వైరల్ వీడియో : ఉద్యోగుల కాళ్లు కడిగిన బాస్ లు..

బాబ్బాబూ..ఆ పని చేసి పెట్టరా..నీకాళ్లు కడిగి నెత్తిన పోసుకుంటాను అంటాం. అది ఒక ఊతపదం. కానీ తీరా ఆ వ్యక్తితో పని జరిగాక మనం అన్న పనిచేస్తామా? చేయనే చేయం. ఇప్పటి వరకు ఆ మాట అనడమే చూశాం.. కానీ చైనాకు చెందిన ఓ కంపెనీ ప్రతినిధులు మాత్రం.. ఆ కంపెనీ ఉద్యోగుల కాళ్లు కడిగారు. ఎందుకో తెలుసా? వారి కంపెనీ ప్రొడక్ట్స్‌ను అత్యధికంగా సేల్‌ చేసినందుకు..దానికి ఆ కంపెనీలు లాభాలు తెచ్చిపెట్టినందుకు.  ఉద్యోగుల కాళ్లు కడిగారు. 

చైనాలోని ఓ కాస్మోటిక్‌ కంపెనీలో పని చేస్తున్న మొత్తం ఉద్యోగుల్లో 8 మంది ఉద్యోగులు అత్యుత్తమ ప్రతిభ కనబరిచారు. ఈ 8 మంది ఉద్యోగులు కంపెనీ ప్రొడక్ట్స్‌ను అనుకున్న దాని కంటే అధికంగా సేల్స్‌ చేశారు. ఈ సందర్భంగా నవంబర్ 2 న చైనాలోని షాన్డాంగ్ ప్రావిన్స్‌లోని జినాన్‌లో జరిగిన అవార్డు ప్రధానోత్సవంలో కంపెనీ ప్రతినిథులు  ఆ 8 మంది పాదాలను కాస్మోటిక్‌ కంపెనీ అధ్యక్షుడు, సీనియర్‌ ఎగ్జిక్యూటివ్‌ ఆఫీసర్‌ కడిగారు.

మొదటిగా .. 8 మందిని కుర్చీల్లో కూర్చోబెట్టి.. వారు వేసుకున్న షూను అధ్యక్షుడు, సీనియర్‌ ఎగ్జిక్యూటివ్‌ తమ చేతులతో విప్పారు. ఆ తర్వాత వారి పాదాలను పెద్ద పాత్రల్లో పెట్టి నీటితో కడిగి కృతజ్ఞతలు చెప్పారు. అయితే దీనిపై పలువురు నెటిజన్లు పలు రకాలుగా స్పందించారు. ఆ ఎనిమిదిమందికి కాళ్లు కడిగి చేతులు దులుపుకున్నారు అని కొందరూ..కాళ్లు సెంటిమెంట్ గా  కడిగేస్తే..బోనస్ లు అడగరుగా..అంటూ మరికొందరూ.. వ్యాఖ్యానించారు.