Income Tax deadlines
Income Tax Deadlines : పన్ను చెల్లింపుదారులకు బిగ్ అలర్ట్.. ఆదాయపు పన్ను ఇంకా చెల్లించలేదా? పన్ను చెల్లింపులకు సంబంధించి తుది గడువు దగ్గరపడుతోంది. గడువు తేదీ వరకు ఆగే కన్నా ముందుగానే ఆదాయపు పన్ను చెల్లించడం పన్ను చెల్లింపుదారులకు చాలా ముఖ్యం.
అలా చేయకపోతే పన్ను ప్రయోజనాలను కోల్పోయే ప్రమాదం ఉంది. అంతేకాదు.. పెనాల్టీలు, రుసుములు లేదా జరిమానాలు కూడా చెల్లించాల్సి రావచ్చు. 2026 ఆర్థిక సంవత్సరం మరో 15 రోజుల్లో ముగియనుంది. మార్చి 31, 2025కి ముందు కొన్ని రోజుల్లో ముగియబోయే గడువులను ఓసారి లుక్కేయండి.
ఆదాయపు పన్ను కీలక గడువులివే :
2024-25 ఆర్థిక సంవత్సరానికి పన్ను మినహాయింపును క్లెయిమ్ చేసేందుకు పెట్టుబడిదారులు మార్చి 31కి ముందు పెట్టుబడి పెట్టాలి. మార్చి 31 తర్వాత పెట్టుబడి పెట్టే పన్ను చెల్లింపుదారులు తదుపరి సంవత్సరం అంటే.. 2025-26లో మాత్రమే పన్ను మినహాయింపును క్లెయిమ్ చేసుకోగలరు. 80C, 80D, 80G వంటి వివిధ సెక్షన్ల కింద పన్ను మినహాయింపులు కొత్త పన్ను విధానంలో కాకుండా పాత పన్ను విధానంలో మాత్రమే అందుబాటులో ఉన్నాయి.
2024-25 ఆర్థిక సంవత్సరానికి కొత్త పన్ను విధానాన్ని ఎంచుకోవాలంటే.. పన్ను ఆదా కోసం మీరు పెట్టుబడి పెట్టవలసిన అవసరం లేదు. 2025-26 అసెస్‌మెంట్ సంవత్సరానికి నాల్గవ విడత ముందస్తు పన్ను చెల్లించడానికి మార్చి 15 చివరి తేదీ.
ముందస్తు పన్ను చెల్లించాల్సిన పన్ను చెల్లింపుదారులు మార్చి 15 లోపు 100 శాతం బకాయిలను చెల్లించాలి. ఫిబ్రవరి, 2025 నెలకు సంబంధించిన TDS/TCSను చలాన్ ఇవ్వకుండానే చెల్లించినవాళ్లు ప్రభుత్వ కార్యాలయం ద్వారా ఫారమ్ 24Gని సమర్పించేందుకు వచ్చే శనివారం వరకు గడువు ఉంది.
జనవరి 2025లో సెక్షన్ 194-IA, 194-IB కింద మినహాయించిన పన్నుకు టీడీఎస్ సర్టిఫికేట్ జారీ చేసే గడువు తేదీ మార్చి 17. ఫిబ్రవరిలో సెక్షన్ 194-IA, 194-IB కింద తగ్గించిన పన్నుకు సంబంధించి చలాన్-కమ్-స్టేట్‌మెంట్‌ను సమర్పించేందుకు చివరి తేదీ మార్చి 30 వరకు మాత్రమే. 2022-23 అసెస్‌మెంట్ సంవత్సరానికి అప్‌డేట్ చేసిన ఆదాయ రిటర్న్‌ను మార్చి 31 వరకు సమర్పించవచ్చు.
