Rob Reiner: ప్రముఖ దర్శకుడు, అతడి భార్య దారుణ హత్య..! గొంతు కోసి కిరాతకంగా..
తన నటనతో రెండుసార్లు ఎమ్మీ అవార్డులు గెలుచుకున్న రాబ్ రీనర్.. ఆస్కార్ నామినీ కూడా.
- Published By: 10TV Digital Team ,Published On : December 16, 2025 / 05:30 AM IST
Rob Reiner: ప్రముఖ హాలీవుడ్ దర్శకుడు, నటుడు రాబ్ రీనర్ దారుణ హత్యకు గురయ్యాడు. అతడి భార్య మిచెల్ సింగర్ కూడా హత్యకు గురైంది. రాబ్ రీనర్ వయసు 78 ఏళ్లు. అమెరికాలో లాస్ ఏంజిల్స్లోని ఇంట్లో దంపతులు విగతజీవులుగా కనిపించారు. ఇద్దరి శరీరాలపై కత్తిపోట్లు ఉన్నాయని పోలీసులు తెలిపారు. ఇద్దరి మృతదేహాలు రక్తపు మడుగులో కనిపించాయి. డైరెక్టర్ దంపతుల హత్య వార్తతో హాలీవుడ్ షాక్ కి గురైంది.
వారిద్దరి గొంతు కోసి హతమార్చినట్లు పోలీసులు అనుమానిస్తున్నారు. శరీరంపై కత్తి పోట్లు ఉండటంతో హత్య కోణంలో విచారణ చేస్తున్నారు. దర్శకుడి రెండో కుమారుడు నిక్ రీనర్పై పోలీసులు అనుమానాలు వ్యక్తం చేస్తున్నారు. 5 దశాబ్దాల సినీ కెరీర్లో హాలీవుడ్పై చెరగని ముద్ర వేశారు రాబ్ రీనర్. దిస్ ఈజ్ స్పైనల్ ట్యాప్, స్టాండ్ బై మి, వెన్ హ్యారీ మెట్ సాలీ వంటి పలు ప్రజాదరణ పొందిన చిత్రాలకు దర్శకత్వం వహించారాయన.
తన నటనతో రెండుసార్లు ఎమ్మీ అవార్డులు గెలుచుకున్న రాబ్ రీనర్.. ఆస్కార్ నామినీ కూడా. ప్రముఖ హాస్య నటుడు కార్ల్ రీనర్ కుమారుడే రాబ్ రీనర్. నటుడిగా మెప్పించిన రీనర్ దర్శకుడిగానూ గుర్తింపు పొందారు. మిసరీ, ఎ ఫ్యూ గుడ్ మెన్ వంటి ఎన్నో క్లాసిక్ చిత్రాలను తెరకెక్కించి అంతర్జాతీయ స్థాయిలో పేరు తెచ్చుకున్నారు. 1987లో ఆయన కో-ఫౌండర్గా స్థాపించిన ‘కాజిల్ రాక్ ఎంటర్టైన్మెంట్’ సంస్థ అనేక హిట్ చిత్రాలను నిర్మించింది.
కాగా, ఈ ఘాతుకానికి పాల్పడింది రీనర్ కొడుకు నిక్ రీనర్ అని తెలుస్తోంది. నిక్ గతంలో ఒక ఇంటర్వ్యూలో తాను మాదక ద్రవ్యాలకు బానిసనని వెల్లడించడం ఈ అనుమానాలకు మరింత బలం చేకూర్చింది. అన్ని కోణాల్లో పోలీసులు విచారణ చేపట్టారు. హత్య వెనుక ఉద్దేశ్యం తెలియాల్సి ఉంది. ఈ కేసులో రాబ్ రైనర్ కుమారుడు నిక్ రైనర్ను పోలీసులు అరెస్ట్ చేశారు. అతడిని అదుపులోకి తీసుకుని విచారిస్తున్నారు.
