా నమోదు చేసుకునే కొత్త సంస్థలకు విలీనం లేదా రిజిస్ట్రేషన్ సమయంలో ఆటోమేటిక్ గా PF కోడ్/EPF నంబర్ కేటాయించబడుతుంది.
Also Read: ఓమైగాడ్.. బ్రెయిన్ తినేస్తున్న అమీబా.. ఆల్రెడీ 9 ఏళ్ల బాలిక మృతి.. ఏంటీ అమీబా? ఎలా వస్తుంది?
