రివ్యూ : కౌసల్య కృష్ణమూర్తి
- Published By: veegamteam ,Published On : August 23, 2019 / 09:06 AM IST
ఐశ్వర్యా రాజేష్. ఈ పేరు తెలుగు ప్రేక్షకులకు పెద్దగా పరిచయం లేదు. ఇక నుంచి కచ్చితంగా గుర్తుండిపోతుంది. అలాంటి టాలెంట్ ఆమె సొంతం. తమిళంలో పెర్ఫార్మన్స్ ఓరియెంటెడ్ సినిమాలు చేస్తూ టాప్ లెవల్ హీరోయిన్ గా ఎదిగిన ఆమె.. ఇప్పుడు కౌసల్య కృష్ణమూర్తి అనే స్పోర్ట్స్ బ్యాక్ డ్రాప్ సినిమాతో తెలుగులోకి డైరెక్ట్ ఎంట్రీ ఇచ్చింది. తమిళ్ లో కూడా ఆమె మెయిన్ లీడ్ గా నటించిన ఈ సినిమాని.. సీనియర్ ప్రొడ్యూసర్ కె.ఎస్. రామారావు రీమేక్ చేశారు. రీమేక్ స్పెషలిస్ట్ అని పేరున్న భీమనేని శ్రీనివాసరావు డైరెక్ట్ చేశారు. మూవీ ఎలా ఉంది? ఎంత వరకు ఆకట్టుకుంది. ఐశ్వర్యా రాజేష్ కి డ్రీమ్ డెబ్యూ అందించిందా లేదా అనేది చూద్దాం.
కథ చూద్దాం..
ఇరగవరం అనే పల్లెటూరిలో సన్నకారు రైతు అయిన కృష్ణమూర్తికి వ్యవసాయం, క్రికెట్ ప్రాణం. క్రికెట్ లో ఇండియా ఓడిపోతే తట్టుకోలేని మనస్తత్వం కృష్ణమూర్తిది. అది చూసిన కృష్ణమూర్తి కూతురు కౌసల్య.. తన తండ్రికి ఇష్టమైన క్రికెట్ నేర్చుకుని ఇండియానే గెలిపించి తన తండ్రి ముఖంలో సంతోషం చూడాలని కోరుకుంటుంది. క్రికెట్ నే సర్వస్వంగా భావించి సాధన చేస్తోంది. పేదరికం వల్ల అనుకున్న లక్ష్యాన్ని చేరడానికి అడుగడుగునా అవాంతరాలు ఎదురవుతాయి. వాటన్నిటినీ ఎదుర్కొని జాతీయ జట్టులో ఎలా చోటు సంపాదించుకుంది. అక్కడ ఎదురయిన ప్రతికూల పరిస్థితులు ఏంటీ, ఎదుర్కొన్న సవాళ్లు ఏంటి? అనేది సినిమా ఓవరాల్ స్టోరీ.
నటీ నటుల విషయానికొస్తే..
ఏ పాత్రనైనా అలవోకగా తనదైన శైలిలో నటించి మెప్పించే రాజేంద్రప్రసాద్, కృష్ణమూర్తి పాత్రకు ప్రాణం పోశాడు. పంట చేతికిరాక ఇబ్బంది పడే సగటు రైతుగా, కూతురు భవిష్యత్ గురించి బెంగతో భయపడే తండ్రిగా అద్భుతంగా నటించాడు. అలనాటి నటుడు రాజేష్ కూతురైన ఐశ్వర్య రాజేష్ తమిళ్ లో 25 సినిమాలు చేసినా.. ఈ సినిమాతో తెలుగు తెరకు పరిచయం అయ్యింది. కోసల్య పాత్రలో జీవించింది. రైతు కూతురిగా, క్రికెటర్ గా తనదైన శైలి లో మెప్పించింది. ఎమోషన్స్ సైతం పండించడంలో ఆమె తన బెస్ట్ ఫెర్ఫర్మెన్స్ ఇచ్చింది. కోచ్ గా నటించిన శివకార్తికేయన్ బాగా నటించాడు. కౌసల్య తల్లి పాత్రలో నటించిన ఝాన్సీకి ఓ మంచి పాత్ర దక్కింది అనవచ్చు. మిగతా నటీనటులు అందరూ బెస్ట్ అవుట్ ఫుట్ నిచ్చారు.
టెక్నీషియన్స్ విషయానికొస్తే..
రీమేక్ సినిమాలను తన దైన శైలి లో రూపొందించే భీమినేని శ్రీనివాస్.. తమిళ్ రీమేక్ అయిన ఈ సినిమా కథను తెలుగు నేటివిటికి అనుగుణంగా చక్కగా తెరకెక్కించారు. ఫీల్ మిస్సవకుండా జాగ్రత్తలు తీసుకున్నాడు. దిబు నైనన్ థామస్ సంగీతం సినిమాకి ప్లస్ అయ్యింది. ప్రతి సన్నివేశాన్ని తన బ్యాక్ గ్రౌండ్ స్కోర్ తో ఎలివేట్ చేశాడు. సినిమాటోగ్రఫీ బాగుంది. ఎడిటింగ్ లో మరిన్ని జాగ్రత్తలు తీసుకుని ఉండాల్సింది.
ఓవరాల్ గా చెప్పాలంటే.. కేవలం కమర్షియాలిటీకి కట్టుబడి సగటు సినిమా కాకుండా అనేక మందికి ప్రేరణగా నిలిచే ఇలాంటి సినిమా అందించినందుకు దర్శక నిర్మాతలను అభినందించాలి. తెలుగులోకి ఎంట్రీ ఇవ్వడానికి ఈ సినిమాని ఎంచుకున్న ఐశ్వర్యా రాజేష్ ను అభినందించాలి. క్రికెట్ బ్యాక్ డ్రాప్, ఎమోషన్స్ లాంటివి ప్రేక్షకులకు నచ్చితే మాత్రం.. ఈ మంచి సినిమా బాక్స్ ఆఫీస్ దగ్గర కూడా పాస్ అయిపోతుంది.
ప్లస్ పాయింట్స్
రాజేంద్ర ప్రసాద్, ఐశ్వర్య రాజేష్ నటన
మ్యూజిక్
సినిమాటోగ్రఫీ
ఎమోషన్
క్లయిమాక్స్
మైనస్ పాయింట్స్
ఊహాజనిత కథ
కొన్ని లాగ్స్
ఎడిటింగ్ లోపాలు
