న్యూ ఇయర్ వేళ.. ఈ పనులు చేశారో అంతే సంగతి

వాహనాల్లో అధిక సౌండ్​తో మ్యూజిక్​ ప్లే చేయకూడదని పోలీసులు హెచ్చరించారు.

Cyberabad Traffic Police: న్యూ ఇయర్ దృష్ట్యా సైబరాబాద్ ట్రాఫిక్ పోలీసులు క్యాబ్ ఆపరేటర్లు, సాధారణ ప్రజలు, పబ్ యజమానులకు కీలక సూచనలు జారీ చేశారు. క్యాబ్ డ్రైవర్లు, ఆటో రిక్షా డ్రైవర్లు సరైన యూనిఫాం ధరించి అన్ని పత్రాలు వెంట ఉంచుకోవాలని పోలీసులు తెలిపారు. నిబంధనలు ఉల్లంఘిస్తే చలాన్ విధిస్తామని తెలిపారు. అధిక ఛార్జీలు వసూలు చేయవద్దని సూచించారు.

బార్, పబ్, క్లబ్‌ వంటివాటికి వచ్చే కస్టమర్లు మద్యం మత్తులో వాహనాలు నడపకుండా వాటి యజమానులు ప్రత్యామ్నాయ ఏర్పాట్లు చేయాలన్నారు. లేదంటే, బార్, పబ్, క్లబ్ యజమానులపై కఠిన చర్యలు తీసుకుంటామని పోలీసులు చెప్పారు. నేరానికి ప్రోత్సాహం ఇచ్చినట్టు కేసులు నమోదు చేస్తామని వివరించారు.

Also Read: జేఈఈ అడ్వాన్స్‌డ్ 2026 షెడ్యూల్ వచ్చేసింది.. ఫుల్‌ డీటెయిల్స్‌ ఇవే..

రాంగ్‌ రూట్ డ్రైవింగ్, అనధికార పార్కింగ్, అధిక వేగం, సిగ్నల్ జంపింగ్, నిర్లక్ష్య డ్రైవింగ్, హెల్మెట్ లేకుండా వాహనం నడపడం వంటివాటిని గుర్తించేందుకు ప్రత్యేక కెమెరాలు ఏర్పాటు చేసినట్టు ట్రాఫిక్ పోలీసులు తెలిపారు. ఈ కెమెరాల ద్వారా ఉల్లంఘనలు గుర్తించి కఠిన చర్యలు తీసుకుంటామని చెప్పారు.

సైబరాబాద్ పరిధిలోని అన్ని రహదారులపై రాత్రి 8 గంటల నుంచి తనిఖీలు విస్తృతంగా నిర్వహిస్తామని తెలిపారు. పత్రాలు చూపించని వాహనాలను తాత్కాలిక భద్రతా కస్టడీకి తరలిస్తామని వివరించారు. ఎవరైనా అసభ్య ప్రవర్తనకు పాల్పడినా చట్టప్రకారం కఠిన చర్యలు తప్పవని ట్రాఫిక్ పోలీసులు హెచ్చరించారు.

ఎవరైనా బుక్​చేసిన రైడ్​ను క్యాబ్, టాక్సీ, ఆటో రిక్షా డ్రైవర్లు రద్దు​ చేయకూడదని అన్నారు. ఎవరికైనా ఇలాంటి ఇబ్బందులు ఎదురైతే వాహన వివరాలతో 9490617346 వాట్సాప్ ​నంబర్​కు ఫిర్యాదు చేయాలని చెప్పారు. మైనర్లు డ్రైవింగ్ చేస్తూ దొరికినా చర్యలు తీసుకుంటామని తెలిపారు. వాహనాల్లో అధిక సౌండ్​తో మ్యూజిక్​ ప్లే చేయకూడదని హెచ్చరించారు.