WhatsApp View Once : వాట్సాప్ డెస్క్టాప్లో ‘వ్యూ వన్స్‘ ఫీచర్ మళ్లీ వస్తోంది.. ఫొటోలు, వీడియోలను స్టోర్ చేయడం కుదరదు!
WhatsApp View Once : వాట్సాప్ డెస్క్టాప్ యూజర్ల కోసం ‘వ్యూ వన్స్’ మళ్లీ తీసుకొస్తోంది. ఈ ఫీచర్ ద్వారా వీడియోలు, ఫోటోలను పంపుకోవచ్చు. యూజర్ ప్రైవసీ కోసం కంపెనీ మరిన్ని కొత్త ఫీచర్లను అభివృద్ధి చేస్తోంది.
WhatsApp View Once : ప్రముఖ మెసేజింగ్ యాప్ వాట్సాప్ డెస్క్టాప్ యూజర్ల కోసం ‘వ్యూ వన్స్’ ఫీచర్ మళ్లీ ప్రవేశపెడుతోంది. గత ఏడాదిలో మెటా యాజమాన్యంలోని ఇన్స్టంట్ మెసేజింగ్ యాప్ వెబ్ వెర్షన్ నుంచి ‘వ్యూ వన్స్’ ఫొటోలు, వీడియోలను పంపే సామర్థ్యాన్ని తొలగించింది. ఈ నిర్ణయంతో కొంతమంది యూజర్ల నుంచి తీవ్ర స్థాయిలో విమర్శలను ఎదుర్కొంది. దాంతో, వాట్సాప్ ఇప్పుడు ఈ నిర్ణయాన్ని ఉపసంహరించుకుంది. యూజర్ల ప్రైవసీని మరింత మెరుగుపరచడానికి వ్యూ వన్స్ ఫీచర్ ప్రాముఖ్యతను గుర్తించింది.
స్నాప్చాట్ యూజర్ల మాదిరిగానే.. వాట్సాప్ వ్యూ వన్స్ ఫీచర్ యూజర్లకు రిసీవర్ గ్యాలరీలో సేవ్ చేయకుండానే తాత్కాలిక మీడియాను పంపేందుకు అనుమతిస్తుంది. ఈ ఫీచర్ సున్నితమైన లేదా ప్రైవసీ సమాచారాన్ని షేర్ చేసేందుకు ప్రత్యేకంగా సాయపడుతుంది. ఎందుకంటే.. ఈ ఫీచర్ మీడియాను పరిమిత సమయం వరకు మాత్రమే యాక్సెస్ చేయగలదు. రిసీవర్ డివైజ్లో శాశ్వతంగా స్టోర్ చేయడానికి వీలుండదు.
టెంపరరీ మీడియాను పంపుకోవచ్చు :
వాట్సాప్ ట్రాకర్ (Wabetainfo) ప్రకారం.. వాట్సాప్ ఇప్పుడు విండోస్, మ్యాక్ఓఎస్ రెండింటి కోసం డెస్క్టాప్ అప్లికేషన్లలో ఫొటోలు, వీడియోల కోసం వ్యూ వన్స్ ఫీచర్ని మళ్లీ తీసుకొస్తోంది. పంపిన మీడియా ఫైళ్లను రిసీవర్ ఒకసారి చూసిన తర్వాత అదృశ్యమయ్యే తాత్కాలిక మీడియాను పంపడానికి ఈ ఫీచర్ వినియోగదారులను అనుమతిస్తుంది. విండోస్ కోసం వాట్సాప్లో డ్రాయింగ్ ఎడిటర్ క్యాప్షన్ బార్లో యూజర్ ప్రైవసీ కోసం ఈ ఫీచర్ యాక్టివేట్ అవుతుంది. అదనంగా, ఈ ఫీచర్ని మ్యాక్ఓఎస్, లింక్ చేసిన డివైజ్లలో యూజర్లు యాక్సెస్ చేయవచ్చు.
14 రోజుల్లో చాట్ నుంచి అదృశ్యమవుతుంది :
‘వ్యూ వన్స్’ ఫీచర్ని ఉపయోగిస్తున్నప్పుడు.. పంపిన ఫొటోలు, వీడియోలను ఫార్వార్డ్ చేయడం, సేవ్ చేయడం, స్టార్ లేబుల్ చేయడం లేదా షేర్ చేయడం సాధ్యపడదు. రిసీవర్ వ్యూ వన్స్ ఫీచర్ ద్వారా ఫొటో లేదా వీడియోని ఓపెన్ చేశారా లేదా అనేది తెలియాలంటే.. రిసీవర్ రీడ్ రిసిప్ట్లను ఎనేబుల్ చేసి ఉంటే మాత్రమే తెలుసుకోగలరు. రిసీవర్ ఫొటో లేదా వీడియోను పంపిన 14 రోజులలోపు ఓపెన్ చేయకపోతే మీడియా ఆటోమాటిక్గా చాట్ నుంచి అదృశ్యమవుతుంది.
