భారత స్టాక్ మార్కెట్‌ను డామినేట్ చేస్తున్న యంగ్‌స్టర్స్..

Young Investors : యువత సత్తా చాటుతోంది. దాదాపుగా అన్ని రంగాల్లో రాణిస్తోంది. పాలిటిక్స్, సోర్ట్స్, బిజినెస్.. రంగం ఏదైనా.. యంగ్ స్టర్స్ అదరగొడుతున్నారు. ఇప్పుడు మరో అడుగు ముందుకేసింది యువతరం. భారత స్టాక్ మార్కెట్ ను యువత డామినేట్ చేస్తోంది. స్టాక్ మార్కెట్ లో యువ పెట్టుబడిదారుల సంఖ్య గణనీయంగా పెరిగింది. నేషనల్ స్టాక్ ఎక్స్ చేంజ్ డేటా ప్రకారం.. 30ఏళ్ల లోపు వారు భారత స్టాక్ మార్కెట్ పై ఆధిపత్యం చెలాయిస్తున్నారు. గణాంకాల ప్రకారం, భారతీయ స్టాక్ మార్కెట్‌లో యువ పెట్టుబడిదారుల సంఖ్య వేగంగా పెరిగింది. మార్చి 2018 – ఆగస్టు 2024 మధ్య 30 ఏళ్లలోపు పెట్టుబడిదారుల వాటాలో గణనీయమైన పెరుగుదల ఉంది.

మార్చి 2018లో మొత్తం పెట్టుబడిదారుల బేస్‌లో ఈ వయసు వారి శాతం 22.9 మాత్రమే. అయితే, ఆగస్ట్ 2024 నాటికి, వారి వాటా గణనీయంగా (40 శాతానికి) పెరిగింది. ఇది స్టాక్ మార్కెట్ లో యువ పెట్టుబడిదారుల భాగస్వామ్యంలో వేగవంతమైన పెరుగుదలను ప్రతిబింబిస్తుంది. చిన్న వయస్కులైన ఇన్వెస్టర్లు గణనీయమైన వృద్ధిని కనబరిచారు.

నేషనల్ స్టాక్ ఎక్స్ చేంజ్ ప్రకారం.. 30-39, 40-49 సంవత్సరాల మధ్య వయస్కులైన పెట్టుబడిదారులు, ఈ కాలంలో వారి సంబంధ షేర్లలో పెద్ద మార్పులు లేకుండా మార్కెట్‌లో వారి ప్రాతినిధ్యం స్థిరంగా ఉన్నట్లు గమనించారు. దీనికి విరుద్ధంగా.. వృద్ధాప్య వర్గాలు స్టాక్ మార్కెట్‌లో వారి ప్రమేయంలో స్పష్టమైన క్షీణతను చూపించాయి.

50-59 సంవత్సరాల వయస్సు గల పెట్టుబడిదారులు.. 60 సంవత్సరాలు అంతకంటే ఎక్కువ వయస్సు గల వారు తమ ఉనికిని స్థిరంగా తగ్గించుకున్నారని డేటా వెల్లడించింది. ప్రత్యేకించి, 60 ఏళ్ల కంటే ఎక్కువ వయస్సున్న పెట్టుబడిదారుల వాటా మార్చి 2018లో 12.7 శాతం నుండి ఆగస్టు 2024 నాటికి 7.2 శాతానికి పడిపోయింది. వృద్ధాప్య వర్గాలు (50-59 సంవత్సరాలు, 60 సంవత్సరాలు) వారి సంబంధిత షేర్లలో స్థిరమైన తగ్గుదల కనిపించింది.

NSE డేటా ప్రకారం.. ఇన్వెస్టర్ల మధ్యస్థ వయస్సు మార్చి 2018లో 38 ఏళ్లుగా ఉండగా.. మార్చి 2024 నాటికి 32 ఏళ్లకు తగ్గింది. అదే విధంగా, ఇన్వెస్టర్ల సగటు వయసు కూడా తగ్గింది. మార్చి 2018లో 41.2 ఏళ్లుగా ఉండగా.. ఆగస్టు 2024 నాటికి 35.8 ఏళ్లకు పడిపోయింది.

కాగా, స్టాక్ మార్కెట్ ఇన్వెస్టింగ్ లో పాత తరాలు (పెద్ద వయస్కులు) క్రమంగా తమ భాగస్వామ్యాన్ని తగ్గించుకుంటూ ఉండగా, యువకులలో స్టాక్ మార్కెట్ పెట్టుబడులు బాగా ప్రాచుర్యం పొందుతున్నాయని ఈ ధోరణి సూచిస్తుంది. ఇది శుభ పరిణామమే అని మార్కెట్ వర్గాలు అంటున్నాయి. స్టాక్ మార్కెట్ లో యువ ఇన్వెస్టర్ల సంఖ్య పెరగడం మార్కెట్ కు మంచిదే అని అభిప్రాయం వ్యక్తమవుతోంది.

Also Read : మీ పిల్లల పెంపకం సరిగానే ఉందా? మీరు సక్సెస్‌ఫుల్ పేరెంట్ అనుకుంటున్నారా? ఇదిగో చెక్‌లిస్ట్ మీకోసం..!