Indian 2: కోర్టులో ‘ఇండియన్ 2’.. మరో సినిమాకు వెళ్లనున్న కమల్?

దక్షణాది గ్రేట్ దర్శకులలో ఒకరైన శంకర్ సినిమా ఇండియన్ 2 ప్రస్తుతం కోర్టులో ఉంది. ఇండియన్ 2 పూర్తిచేయకుండానే దర్శకుడు శంకర్ మరో సినిమాకు ఎలా సిద్దమవుతారని లైకా ప్రొడక్షన్ హైకోర్టులో పిటిషన్ దాఖలు చేయడం.. కోర్టు సామరస్యంగా పరిష్కరించుకోవాలని సమయం ఇచ్చినా ప్రస్తుతం ఇంకా వివాదం కొలిక్కి రాలేదు

Indian 2: దక్షణాది గ్రేట్ దర్శకులలో ఒకరైన శంకర్ సినిమా ఇండియన్ 2 ప్రస్తుతం కోర్టులో ఉంది. ఇండియన్ 2 పూర్తిచేయకుండానే దర్శకుడు శంకర్ మరో సినిమాకు ఎలా సిద్దమవుతారని లైకా ప్రొడక్షన్ హైకోర్టులో పిటిషన్ దాఖలు చేయడం.. కోర్టు సామరస్యంగా పరిష్కరించుకోవాలని సమయం ఇచ్చినా ప్రస్తుతం ఇంకా వివాదం కొలిక్కి రాలేదు. అయితే.. దర్శకుడు శంకర్ మాత్రం రామ్ చరణ్ తో ఓ పాన్ ఇండియా సినిమాను.. అపరిచితుడును హిందీలో రీమేక్ చేసే మరో ప్రాజెక్టు పనుల్లో ఉన్నాడు.

ఇక హీరో కమల్ హాసన్ మొన్నటి వరకు రాజకీయాలతో బిజీగా ఉండగా.. తమిళనాడు ఎన్నికలు పూర్తవడంతో మరోసారి సినిమాల మీద దృష్టిపెడుతున్నాడు. అయితే, ఇండియన్ 2 విషయంలో కమల్ డైలమాలో ఉన్నట్లుగా తెలుస్తుంది. ప్రస్తుతం కమల్ చేతిలో ‘ఇండియన్ -2’, ‘విక్రమ్’ సినిమాలుండగా ఈ రెండు సినిమాల్లో ఏది ముందు మొదలవుతుందో చెప్పలేని పరిస్థితి నెలకొన్నట్లుగా కనిపిస్తుంది. ఇండియన్ గొడవ ఎప్పటికి కొలిక్కి వస్తుందో తెలియకపోగా విక్రమ్ మొదలుపెట్టాలంటే ఇప్పటికిప్పుడు ఇతర నటీనటుల డేట్స్ దొరకడం లేదట.

దీంతో కమల్ ఆ రెండు సినిమాలను పక్కనపెట్టి మరో సినిమాను సెట్స్ మీదకి తీసుకెళ్లే ప్రయత్నం చేస్తున్నట్లుగా వినిపిస్తుంది. కమల్ నటించాల్సిన జాబితాలో దృశ్యం2 తమిళ రీమేక్ కూడా ఉంది. ఇప్పటికే మలయాళం, తెలుగు వెర్షన్లను శరవేగంగా పూర్తిచేసిన దర్శకుడు నీతూ జోసెఫ్ ఛాన్స్ దొరికితే తమిళంలో కూడా పూర్తిచేసేందుకు సిద్ధంగా ఉన్నాడు. పాపనాశనం పేరుతో వచ్చిన తొలి భాగం అక్కడ కూడా భారీ సక్సెస్ దక్కించుకోగా రెండు భాగం మీద కూడా భారీ అంచనాలే ఉన్నాయి. పైగా దర్శకుడు జోసెఫ్ శరవేగంతో ఈ సినిమా పూర్తిచేస్తాడు కనుక కమల్ దీనికే మొగ్గుచూపే అవకాశాలు కనిపిస్తున్నాయి.