ఇక ‘చోకర్స్’ కాదు ఛాంపియన్స్.. 27 ఏళ్ల కరువు తీర్చిన దక్షిణాఫ్రికా.. ఆ దేశమంతా సంబరాలు.. ఏ మీడియా ఏమంది?
"ఆస్ట్రేలియా ‘చోక్’ కామెంట్లకు దక్షిణాఫ్రికా దీటుగా సమాధానమిచ్చింది" అని The Sunday Independent కథనం రాసుకొచ్చింది.
- Published By: 10TV Digital Team ,Published On : June 15, 2025 / 05:10 PM IST
WTC 2025: SA Winning Celebrations
ఒక జనరేషన్ ఎదురుచూపు.. 27 ఏళ్ల సుదీర్ఘ ఐసీసీ ట్రోఫీ నిరీక్షణ.. కీలక మ్యాచ్‌లలో చేతులెత్తేస్తారంటూ హేళనలు.. ‘చోకర్స్’ అనే బాధాకరమైన ముద్ర. వీటన్నింటినీ ఒకే ఒక్క విజయంతో దక్షిణాఫ్రికా తుడిచిపెట్టేసింది. వరల్డ్ టెస్ట్ ఛాంపియన్‌షిప్ (WTC) ఫైనల్‌లో ఆస్ట్రేలియాను చిత్తు చేసి, టెంబా బవూమా సేన విశ్వవిజేతగా నిలిచిన విషయం తెలిసిందే. ఈ గెలుపుతో కేవలం ఒక ట్రోఫీని అందుకోవడం మాత్రమే కాదు.. తమ దేశ ఆత్మగౌరవ పతాకాన్ని దక్షిణాఫ్రికా జట్టు ఎగరవేసింది.
నోటికి కాదు, బ్యాట్‌కు పనిచెప్పారు!
ఫైనల్ సందర్భంగా ఆస్ట్రేలియా ఆటగాళ్లు దక్షిణాఫ్రికాను ‘చోకర్స్’ అంటూ స్లెడ్జింగ్‌కు దిగారు. కానీ, బవూమా సేన మాటలతో కాకుండా తమ ఆటతోనే సమాధానం చెప్పింది. ప్రత్యర్థి వ్యూహాలను చిత్తు చేస్తూ, అద్భుతమైన పట్టుదలతో ఐదు వికెట్ల తేడాతో చారిత్రక విజయాన్ని అందుకుంది.
ఈ గెలుపు వెనుక ఇద్దరి కీలక పాత్ర
టెంబా బవూమా (కెప్టెన్): హ్యామ్‌స్ట్రింగ్ గాయంతో పరిగెత్తడానికి నానా తంటాలు పడుతున్నా, కెప్టెన్ ముందుండి నడిపించాడు. 66 పరుగులతో కీలక భాగస్వామ్యం నెలకొల్పి, జట్టులో స్ఫూర్తిని నింపాడు.
ఏడెన్ మార్క్రమ్: ఒత్తిడిలో అద్భుత శతకంతో కదం తొక్కాడు. ఆస్ట్రేలియా బౌలర్లను దీటుగా ఎదుర్కొని, జట్టును విజయతీరాలకు చేర్చాడు.
దేశమంతా సంబరాలు.. మీడియా ప్రశంసల వర్షం
ఈ చారిత్రక విజయంతో దక్షిణాఫ్రికా మీడియా ఆనందంలో మునిగిపోయింది. ప్రశంసలతో పతాక శీర్షికలను ప్రచురించింది. ఏయే మీడియా ఏమని రాసింది?
Sunday Times: “ధైర్యం, అద్భుత ప్రదర్శన కలిసిన భాగస్వామ్యం దక్షిణాఫ్రికాను గెలిపించింది”
SuperSport: “27 ఏళ్ల నిరీక్షణకు ముగింపు.. దక్షిణాఫ్రికా క్రికెట్ చరిత్రలో కొత్త అధ్యాయం”
The Sunday Independent: “ఆస్ట్రేలియా ‘చోక్’ కామెంట్లకు దక్షిణాఫ్రికా దీటుగా సమాధానమిచ్చింది”
ఈ విజయంతో దక్షిణాఫ్రికా క్రికెట్‌లో ఒక సువర్ణాధ్యాయం మొదలైంది. ఇది కేవలం బవూమా సేన గెలుపు కాదు, జట్టులోని ఐక్యత, పట్టుదల, ఆత్మవిశ్వాసంతో ఆటగాళ్లు అందరూ సాధించిన విజయం. ఇకపై ప్రపంచ క్రికెట్‌లో ‘ప్రొటీస్’ను ఎవరూ తేలిగ్గా తీసుకోలేరు. ఎందుకంటే, వారు ఇక ‘చోకర్స్’ కాదు… ఛాంపియన్స్!
