Khosta-2 Virus : మానవాళికి మరో ముప్పు? గబ్బిలాల నుంచి కొత్త వైరస్.. కరోనా కన్నా డేంజరస్..!

మరో ప్రాణాంతక వైరస్ ను అమెరికా సైంటిస్టులు గుర్తించారు. ఖోస్తా-2 గా పిలిచే ఈ వైరస్ రష్యా గబ్బిలాల్లో కనుగొన్నారు. ఖోస్తా-2 వైరస్ కరోనా కంటే ప్రమాదకరం అని హెచ్చరించారు సైంటిస్టులు.

Khosta-2 Virus : మానవాళికి మరో ముప్పు? గబ్బిలాల నుంచి కొత్త వైరస్.. కరోనా కన్నా డేంజరస్..!

Khosta-2 Virus : కరోనావైరస్ మహమ్మారి యావత్ ప్రపంచాన్ని గడగడలాడించింది. కోట్ల మందిపై ప్రభావం చూపింది. ఎంతో మందిని బలితీసుకుంది. ఒకానొక సమయంలో కొవిడ్ మహమ్మారి మానవాళికే ముప్పుగా పరిణమించింది. ఆ తర్వాత వ్యాక్సిన్లు అందుబాటులోకి రావడంతో కరోనావైరస్ ను కట్టడి చేయగలిగాం.

ఇప్పుడిప్పుడే కొవిడ్ మహమ్మారి సృష్టించిన విలయం నుంచి యావత్ ప్రపంచం కోలుకోంటోంది. ప్రజలు ఊపిరిపీల్చుకుంటున్నారు. ఇంతలోనే మరో షాకింగ్ న్యూస్ వెలుగులోకి వచ్చింది. మరో కొత్త వైరస్ ను గుర్తించారు శాస్త్రవేత్తలు. అదే ఖోస్తా-2 వైరస్.

మరో ప్రాణాంతక వైరస్ ను అమెరికా సైంటిస్టులు గుర్తించారు. ఖోస్తా-2 గా పిలిచే ఈ వైరస్ రష్యా గబ్బిలాల్లో కనుగొన్నారు. ఈ కొత్త వైరస్ గబ్బిలాల నుంచి మనుషులకు వ్యాపిస్తున్నట్లు తేల్చారు. ఇది కూడా కొవిడ్ లాంటి వైరస్ అని చెప్పారు. కరోనా తరహాలోనే ఇది కూడా మనిషి కణాల్లోకి ప్రవేశిస్తుందని చెప్పారు.

ఖోస్తా-2 వైరస్ కరోనా కంటే ప్రమాదకరం అని హెచ్చరించారు సైంటిస్టులు. ఇది కరోనా వైరస్ లోని ఉపవర్గానికి చెందినది. మరో షాకింగ్ విషయం ఏంటంటే.. ఈ కొత్త వైరస్ పై.. ప్రస్తుతం అందుబాటులో ఉన్న టీకాలేవీ ఎలాంటి ప్రభావం చూపడం లేదని పరిశోధకులు గుర్తించారు. ఈ వైరస్ నియంత్రణకు వ్యాక్సిన్లు కూడా అందుబాటులో లేవని సైంటిస్టులు చెప్పడం మరింత భయాందోళనకు గురి చేస్తోంది.

కోవిడ్-19కు కారణమయ్యే సార్స్ కోవ్-2 వైరస్ యాంటీబాడీలకు ఇది నిరోధకతను కలిగి ఉందని ప్లాస్ పాథోజెన్స్ అనే జర్నల్‌లో ప్రచురితమైన పరిశోధనాంశాలు వెల్లడించాయి. ఈ వైరస్ తొలిసారిగా 2020 చివర్లో రష్యాలోని గబ్బిలాల్లో గుర్తించారు. కానీ అది మనుషులకు ప్రమాదకరం అవుతుందని భావించలేదు. ఆ తర్వాత శాస్త్రవేత్తలు నిర్వహించిన పరిశోధనల్లో ఆ వైరస్ మనుషులకు సంక్రమిస్తుందని.. ప్రజారోగ్యానికి ముప్పుగా పరిణమించే ప్రమాదం ఉందని తేలింది.

కరోనాకు కారణమయ్యే సార్స్ కోవ్-2తో పాటు ఈ ఖోస్తా-2 వైరస్‌లు సార్బ్‌కో వైరస్ రకానికి చెందినవి. ఇవి కొత్త రకం స్ట్రెయిన్‌లను ఏర్పరిచే సామర్థ్యాన్ని కలిగి ఉంటాయి. రష్యాలో ఈ ఖోస్తా వైరస్‌ను గుర్తించిన సమయంలో ఖోస్తా-1, ఖోస్తా-2 అనే రెండు రకాలను పరిశోధకులు గుర్తించారు. ఖోస్తా-1 రకం వైరస్ మనుషులకు సంక్రమించదు. కానీ కోవిడ్ వైరస్ తరహాలోనే ప్రొటీన్‌ను ఉపయోగించుకొని మనుషులకు సంక్రమిస్తుందని తేల్చారు. మానవ శరీర కణాల్లోని గ్రాహకాల ద్వారా ఇవి కణాల్లోకి ప్రవేశిస్తున్నాయని పరిశోధకులు గుర్తించారు.

గబ్బిలాలు, పాంగోలిన్లు, రక్కూన్ శునకాలు, పామ్ సివెట్ల ద్వారా ఖోస్తా-2 వైరస్ వ్యాప్తి చెందుతుంది. కాగా.. ఈ కొత్త వైరస్ ఖోస్తా-2.. కరోనా తరహాలో మానవాళికి ప్రమాదకరంగా పరిణమిస్తుందా అనేది ఇప్పుడే చెప్పలేమంటున్నారు సైంటిస్టులు.