Indiramma Sarees: ఇందిరమ్మ చీరల పంపిణీకి బ్రేక్.. కారణం ఇదే..
మొత్తం కోటి చీరలను పంపిణీ చేయాలని సర్కార్ టార్గెట్ పెట్టుకుంది.
- Published By: 10TV Digital Team ,Published On : November 29, 2025 / 08:23 PM IST
Indiramma Sarees: తెలంగాణలో ఇందిరమ్మ చీరల పంపిణీకి బ్రేక్ పడింది. స్థానిక ఎన్నికల కోడ్ నేపథ్యంలో ఇందిరమ్మ చీరల పంపిణీని ఎన్నికల సంఘం అధికారులు నిలిపివేశారు. ఈ నెల 19వ తేదీ నుంచి ఇప్పటివరకు 44 లక్షల చీరలను పంపిణీ చేసింది ప్రభుత్వం. మొత్తం కోటి చీరలను పంపిణీ చేయాలని సర్కార్ టార్గెట్ పెట్టుకుంది.
తెలంగాణలో గ్రామ పంచాయతీ ఎన్నికల వాడి మొదలైంది. నోటిఫికేషన్ విడుదలై నామినేషన్లు కూడా స్వీకరిస్తున్నారు. మూడు విడతలుగా ఎన్నికలు జరగనున్నాయి. తొలి విడత డిసెంబర్ 11న, 14న రెండో విడత, 17న మూడో విడత ఎన్నికలు జరగనున్నాయి. లోకల్ బాడీ ఎన్నికలకు అన్ని పార్టీలు తమ తమ వ్యూహాలు, ప్రణాళికలు సిద్ధం చేసుకుంటున్నాయి.
మాజీ ప్రధాని ఇందిరా గాంధీ జయంతిని పురస్కరించుకుని చీరల పంపిణీ పథకాన్ని ప్రారంభించింది ప్రభుత్వం. తొలి దశలో గ్రామీణ ప్రాంతాల్లో చీరల పంపిణీ ప్రక్రియను పూర్తి చేయాలని ఆదేశించారు. రెండో దశలో మార్చి 1 నుంచి అంతర్జాతీయ మహిళా దినోత్సవం మార్చి 8 వరకు పట్టణ ప్రాంతాల్లో అందజేయాలన్నారు. మహిళా సంఘాల సభ్యులకే కాకుండా అర్హులైన ప్రతి మహిళకు ఇందిరమ్మ చీర అందించాలని సీఎం రేవంత్ ఆదేశించారు. చీరల నాణ్యత విషయంలో ఎట్టి పరిస్థితుల్లోనూ రాజీపడొద్దని తేల్చి చెప్పారు. మహిళా సంఘాల సభ్యులు ఇంటింటికీ వెళ్లి మహిళలకు బొట్టు పెట్టి మరీ గౌరవంగా చీరలను పంపిణీ చేయనున్నారు.
18 ఏళ్లు దాటిటి మహిళలందరికీ ఈ పథకం కింద చీరలు అందిస్తారు. చీరలు తీసుకునే మహిళలు తప్పనిసరిగా తమ ఆధార్ కార్డు చూపించాలి. పెన్షనర్ల ముఖ గుర్తింపు కోసం వినియోగిస్తున్న మొబైల్ అప్లికేషన్‌ను ఈ పంపిణీలోనూ వినియోగించనున్నారు. చీరను అందుకున్నట్టుగా మహిళ ఫొటోను యాప్‌లో తప్పనిసరిగా తీసుకోవాలి. సభ్యులకు వారి ఆధార్ నంబర్‌తో యాప్‌లో ఫొటో తీసుకున్న తర్వాతే చీరలను అందజేస్తారు. మహిళా సంఘాల్లో సభ్యులు కాని వారు ఎవరైనా చీర తీసుకోవాలనుకుంటే.. వారికి తక్షణమే సభ్యత్వాన్ని నమోదు చేసిన తర్వాతే పంపిణీ చేయాలి.
