చిన్ననాటి స్నేహితుడిని ఫిన్లాండ్ ప్రధాని పెళ్లాడింది
- Published By: nagamani ,Published On : August 4, 2020 / 01:10 PM IST
చిన్ననాటి స్నేహాన్ని దాంపత్య బంధంగా మార్చుకున్నారు ఫిన్లాండ్ ప్రధాని సనా మారిన్. తన చిరకాల స్నేహితుడు, సాకర్‌ ఆటగాడు మార్కస్‌ రాయ్కెన్‌ను వివాహం చేసుకుని ఓ ఇంటివారయ్యారు. ఈ విషయాన్ని ప్రధాని సనా మారిన్ స్వయంగా సోషల్‌ మీడియా వేదికగా వెల్లడించారు.
ఈ సందర్భంగా సనా మారిన్ మాట్లాడుతూ.. నా చిరకాల చెలికాడిని ప్రేమించాను. అతనితోనే నా జీవితాన్ని పంచుకుంటున్నందుకు నాకు చాలా సంతోషంగా ఉంది’’అంటూ ఇన్‌స్టాగ్రామ్‌లో సనా తమ పెళ్లి ఫొటోలు షేర్‌ చేశారు. సుఖ దుఃఖాల్లో ఒకరికొకరు అండగా నిలబడిన మేము ఎప్పటికి కలిసి ఉండేందుకు భార్యాభర్తలుగా మారి కొత్త జీవితం ప్రారంభిస్తున్నామని తెలిపారు.
కాగా సనా మారిన్- మార్కస్‌ల వివాహం ప్రధాని అధికారిక నివాసం(కేసరంట)లో అత్యంత నిరాడంబరంగా జరిగింది.పెద్దగా హంగలు ఆర్భాటాలు లేకుండా శనివారం వారి వివాహ వేడుక జరిగింది. ఈ వివాహ వేడుకలో వధూవరులకు అత్యంత సన్నిహితులైన 40 మంది అతిథులు మాత్రమే పాల్గొన్నట్లు స్థానిక మీడియా తెలిపింది.
ఫిన్లాండ్ ప్రభుత్వం ఈ కొత్తజంటకు శుభాకాంక్షలు తెలుపుతూ ట్విటర్‌లో ఫొటోను షేర్‌ చేసింది. పెళ్లిలో వధువు సనా మారిన్ పొడవాటి తెలుపు రంగు గౌనులో ఏంజెల్ లా మెరిసిపోయారు. వరుడు మార్కస్‌ క్లాసిక్‌ టక్సిడో సూట్‌లో రాజసం ఉట్టిపడేలా హుందాగా కనిపించారు. గత పదహారేళ్లుగా కలిసి ఉంటున్నారు. వీరిద్దరికి ఎమ్మా అమైలా మారిన్ అనే రెండేళ్ల కూతురు ఉంది. తమ పద్దెనిమిదవ ఏటనే ప్రేమలో పడిన వీరు శనివారం (ఆగస్టు 1,2020) వివాహ బంధంతో ఒక్కటయ్యారు.
2019 డిసెంబరులో ఫిన్లాండ్ ప్రధానిగా బాధ్యతలు చేపట్టిన సనా మారిన్.. ప్రపంచంలోనే అత్యంత పిన్నవయస్సులో అంటే 34 ఏళ్ల వయస్సులోనే అత్యున్నత పదవి అలంకరించిన మహిళగా చరిత్రకెక్కారు. సోషల్‌ డెమొక్రటిక్‌ పార్టీకి చెందిన సనా.. కాట్రీ కుల్ముని(32-సెంటర్‌ పార్టీ), లీ అండర్సన్‌(32- లెఫ్ట్‌ అలయన్స్), మారియా ఓహిసాలో(34- గ్రీన్‌ లీగ్), అన్నా మజా హెర్నిక్సన్(55- స్వీడిష్‌ పీపుల్స్‌ పార్టీ ఆఫ్‌ ఫిన్లాండ్) నేతృత్వంలోని సంకీర్ణ ప్రభుత్వానికి సారథ్యం వహిస్తున్నారు.
ఇద్దరూ శాశ్వతంగా కలిసి ఉండాలని వివాహం చేసుకుని స్నేహబంధాన్ని వివాహ బంధంగా మార్చుకున్నారు. వారి స్నేహం లాగానే..వారి వివాహ జీవింతం కూడా చాలా ప్రశాంతంగా..అన్యోన్యంగా సాగిపోవాలని కోరుకుందాం..
