Courtesy BCCI
ముంబై ఇండియ‌న్స్ మాజీ కెప్టెన్ రోహిత్ శ‌ర్మ అరుదైన ఘ‌న‌త సాధించాడు. వాంఖ‌డే స్టేడియంలో 100 సిక్స్‌లు కొట్టిన తొలి ఆట‌గాడిగా చరిత్ర సృష్టించాడు. గురువారం స‌న్‌రైజ‌ర్స్ హైద‌రాబాద్‌తో జ‌రిగిన మ్యాచ్‌లో అత‌డు ఈ ఘ‌న‌త అందుకున్నాడు.
163 ప‌రుగుల ల‌క్ష్య ఛేద‌న‌లో ఓపెన‌ర్‌గా వ‌చ్చిన రోహిత్ శ‌ర్మ 16 బంతుల్లో 3 సిక్స‌ర్లు బాది 26 ప‌రుగులు సాధించాడు. అత‌డి స్ట్రైక్‌రేట్ 162.50గా ఉంది. ఈ క్ర‌మంలో అత‌డు వాంఖ‌డే స్టేడియంలో ఐపీఎల్‌లో 100 సిక్స్‌లు కొట్టిన ఆట‌గాడిగా చరిత్ర సృష్టించాడు. ఇక ఓవ‌రాల్ తీసుకుంటే ఒకే వేదిక‌పై ఐపీఎల్‌లో అత్య‌ధిక సిక్స్‌లు బాదిన నాలుగో ఆట‌గాడిగా రికార్డుల‌కు ఎక్కాడు.
𝟮𝟱𝟬* Sixes for MI ✅
𝟭𝟬𝟬* Sixes in #TATAIPL at Wankhede ✅𝐎𝐍𝐄 & 𝐎𝐍𝐋𝐘 𝐑𝐎𝐇𝐈𝐓 𝐒𝐇𝐀𝐑𝐌𝐀 🔥#MumbaiIndians #PlayLikeMumbai pic.twitter.com/xYhpdJNzD0
— Mumbai Indians (@mipaltan) April 17, 2025
ఈ జాబితాలో రాయ‌ల్స్ ఛాలెంజ‌ర్స్ బెంగళూరు మాజీ కెప్టెన్ విరాట్ అగ్ర‌స్థానంలో ఉన్నాడు. అత‌డు చిన్న‌స్వామి స్టేడియంలో 130 సిక్స్‌లు బాదాడు. ఆ త‌రువాత వ‌రుస‌గా క్రిస్గేల్, ఏబీ డివిలియర్స్ ఉన్నారు.
ఐపీఎల్‌లో ఒకే వేదిక‌పై అత్య‌ధిక సిక్స్‌లు కొట్టిన ఆట‌గాళ్లు వీరే..
* విరాట్ కోహ్లీ – చిన్న‌స్వామి స్టేడియంలో 130 సిక్స్‌లు
* క్రిస్గేల్ – చిన్న‌స్వామి స్టేడియంలో 127 సిక్స్‌లు
* ఏబీ డివిలియర్స్- చిన్న‌స్వామి స్టేడియంలో 118 సిక్స్‌లు
* రోహిత్ శ‌ర్మ – వాంఖ‌డే స్టేడియంలో 100 సిక్స్‌లు
* కీర‌న్ పొలార్డ్ – వాంఖ‌డే స్టేడియంలో 85 సిక్స్‌లు
ఈ మ్యాచ్‌లో తొలుత బ్యాటింగ్ చేసిన స‌న్‌రైజ‌ర్స్ హైద‌రాబాద్ నిర్ణీత 20 ఓవ‌ర్ల‌లో 5 వికెట్ల న‌ష్టానికి 162 ప‌రుగులు సాధించింది. అభిషేక్ శ‌ర్మ (40; 28 బంతుల్లో 7 ఫోర్లు), హెన్రిచ్ క్లాసెన్ (37; 28 బంతుల్లో 3 ఫోర్లు, 2 సిక్స‌ర్లు) లు రాణించారు. ముంబై బౌల‌ర్ల‌లో విల్ జాక్స్ రెండు వికెట్లు తీశాడు. ట్రెంట్ బౌల్ట్‌, బుమ్రా, పాండ్యాలు త‌లా ఓ వికెట్ ప‌డ‌గొట్టారు.
ల‌క్ష్యాన్ని ముంబై 18.1 ఓవ‌ర్ల‌లో 6 వికెట్లు కోల్పోయి ఛేదించింది. ముంబై బ్యాట‌ర్ల‌లో ర్యాన్ రికెల్టన్ (31; 23 బంతుల్లో 5 ఫోర్లు), విల్ జాక్స్ (36; 26 బంతుల్లో 3 ఫోర్లు, 2 సిక్స‌ర్లు), సూర్య‌కుమార్ యాద‌వ్ (26; 15 బంతుల్లో 2 ఫోర్లు, 2 సిక్స‌ర్లు), రోహిత్ శ‌ర్మ (26; 16 బంతుల్లో 3 సిక్స‌ర్లు) లు రాణించారు.
