Thailand : నీటిలోంచి ఎగిరి వచ్చి జాలరి గొంతులో ఇరుక్కుపోయిన చేప..

Fish jumped out of water into man throat : చేపలు పట్టుకోవటానికి వెళ్లిన ఓ జాలరికి ఓ చేప చుక్కలు చూపించింది. ప్రాణంమీదకు తెచ్చింది. నీటిలోంచి ఎగిరి వచ్చిన ఓ చేప జాలరి గొంతులోకి వెళ్లి అక్కడనుంచి బయటకు రాలేక అక్కడే చిక్కుకుపోయింది. దీంతో ఆ చేప పరిస్థితి ఏమోగానీ పాపం ఆ జాలరి పరిస్థితి మాత్రం విషమంగా మారింది. గొంతులోకి చిక్కుకుపోయిన చేప వల్ల ఊపిరి ఆడక నానా పాట్లు పడ్డాడు పాపం.

థాయ్‌లాండ్‌లో మే 22న పట్టాలంగ్‌ రాష్ట్రంలో జరిగిన ఈ ఘటనలో సదరు జాలరి పాపం స్థానికుల సహాయంతో ఎట్టకేలకు బతికి బయటపడ్డాడు.సముద్రంలో స్పియర్‌ ఫిషింగుకు ఓ జాలరికి ఈ అవస్థ వచ్చి పడింది. ‘అనాబస్‌’ అని పిలిచే అయిదంగుళాల స్పైకీ ఫిష్‌ నీటిలో నుంచి ఎగిరి నేరుగా జాలరి గొంతులోకి దూరిపోయింది. ఆ తర్వాత ఆ చేప కదిలి కదిలి జాలరి ముక్కులో నుంచి బయటకు వచ్చేందుకు ప్రయత్నించి గొంతు, నాసికారంధ్రాల మధ్యలో ఇరుక్కుపోయింది. ఊపిరాడక విలవిల్లాడుతున్న అతణ్ని చుట్టుపక్కల ఉన్నవారు గమనించి ఆస్పత్రికి తరలించారు. ఎక్స్‌రేలో చేపను గుర్తించిన వైద్యులు జాగ్రత్తగా వెలికితీసి, అతడి ప్రాణాలు కాపాడారు.