Viral News: వధువుకి పాలపీక గిఫ్ట్.. వ్యవహారం తేడా కొట్టేసింది!

Viral News: పెళ్ళిలో భాజాభజంత్రీలు.. విందు భోజనాలు కాదు.. కాసింత వినోదం కూడా కావాలని కోరుకొనే రోజులివి. అందుకే నవవధువు స్నేహితులు, బంధువులు కొందరు పెళ్లింట సందడి చేస్తూ ఎంటర్ టైన్ చేస్తుంటారు. అయితే.. అవే ఒక్కోసారి శృతిమించి తిప్పలు తెచ్చిపెడతుంటాయి. మరికొన్నిసార్లు వివాదాస్పదం కూడా అవుతుంటాయి. ముఖ్యంగా పెళ్లి కుమార్తె, పెళ్లి కుమారుడి స్నేహితులు దగ్గరే ఎక్కువగా ఈ తరహా వివాదాలు అవుతుంటాయి.

వివాదం అనలేం కానీ.. పెళ్లి కుమారుడి స్నేహితులు చేసిన పని ఆ నవవధువుకి ఆగ్రహం తెప్పించింది. దీంతో వాళ్ళు ఇచ్చిన ఆ సర్‌ప్రైజ్‌ గిఫ్ట్‌ను కాస్త ఆ వధువు నేలకేసి కొట్టింది. వధూవరులిద్దరూ పెళ్లి వేదికపై కూర్చొని ఉండగా అక్కడకు పెళ్లి కొడుకు స్నేహితులు వచ్చి నూతన జంటకు శుభాకాంక్షలు తెలిపి వధువుకి ప్యాక్‌ చేసి ఉన్న ఓ గిఫ్ట్‌ను అందించారు. ఆ వధువు గిఫ్ట్‌ను అక్కడే తెరిచి చూడగా అందులో చిన్న పిల్లలకు పాలు తాగించే డబ్బా, పీక ఉన్నాయి.

అసలు అప్పటికే చిరాకుతో ఉందో ఏమో కానీ ఆ వధువు ఆ గిఫ్ట్ చూడగానే కోపంతో నేలకేసి కొట్టింది. పెళ్లి కుమార్తె చేసిన పనికి వరుడి స్నేహితులు నొచ్చుకుంటారని అక్కడే ఉన్న మరో మహిళ ఆ పాలడబ్బాను లాగేసుకుంది. ఇది ఎక్కడ జరిగిందో ఏమో తెలియదు కానీ బంటి ఠాగూర్‌ అనే వ్యక్తి ఈ వీడియోను ఫేస్బు‌క్‌లో పోస్టు చేయగా సోషల్ మీడియాలో వైరల్‌గా మారింది. సరదానే అయినా ఎదుటివారికి అసహనం తెప్పించకూడదంటూ కొందరు నెటిజన్లు హితవు పలుకుతున్నారు.