నవ్వుతుండగానే బ్రెయిన్‌కు సర్జరీ
- Published By: veegamteam ,Published On : October 31, 2019 / 03:18 AM IST
ఓ మహిళ నవ్వుతూ ఉండగానే ఆమె బ్రెయిన్‌కు సర్జరీ చేసిన ఘటన అమెరికాలోని డల్లాస్‌లో చోటు చేసుకుంది. జార్జియాలోని బ్రినావ్‌ యూనివర్శిటీలో చదువుతోన్న జెన్నా స్కార్డ్‌ అనే 25ఏళ్ల వైద్య విద్యార్థినికి ఈ బ్రెయిన్‌ సర్జరీ జరిగింది. మెదడుకు ఆపరేషన్‌ చేస్తున్నంతసేపు ఆమె మాట్లాడుతూనే ఉన్నారు. అంతేకాదు ఆమె ఎక్కడా బాధపడుతున్నట్టు కనిపించలేదు. సర్జరీ జరిగినంతసేపు ఆమె నవ్వుతూ కనిపించారు.
జెన్నా స్కార్డ్‌ బ్రెయిన్‌ స్ట్రోక్‌ రాకుండా ఎలా నివారించుకోవచ్చో రోగులకు శిక్షణ ఇస్తుండగా, హఠాత్తుగా మూర్చరోగం లాగా వచ్చి పడిపోయింది. కాళ్లు, చేతులు వణికిపోయాయి. ఆమెను వైద్యులు వచ్చి పరీక్షించగా, ఆమె ‘కవర్‌నోమా’తో బాధ పడుతున్నట్లు తేలింది. అంటే మెదడులోని ఆక్సిజన్‌ తీసుకెళ్లే మంచి రక్తనాళాలు, చెడు రక్తం నాళాలు ఓ చోట కలుసుకొని బిగుసుకుపోవడం, దాని వల్ల అక్కడ రక్తనాళాలు తెగి మెదడు దెబ్బతినే ప్రమాదం ఉంటుంది.
సర్జరీ తప్పదని డాక్టర్లు చెప్పడంతో ఇలినాయికి చెందిన జెన్నా, డల్లాస్‌లోని మెథడిస్ట్‌ మెడికల్‌ సెంటర్‌ ఆస్పత్రిలో చేరింది. మాట్లాడే ప్రక్రియను నియంత్రించే మెదడు ప్రాంతానికి అతి సమీపంలోనే మంచి, చెడు రక్తనాళాలు బిగుసుకుపోయాయి. సర్జరీలో ఏ మాత్రం పొరపాటు జరిగినా ఆమెకు మాట పడిపోయే ప్రమాదం ఉందని డాక్టర్లు గ్రహించి ఆమెను హెచ్చరించారు. అందుకు ప్రత్యామ్నాయం ఏమిటని ఆమె ప్రశ్నించగా, మెదడుకు ఆపరేషన్‌ చేస్తున్నంత సేపు ఏదో ఒకటి మాట్లాడుతుండాలని, అలా మాట్లాడాలంటే ఎలాంటి మత్తు తీసుకోరాదని చెప్పారు.
