T20 World Cup 2026 : దంచికొట్టిన మున్సే, మెక్ముల్లెన్.. స్కాట్లాండ్ భారీ స్కోరు.. ఇటలీ టార్గెట్ ఎంతంటే..?
టీ20 ప్రపంచకప్2026లో (T20 World Cup 2026) భాగంగా కోల్కతా వేదికగా జరుగుతున్న మ్యాచ్లో ఇటలీ ముందు స్కాట్లాండ్ భారీ స్కోరును ఉంచింది.
- Published By: Thota Vamshi Kumar ,Published On : February 9, 2026 / 12:40 PM IST
T20 World Cup 2026 Scotland 207 in 20 overs Italy target is 208
T20 World Cup 2026 : టీ20 ప్రపంచకప్ 2026లో భాగంగా కోల్కతాలోని ఈడెన్ గార్డెన్స్ వేదికగా స్కాట్లాండ్, ఇటలీ జట్లు తలపడుతున్నాయి. తొలుత బ్యాటింగ్ చేసిన స్కాట్లాండ్ నిర్ణీత 20 ఓవర్లలో 4 వికెట్ల నష్టానికి 207 పరుగులు చేసింది. దీంతో ఇటలీ ముందు 208 పరుగుల లక్ష్యం నిలిచింది.
స్కాట్లాండ్ బ్యాటర్లలో జార్జ్ మున్సే (84; 54 బంతుల్లో 13 ఫోర్లు, 2 సిక్సర్లు) మెరుపు హాఫ్ సెంచరీ చేశాడు. బ్రాండన్ మెక్ముల్లెన్ (41 నాటౌట్; 18 బంతుల్లో 4 సిక్సర్లు), మైఖేల్ జోన్స్ (37; 30 బంతుల్లో 1 ఫోర్, 2 సిక్సర్లు), మైఖేల్ లీస్క్ (22 నాటౌట్; 5 బంతుల్లో 2 ఫోర్లు, 2 సిక్సర్లు) వేగంగా ఆడారు. ఇటలీ బౌలర్లలో అలీ హసన్, గ్రాంట్ స్టీవర్ట్, థామస్ డ్రాకా, జెజె స్మట్స్ తలా ఓ వికెట్ సాధించారు.
ఈ మ్యాచ్లో టాస్ ఓడి బ్యాటింగ్ దిగిన స్కాట్లాండ్కు ఓపెనర్లు మున్సే, జోన్స్ శుభారంభాన్ని అందించారు. ఓ వైపు జోన్స్ నిలకడగా ఆడగా.. మరోవైపు మున్సే చెలరేగిపోయాడు. బౌండరీల మోత మోగించాడు. బెన్ మనేంటి బౌలింగ్లో సిక్స్ కొట్టి మున్సే 30 బంతుల్లో అర్థశతకాన్ని పూర్తి చేసుకున్నాడు. ఆ తరువాత కూడా అంతే ధాటిగా బ్యాటింగ్ కొనసాగించాడు. శతకానికి చేరువైన అతడిని గ్రాంట్ స్టీవర్ట్ బోల్తా కొట్టించాడు. హ్యారీ మానేంటి క్యాచ్ అందుకోవడంతో మున్సే పెవిలియన్కు చేరుకున్నాడు.
We have set a target of 208 against Italy!#T20WorldCup #FollowScotland #ChooseCricket pic.twitter.com/YuXZDAmvYf
— Cricket Scotland (@CricketScotland) February 9, 2026
కాగా.. మున్సే, జోన్స్ లు తొలి వికెట్కు 13.5 ఓవర్లలోనే 125 పరుగులు జోడించారు. ఆ మరుసటి ఓవర్లోనే మరో ఓపెనర్ జోన్స్ ఔట్ అయ్యాడు. దీంతో 136 పరుగుల వద్ద స్కాట్లాండ్ రెండో వికెట్ కోల్పోయింది. వన్డౌన్ బ్యాటర్ బ్రాండన్ మెక్ముల్లెన్ చెలరేగి ఆడగా, ఆఖరిలో మైఖేల్ లీస్క్ దంచికొట్టడంతో స్కాట్లాండ్ 200 పరుగుల స్కోరును దాటింది.
