రూ.100 కోట్లు నాకేశాడు : పల్లీ నూనె చీటర్ దొరికాడు
- Published By: veegamteam ,Published On : January 29, 2019 / 12:19 PM IST
హైదరాబాద్: పల్లీ నూనె పేరుతో కోట్లు కొల్లగొట్టిన గ్రీన్ గోల్డ్ బయోటెక్ ఎండీ శ్రీకాంత్‌ను పోలీసులు అరెస్టు చేశారు. శ్రీకాంత్‌తో పాటు భాస్కర్ యాదవ్, లంకా ప్రియ, అహల్యరెడ్డి, అనిల్ రెడ్డి, అంజయ్య గౌడ్, సంతోష్‌లను పోలీసులు అదుపులోకి తీసుకుననారు. నిందితుల నుండి రూ.21 లక్షలు స్వాధీనం చేసుకున్నారు. లక్ష రూపాయలు డిపాజిట్ చేస్తే పల్లీ నూనె తీసే యంత్రం ఇస్తామని, ఆ తర్వాత పల్లీ నూనె తీసిస్తే తాము అమ్ముతామని, అలా నెలకు 20వేల రూపాయలు సంపాదించుకోవచ్చని శ్రీకాంత్ ప్రజలను నమ్మించాడు. శ్రీకాంత్‌ను గుడ్డిగా నమ్మిన ప్రజలు పెద్ద సంఖ్యలో డబ్బు డిపాజిట్ చేశారు. ఇలా కోట్లాది రూపాయల డిపాజిట్లు వసూలు చేశాడు. ఆ తర్వాత బోర్డు తిప్పేసి పారిపోయాడు. శ్రీకాంత్ నిజామాబాద్ వాసి. ఉప్పల్ స్టేషన్‌లో ఇతనిపై కేసు నమోదైంది. గతంలోనూ శ్రీకాంత్ పై పలు చీటింగ్ కేసులు ఉన్నాయి.
రూ. లక్ష కట్టిన తమకు తొలుత డబ్బు సక్రమంగానే చెల్లించిన శ్రీకాంత్, తర్వాత డబ్బివ్వడం మానేశాడు. దీంతో తాము మోసపోయామని గుర్తించిన బాధితుల పోలీసులను ఆశ్రయించారు. వారి ఫిర్యాదుతో ఉప్పల్ పోలీసులు రంగంలోకి దిగారు. వారం రోజుల పాటు దర్యాఫ్తు చేసిన పోలీసులు శ్రీకాంత్ ప్రజలను మోసం చేశాడని తేల్చారు. నిజామాబాద్ జిల్లాకు చెందిన శ్రీకాంత్, గతంలోనూ పలు ఆకర్షణీయమైన స్కీములను ప్రకటించి ప్రజలను చీట్ చేశాడని గుర్తించారు. అతనిపై గతంలోనే బంజారాహిల్స్‌ పోలీసులు కేసు నమోదు చేశారని, ఇప్పుడు అతని అరెస్ట్‌తో పాత కేసులనూ విచారిస్తామని ఉన్నతాధికారులు తెలిపారు.
గ్రీన్ గోల్డ్ బయోటెక్ సంస్థ చైన్ సిస్టమ్ ద్వారా ప్రజల నుండి డబ్బు వసూలు చేసినట్టు రాచకొండ సీపీ మహేష్ భగవత్ చెప్పారు. పల్లీ నూనె స్కీమ్ బాగా పాపులర్ అయ్యిందన్నారు. దీంతో జనాలు ఈజీగా మోసపోయారని అన్నారు. వరంగల్, కడప జిల్లాల్లో శ్రీకాంత్‌పై పోలీస్ స్టేషన్లలో కేసులు నమోదైనట్టు సీపీ తెలిపారు.
* శ్రీకాంత్‌తో పాటు భాస్కర్ యాదవ్, లంకా ప్రియ, అహల్యరెడ్డి, అనిల్ రెడ్డి, అంజయ్య గౌడ్, సంతోష్ అరెస్ట్.
* నిందితుల నుండి రూ.21 లక్షలు స్వాధీనం
* వేరుశనగ నూనె మిషన్లు, వేరుశనగ, ఇతర వస్తువులు కలిపి రూ.5 కోట్ల ఆస్తులు గుర్తింపు
* గ్రీన్ గోల్డ్ బయోటెక్ అకౌంట్లు సీజ్
* వేరుశనగ నూనె తీసే యంత్రాలను రూ లక్ష చొప్పున అమ్మిన శ్రీకాంత్
* రూ.100 కోట్ల వరకు మోసానికి పాల్పడ్డ శ్రీకాంత్
* రకరకాల స్కీమ్‌ల పేరుతో ప్రజలను మోసం చేసిన శ్రీకాంత్
* 4 రాష్ట్రాల్లో 70మంది డీలర్లను నియమించుకున్న శ్రీకాంత్