యూజర్లు తమ ఫొటోలను పంపే ప్రతిసారీ స్పష్టంగా ‘వ్యూ వన్స్’ ఆప్షన్ ఎంచుకోవడం తప్పనిసరి. ఈ ఫీచర్ ద్వారా పంపిన కంటెంట్ కేవలం సింగిల్ వ్యూ మాత్రమే పనిచేస్తుంది. దాన్ని సేవ్ చేయడం, ఫార్వార్డ్ చేయడం లేదా షేర్ చేయడం సాధ్యపడదు. యూజర్ అందుకున్న తర్వాత అది చాట్ నుంచి వెంటనే అదృశ్యమవుతుంది. ఆ తర్వాత రిసీవర్ దాన్ని యాక్సస్ చేయలేరు. బ్యాకప్లలో మీడియా స్టోర్ చేయలేరు. మళ్లీ రీస్టోర్ చేయలేరు. అంతేకాకుండా, రిసీవర్ వ్యూ వన్స్ ద్వారా పంపిన ఫొటో లేదా వీడియో స్క్రీన్షాట్ను క్యాప్చర్ చేసారో లేదో పంపినవారు గుర్తించలేరని గమనించాలి.
చాట్లో యూజర్ ప్రొఫైల్ ఫీచర్ :
వాట్సాప్ ఆండ్రాయిడ్ డివైజ్లలో చాట్స్లో యూజర్ ప్రొఫైల్ సమాచారాన్ని ప్రదర్శించే కొత్త ఫీచర్ను కూడా అభివృద్ధి చేస్తోంది. ఇది కాంటాక్టు ఆఫ్లైన్లో ఉన్నప్పుడు కూడా ఈ ప్రొఫైల్ డేటా కనిపిస్తుంది. అదేవిధంగా అందుబాటులో ఉంటే ‘లాస్ట్ సీన్’ టైమ్స్టాంప్ స్థానంలో కనిపిస్తుంది. చాట్ సమాచార స్క్రీన్కి నావిగేట్ చేయడానికి బదులుగా వినియోగదారులు ఇప్పుడు చాట్లోని ప్రొఫైల్ సమాచారాన్ని త్వరగా చూడవచ్చు.
ఎవరైనా ఆఫ్లైన్లో ఉన్నప్పటికీ వారి ప్రొఫైల్ సమాచారాన్ని చూడటానికి అనుకూలమైన మార్గం. అదనంగా, వినియోగదారులు ఇటీవల వారి ప్రొఫైల్ సమాచారాన్ని అప్డేట్ చేసిన సందర్భంలో కొత్త ఫీచర్ విజిబిలిటీని కూడా మెరుగుపరుస్తుంది. చాట్లో ఉన్న ఇతర యూజర్లు ఏవైనా మార్పులు ఉన్నాయో లేదో తక్షణమే తెలుసుకోవచ్చు. ఉదాహరణకు, ఎవరైనా వారి ప్రొఫైల్ ఫొటోను మార్చినట్లయితే వారి కొత్త ఫొటో చాట్ సంభాషణలో ఇతరులకు వెంటనే కనిపిస్తుంది.
కొత్త వాయిస్ చాట్ ఫీచర్ :
వాట్సాప్ కొత్త వాయిస్ చాట్ ఫీచర్ను కూడా ప్రవేశపెడుతోంది. ప్లాట్ఫారమ్లోని పెద్ద గ్రూపులతో కనెక్ట్ అయ్యేందుకు అనుమతిస్తుంది. గ్రూప్లో మెసేజ్ చేయగలిగేటప్పుడు గ్రూప్ చాట్లోని సభ్యులతో తక్షణమే కనిపించడానికి వాయిస్ చాట్లు అనుమతిస్తాయి. మీరు వాయిస్ చాట్ని పంపిన తర్వాత గ్రూప్ సభ్యులు కాల్కు బదులుగా పుష్ నోటిఫికేషన్ను అందుకుంటారు. వాయిస్ చాట్ ట్యాప్ చేసేందుకు ఇన్-చాట్ బబుల్ కూడా ఉంటుంది. కొత్త ప్రొఫైల్ ఇన్ఫర్మేషన్ ఫీచర్, వాయిస్ చాట్ ఫీచర్ రెండూ డెవలప్ స్టేజీలో ఉన్నాయి. రాబోయే కొత్త అప్డేట్లో ఫీచర్లు అందుబాటులో ఉండనున్నాయి.
Read Also : Whatsapp Chat Backup : మీ వాట్సాప్ చాట్ స్టోరేజీకి పేమెంట్ చేయడం లేదా? వెంటనే ఈ సెట్టింగ్ని మార్చండి!