BSc Nursing Courses : 2025-26 విద్యా సంవత్సరం నుండి బీఎస్సీ నర్సింగ్‌లో చేరాలనుకునే విద్యార్థులకు ఉమ్మడి ప్రవేశ పరీక్ష ఉంటుందని ఆంధ్రప్రదేశ్ ఆరోగ్య, వైద్య విద్య కుటుంబ సంక్షేమ శాఖ మంత్రి సత్యకుమార్ యాదవ్ తెలిపారు.
గురువారం విజయవాడలోని డాక్టర్ ఎన్టీఆర్ హెల్త్ సైన్స్ విశ్వవిద్యాలయంలో నర్సింగ్ సంస్థల నిర్వహణ, ప్రవేశాల క్రమబద్ధీకరణపై చర్చించడానికి నిర్వహించిన నర్సింగ్ సంస్థల ప్రతినిధుల సమావేశంలో మంత్రి మాట్లాడారు. గత రెండు సంవత్సరాలుగా ఈఏపీసెట్ నీట్ ద్వారా ఈ కోర్సులో ప్రవేశం జరుగుతోందని చెప్పారు. “కానీ, 2025-26 విద్యా సంవత్సరం నుండి బైపీసీ విద్యార్థి.. ఉమ్మడి ప్రవేశ పరీక్ష కూడా పాస్ కావాలని మంత్రి సత్యకుమార్ యాదవ్ స్పష్టం చేశారు.
ఇది జరగాలంటే అడ్మిషన్ ప్రక్రియ ఏప్రిల్‌లో ప్రారంభమై జూలై నాటికి ముగియాలన్నారు. నవంబర్ వరకు పొడిగించకూడదని 13 జిల్లాల నర్సింగ్ సంస్థల ప్రతినిధులకు చెప్పారు. పరీక్షల బోర్డు కూడా ఏర్పాటు చేయబడుతుందని మంత్రి సత్యకుమార్ యాదవ్ వెల్లడించారు.
Also Read : ట్రంప్ మరో సంచలన నిర్ణయం.. 3లక్షల మంది ఇండియన్ స్టూడెంట్స్ కు ఎఫెక్ట్ .. హెచ్1బీ వీసాల కోసం పరుగులు..
బీఎస్సీ నర్సింగ్ కోర్సులు అందించే కాలేజీల్లో ప్రతి సంవత్సరం దాదాపు 13వేల మంది విద్యార్థులు ప్రవేశం పొందుతున్నారు. మూడేళ్ల కోర్సుకు రాష్ట్రం ప్రవేశ పరీక్ష నిర్వహించడం ఇదే తొలిసారి. కాగా.. బీఎస్సీ నర్సింగ్, జనరల్ మిడ్ వైఫరీ కోర్సుల వార్షిక కోర్సు ఫీజు చాలా తక్కువగా ఉందని ప్రతినిధులు ఆందోళన వ్యక్తం చేశారు. ఈ విషయంలో నిర్ణయం తీసుకుంటామని మంత్రి వారికి హామీ ఇచ్చారు. నర్సింగ్ కాలేజీల స్థాపన నిర్వహణ కోసం సమగ్ర ప్రభుత్వ ఉత్తర్వును కూడా ప్రతినిధులు డిమాండ్ చేశారు.
తన శాఖకు వచ్చిన వివిధ ఫిర్యాదుల గురించి మంత్రి ప్రస్తావించారు. నర్సింగ్ విద్యా సంస్థల స్థాపన, నాణ్యమైన విద్యను అందించడంలో ఎట్టి పరిస్థితుల్లోనూ రాజీపడటానికి అవకాశం ఉండకూడదని, ఈ విషయాల్లో ప్రభుత్వం కఠినంగా వ్యవహరిస్తుందని తేల్చి చెప్పారు.
