T20 World Cup 2026 Shahid Afridi wants three players dropped after loss to India
IND vs PAK : టీ20 ప్రపంచకప్ 2026లో భాగంగా కొలంబో వేదికగా జరిగిన మ్యాచ్లో భారత్ చేతిలో పాకిస్థాన్ చిత్తు చిత్తుగా ఓడిపోయింది. 61 పరుగుల తేడాతో ఓటమిని చవిచూసింది. టీ20 ప్రపంచకప్లలో భారత్ పై పాక్కు ఇది ఎనిమిదో ఓటమి. భారత్ చేతిలో ఓడిపోవడంతో పాక్ జట్టుపై విమర్శల వర్షం కురుస్తోంది.
సొంత అభిమానులతో పాటు ఆ జట్టు మాజీ ఆటగాళ్లు కూడా పాక్ ప్లేయర్లపై మండిపడుతున్నారు. పాక్ మాజీ కెప్టెన్ షాహిద్ అఫ్రిది ఓ అడుగుముందుకు వేసి జట్టులోంచి తన సొంత అల్లుడితో పాటు మరో ఇద్దరు ఆటగాళ్లను తొలగించాలని డిమాండ్ చేశాడు. పాకిస్థాన్ సూపర్-8కి చేరుకోవాలంటే నమీబియాతో మ్యాచ్లో ఆ ముగ్గురిని తొలగించి యువ ఆటగాళ్లకు అవకాశం ఇవ్వాలని కోరాడు.
‘సీనియర్ ఆటగాళ్లు నాణ్యమైన జట్లపై రాణించకపోవడాన్ని గత కొంతకాలంగా చూస్తూనే ఉన్నాం. యువ ఆటగాళ్లకు అవకాశం ఇవ్వాల్సిన సమయం వచ్చింది. నేను సెలక్టర్ను అయితే బాబర్ ఆజామ్, షాహీన్ అఫ్రిది, షాదాబ్లను తొలగిస్తాను. ప్రపంచకప్లో పాక్ సూపర్-8కి అర్హత సాధించాలంటే కనీసం నమీబియాతో మ్యాచ్లోనైనా కొత్త వాళ్లకు అవకాశం ఇవ్వాలి.’ అని అఫ్రిది అన్నాడు.
మరో మాజీ ఆటగాడు మహ్మద్ యూసుఫ్ కూడా దాదాపుగా ఇలాగే మాట్లాడాడు. షాహీన్, బాబర్, షాబాద్లు రిటైర్మెంట్ ప్రకటించాలన్నాడు. బలహీన జట్లపై రాణించడం కాదని, బలమైన జట్లపై రాణించాలన్నాడు. ప్రస్తుతం పాక్ టీ20 జట్టులో యువ ఆటగాళ్లకు అవకాశాలు ఇవ్వాలని కోరాడు.
భారత్తో మ్యాచ్లో షాహీన్, బాబర్, షాబాద్లు ఘోరంగా విఫలం అయ్యారు. బాబర్ 5 పరుగులు మాత్రమే చేశాడు. షాహీన్ అఫ్రిది రెండు ఓవర్లు వేసి 31 పరుగులు సమర్పించుకున్నాడు. అక్షర్ పటేల్ వికెట్ మాత్రమే తీశాడు. అది కూడా ఇన్నింగ్స్ ఆఖరి బంతికి కావడం గమనార్హం. అయితే.. బ్యాటింగ్లో షాహీన్ 19 బంతుల్లో 23 పరుగులతో అజేయంగా నిలిచాడు. ఇక షాబాద్ విషయానికి వస్తే.. అతడు ఒకే ఒక ఓవర్ వేసి 17 పరుగులు సమర్పించుకున్నాడు. లక్ష్య ఛేదనలో అతడు 15 బంతుల్లో 14 పరుగులు చేశాడు.
