Vinod Kambli: వినోద్ కాంబ్లీకి బ్రెయిన్ స్ట్రోక్ వచ్చే ప్రమాదం.. రంగంలోకి సచిన్ సహా మాజీ క్రికెటర్లు.. ఆర్థిక సాయం కోరుతూ వాట్సాప్ గ్రూప్..

సుమారు 18 నెలల క్రితం ముంబైలో రమాకాంత్ ఆచ్రేకర్ స్మారక చిహ్నం ఆవిష్కరణ కార్యక్రమంలో కాంబ్లీ బహిరంగంగా కనిపించినప్పుడు ఆయన ఆరోగ్య పరిస్థితిపై తీవ్ర ఆందోళనలు వ్యక్తమయ్యాయి.

Vinod Kambli: వినోద్ కాంబ్లీ కోసం మాజీ క్రికెటర్లు రంగంలోకి దిగారు. ఆర్థిక సాయం కోసం వాట్సాప్ గ్రూప్ క్రియేట్ చేశారు. సాయం చేసే వారిలో క్రికెట్ గాడ్ సచిన్ టెండూల్కర్ సైతం ఉన్నారు.

వినోద్ కాంబ్లీ ప్రస్తుతం బాగా నడవగలుగుతున్నారు, కానీ ఆయన జ్ఞాపకశక్తి బలహీనంగానే ఉందని వినోద్ కాంబ్లీ స్నేహితుడు మార్కస్ కౌటో తెలిపారు. ఈ మాజీ భారత బ్యాటర్‌కు విషయాలు ముక్కలు ముక్కలుగా మాత్రమే గుర్తుకు వస్తున్నాయన్నారు. అదృష్టవశాత్తూ ఆయన ఆరోగ్యం క్షీణించలేదన్నారు. అయినప్పటికీ ఆయన ఇంకా పూర్తిగా ప్రమాదం నుండి బయటపడలేదని వెల్లడించారు.

కాంబ్లీ మద్యం సేవించడం మానేశారు, కానీ ఆయన మనసు పూర్తిగా సహకరించకపోవడంతో, పొగ తాగకూడదనే విషయాన్ని అప్పుడప్పుడు మర్చిపోతున్నారని తెలిపారు. దీనివల్ల ఇప్పుడు ఆయనకు బ్రెయిన్ స్ట్రోక్ వచ్చే ప్రమాదం ఏర్పడిందన్నారు. థానేలోని ఒక ప్రైవేట్ ఆసుపత్రిలో చికిత్స అవసరమైన మూత్రనాళ ఇన్ఫెక్షన్ నుండి కోలుకున్న ఒక సంవత్సరం తర్వాత 54 ఏళ్ల కాంబ్లీ క్రమంగా కోలుకుంటున్నారు.

సుమారు 18 నెలల క్రితం ముంబైలో రమాకాంత్ ఆచ్రేకర్ స్మారక చిహ్నం ఆవిష్కరణ కార్యక్రమంలో కాంబ్లీ బహిరంగంగా కనిపించినప్పుడు ఆయన ఆరోగ్య పరిస్థితిపై తీవ్ర ఆందోళనలు వ్యక్తమయ్యాయి. కాంబ్లీ తన స్నేహితుడు సచిన్ టెండూల్కర్ చేతిని పట్టుకుని, నిలబడటానికి నడవడానికి కూడా ఇబ్బంది పడుతూ అస్థిరంగా కనిపించారు. వినోద్ ఆరోగ్య పరిస్థితి బాగోలేదని గ్రహించిన వెంటనే మద్దతుగా నిలిచారు. క్రికెట్ దిగ్గజాలు సునీల్ గవాస్కర్, కపిల్ దేవ్ వంటి వారు వినోద్ పునరావాసానికి మద్దతివ్వడానికి ముందుకొచ్చారు. వారు చేసిన సాయం కాంబ్లీ తిరిగి కోలుకోవడానికి దోహదపడినప్పటికీ, ఆయన పరిస్థితి ఇంకా అస్థిరంగానే ఉంది.

“నేను వినోద్ స్నేహితులతో వారిలో చాలామంది క్రికెటర్లు ఒక వాట్సాప్ గ్రూప్ ఏర్పాటు చేశాను. వారు ఆర్థికంగా చాలా సాయం చేస్తున్నారు. వినోద్ జ్ఞాపకశక్తి అంత బాగోలేదు. కానీ గత ఆరు నెలలుగా అది మరింత క్షీణించలేదు. వినోద్ కి చాలా విషయాలు గుర్తుండవు, కానీ ఏదైనా విషయం స్ఫురిస్తే మాత్రం గుర్తుకొస్తుంది. లేకపోతే గుర్తుకురావడం కష్టమవుతుంది. వినోద్ మెదడులో రక్తం గడ్డ కట్టింది. ఆయన ముందుగా జాగ్రత్తలు తీసుకోకపోవడం వల్ల దానిని తొలగించడం సాధ్యపడలేదు. ఆయనకు బ్రెయిన్ స్ట్రోక్ వచ్చే అవకాశం ఉందని డాక్టర్ చెప్పారు” అని వినోద్ కాంబ్లీ మంచి స్నేహితుడు, మాజీ బీసీసీఐ అంపైర్ మార్కస్ కౌటో తెలిపారు.