‘రేడియో మాధవ్’ వస్తున్నాడు.. రెడీగా ఉండండి..

Vijay Sethupathi – Radio Madhav: విజయ్ సేతుపతి, జయరామ్ హీరోలుగా నటించిన మలయాళ సినిమా ‘మార్కొని మతాయ్’. సనల్ కలతిల్ దర్శకత్వం వహించారు. ఫ్యామిలీ ఎంటర్టైనర్‌గా రూపొందిన ఈ సినిమా అక్కడ మంచి విజయం సాధించింది. అతి తక్కువ సమయంలో తమిళంలో కథానాయకుడిగా, నటుడిగా మంచి పేరు తెచ్చుకున్న ‘మక్కల్ సెల్వన్’ విజయ్ సేతుపతి మలయాళంలో నటించిన తొలి చిత్రమిది.

తెలుగు ప్రేక్షకుల ముందుకు ‘రేడియో మాధవ్’ గా ఈ సినిమాను తీసుకొస్తున్నారు, లక్ష్మీ చెన్నకేశవ ఫిలిమ్స్ అధినేత, నిర్మాత కృష్ణస్వామి. ఈ సినిమా తెలుగు వెర్షన్ ఫస్ట్‌లుక్‌ను బుధవారం హీరో శ్రీవిష్ణు విడుదల చేశారు.

అనంతరం ఆయన మాట్లాడుతూ.. ‘‘విజయ్ సేతుపతిగారు నటించిన ‘రేడియో మాధవ్’ తెలుగులో అనువాదం అవుతున్నందుకు చాలా సంతోషంగా ఉంది. దర్శక, నిర్మాతలకు ఆల్ ది బెస్ట్. ఈ సినిమా తప్పకుండా సక్సెస్ అవ్వాలని మనస్ఫూర్తిగా కోరుకుంటున్నాను’’ అన్నారు.

‘బిచ్చగాడు’ వంటి పలు డబ్బింగ్ సినిమాలకు తెలుగులో మాటలు, పాటలు రాసిన భాష్య శ్రీ ఈ చిత్రానికి డైలాగ్స్, లిరిక్స్ రాశారు. ఆయన మాట్లాడుతూ.. ‘‘తెలుగులో వెంకటేష్ గారు నటించిన ‘రాజా’, ‘సంక్రాంతి’ తరహా మ్యూజికల్ ఫ్యామిలీ ఎంటర్టైనర్ సినిమా ఇది. మలయాళంలో పెద్ద విజయం సాధించింది. తెలుగులోనూ మంచి విజయం సాధిస్తుందని ఆశిస్తున్నాను. ఎంజాయ్ చేస్తూ చేసిన డబ్బింగ్ సినిమా ఇది’’ అన్నారు.

నిర్మాత కృష్ణస్వామి మాట్లాడుతూ.. “మా సినిమా ఫస్ట్ లుక్ విడుదల చేసిన శ్రీవిష్ణు గారికి చాలా చాలా స్పెషల్ థ్యాంక్స్. మా సంస్థ రెండో చిత్రమిది. ఇంతకు ముందు దుల్కర్ సల్మాన్, సాయి పల్లవి నటించిన ‘హే పిల్లగాడ’ చిత్రాన్ని విడుదల చేశా. ఇప్పుడు ‘రేడియో మాధవ్’ మూవీని ప్రేక్షకుల ముందుకు తీసుకొస్తున్నాను. ఈ సినిమాలో విజయ్ సేతుపతి హీరోగా కనిపిస్తారు. తన నిజ జీవిత పాత్రలో ఆయన నటించారు. ‘భాగమతి’, ‘అల.. వైకుంఠపురం..’ చిత్రాలలో నటించిన జయరామ్ ఈ చిత్రంలో మిలటరీ నుంచి బయటకొచ్చి బ్యాంక్ సెక్యూరిటీ గార్డ్‌గా పనిచేస్తూ ఉండే పాత్ర పోషించారు. ఎఫ్.ఎం. రేడియో స్టేషన్ బ్యాక్ డ్రాప్‌లో నడిచే ప్రేమకథ ఈ ‘రేడియో మాధవ్’ చిత్రం’’ అన్నారు.

సహ నిర్మాత చలం మాట్లాడుతూ.. ‘‘కేరళ పచ్చటి అందాల మధ్య ఉన్న చంగనసేరి అనే చిన్న పట్టణంలో నడిచే చక్కటి సినిమా ‘రేడియో మాధవ్’. ఇందులో పాటలు చాలా బాగుంటాయి. థియేటర్ల పరిస్థితిని బట్టి విడుదలపై నిర్ణయం తీసుకుంటాం’’ అని చెప్పారు.