భరణంగా భర్త నుంచి రూ.12 కోట్లు, బీఎండబ్ల్యూ కారు, లగ్జరీ ఫ్లాట్ కావాలని చెప్పిన భార్య.. సుప్రీంకోర్టు ఎలా స్పందించిందంటే?

వివాహ బంధాన్ని కేవలం 18 నెలల్లో ముగించుకున్నప్పటికీ ఆమె పెద్ద మొత్తంలో కోరిన భరణం అందరినీ ఆశ్చర్యానికి గురి చేసింది.

సుప్రీంకోర్టు ఇటీవల ఓ చరిత్రాత్మక తీర్పు ఇస్తూ.. సమాజానికి, విడాకుల తర్వాత భరణాన్ని కోరే ఉద్యోగినులకు ఓ గొప్ప సందేశాన్నిఇచ్చింది. ఆర్థికంగా స్వతంత్రంగా జీవించే సామర్థ్యం ఉన్న మహిళలు, అధిక మొత్తంలో భర్త నుంచి భరణం కోరడం కన్నా, సొంతంగా సంపాదించుకోవాలని చెప్పింది.

హైప్రొఫైల్ కేసులో ఆశ్చర్యకరమైన డిమాండ్లు
సుప్రీంకోర్టు ఒక హైప్రొఫైల్ భరణం (Alimony) కేసు విచారణ సందర్భంగా ఈ వ్యాఖ్యలు చేసింది. ఎంబీఏ చదివిన ఓ యువతి ఐటీ ఉద్యోగం కూడా చేస్తోంది. ఒక యువకుడిని పెళ్లి చేసుకుంది. వారి వివాహ బంధం కేవలం 18 నెలల పాటు మాత్రమే కొనసాగింది. ఆ తర్వాత విడాకులు తీసుకోవాలనుకున్నారు.

దీంతో, తన భర్త నుంచి ముంబైలో ఖరీదైన అపార్ట్మెంట్, రూ.12 కోట్లు భరణం, విలాసవంతమైన బీఎండబ్ల్యూ కారును ఆమె భరణంగా కోరింది. ఆమె చేసిన ఈ డిమాండ్లు ఆశ్చర్యాన్ని కలిగించాయి.

ప్రధాన న్యాయమూర్తి ప్రశ్నలు, మహిళకు సూచనలు
ఈ కేసును భారత ప్రధాన న్యాయమూర్తి జస్టిస్ బీఆర్ గవాయి, న్యాయమూర్తులు జస్టిస్ కె.వినోద్ చంద్రన్, జస్టిస్ ఎన్వీ అంజారియాతో కూడిన బెంచ్ విచారించింది. విచారణ సమయంలో, ప్రధాన న్యాయమూర్తి ఆ మహిళ విద్యార్హతలు, వృత్తి అనుభవాన్ని ప్రస్తావిస్తూ.. “మీరు ఐటీ రంగంలో ఉన్నారు. ఎంబీఏ చేశారు. బెంగళూరు, హైదరాబాద్ లాంటి నగరాల్లో మీకు డిమాండ్ ఉంటుంది… మీరు ఎందుకు పని చేయకూడదు?” అంటూ సూటిగా ప్రశ్నించారు.

వివాహ బంధాన్ని కేవలం 18 నెలల్లో ముగించుకున్నప్పటికీ ఆమె కోరిన భరణం గురించి మాట్లాడుతూ.. “కేవలం 18 నెలలపాటే వివాహ బంధాన్ని కొనసాగించారు. మీరు ఇంత భరణం కోరుతున్నారా?” అంటూ ఆశ్చర్యం వ్యక్తం చేశారు. ఆర్థిక స్వాతంత్ర్యంతో జీవించగలిగే సామర్థ్యం ఉన్నప్పటికీ, ఈ స్థాయిలో ఆశించడం న్యాయసమ్మతమా అనే ప్రశ్నను కూడా లేవనెత్తారు.

దీనికి ఆమె తన భర్త ధనవంతుడని, మానసిక ఆరోగ్య సమస్యల (శిజోఫ్రేనియా వంటివి) ఆధారంగా వివాహ రద్దు కోసం దరఖాస్తు చేశారని సమాధానమిచ్చారు.

దీంతె కోర్టు చివరకు రెండు ఆప్షన్లను ఇచ్చింది. ఎటువంటి చట్టపరమైన చిక్కులు లేని అపార్ట్మెంట్‌ను భరణంగా తీసుకోండి లేదా రూ.4 కోట్లు ఒకేసారి పరిష్కారంగా తీసుకోండి అని అన్నారు.

“మీరు చదువుకున్నవారు. దయచేసి దీనితో (లభించిన ఆస్తి/డబ్బుతో) గౌరవంగా జీవించండి. ఎవరిపైనా  ఆధారపడకండి” అని CJI గవాయి ఆమెకు స్పష్టంగా చెప్పారు.