Longwa village: నమ్మశక్యం కాదు.. బెడ్రూమ్ భారత్లో, కిచెన్ మయన్మార్లో.. ఈ ఇంట్లో నడిస్తే దేశం మారిపోతుంది తెలుసా!
భారతదేశంలోని ఒక మారుమూల గ్రామంలో మాత్రం బెడ్రూమ్(Longwa village) నుంచి కిచెన్లోకి నడిచి వెళ్తే చాలు.. అంతర్జాతీయ సరిహద్దు దాటి మరో దేశంలోకి అడుగుపెట్టినట్లే
- Published By: V Santhosh Kumar , Published On : June 7, 2026 / 06:33 PM IST
Bedroom in india kitchen in myanmar unbelievable longwa village story
- బెడ్రూమ్ భారత్లో.. కిచెన్ మయన్మార్లో!
- ఒకే ఇల్లు.. రెండు దేశాల సరిహద్దు!
- కంచె ప్రతిపాదనతో గ్రామస్థుల్లో తీవ్ర ఆందోళన!
Longwa village: ప్రపంచంలో ఎక్కడైనా సరే.. ఒక దేశం దాటి మరో దేశంలోకి వెళ్లాలంటే పాస్పోర్టులు, వీసాలు, కంటిచూపుతో కాపలా కాసే సరిహద్దు తనిఖీ కేంద్రాలు దాటాలి. కానీ, మన భారతదేశంలోని ఒక మారుమూల గ్రామంలో మాత్రం బెడ్రూమ్ నుంచి కిచెన్లోకి నడిచి వెళ్తే చాలు.. అంతర్జాతీయ సరిహద్దు దాటి మరో దేశంలోకి అడుగుపెట్టినట్లే! వినడానికి ఏదో హాలీవుడ్ సైన్స్ ఫిక్షన్ సినిమా కథలా అనిపించినా, ఇది అక్షరాలా నిజం. నాగాలాండ్ రాష్ట్రం మోన్ జిల్లాలోని ‘లాంగ్వా’ (Longwa village) గ్రామంలో ఇరు దేశాల సార్వభౌమాధికారం ఒకే ఇంటి పైకప్పు కింద సహజీవనం చేస్తోంది. భారత్-మయన్మార్ అంతర్జాతీయ సరిహద్దు రేఖ ఈ గ్రామాన్ని, ఇక్కడి ఇళ్లను నడిబొడ్డున సరిగ్గా రెండు ముక్కలుగా చీలుస్తూ వెళ్తుంది.
Kishan Reddy: భయపెడితే భయపడనీకి నేను కేసీఆర్ అనుకున్నావా?.. సీఎం రేవంత్ కు కిషన్ రెడ్డి కౌంటర్
ఈ వింతల గ్రామంలో అత్యంత ఆకర్షణీయమైన విశేషం ఏమిటంటే.. ఇక్కడి గ్రామ పెద్ద (Angh) నివాసం. ఈ ఇంటి మధ్య నుంచే అంతర్జాతీయ సరిహద్దు రేఖ సాగిపోతుంది. అందుకే, ఇక్కడి ప్రజలు సరదాగా ఒక మాట అంటుంటారు “మా పెద్దాయన నిద్రపోయేది భారతదేశంలో.. ఉదయం అల్పాహారం తినేది మయన్మార్లో” అని. లాంగ్వా గ్రామంలో ప్రధానంగా నివసించే ‘కొన్యాక్ నాగా’ తెగ ప్రజలకు ఆధునిక దేశాల సరిహద్దుల కంటే తమ రక్తం పంచుకున్న బంధుత్వాలు, గిరిజన సంస్కృతే ప్రాణాధారం. బ్రిటీషర్లు గీసిన కృత్రిమ రేఖల కంటే ముందే ఏర్పడిన వీరి సాంప్రదాయ సామ్రాజ్యం ఇరు దేశాలలోనూ విస్తరించి ఉంది. చాలామంది గ్రామస్థులకు ఇల్లు భారత్లో ఉంటే, వారి వ్యవసాయ పొలాలు మయన్మార్ భూభాగంలో ఉన్నాయి.
సరిహద్దులు కంటికి కనిపించని ఈ అద్భుత గ్రామం.. వీరత్వానికి, విలక్షణ సంస్కృతికి కూడా కేరాఫ్ అడ్రస్. 1960ల వరకు శత్రువుల తలలు నరికే ‘హెడ్హంటింగ్’ సంప్రదాయాన్ని పాటించిన చివరి యోధుల తెగ ఈ కొన్యాకులు. నేటికీ ఇక్కడి వృద్ధుల ముఖాలపై ఉండే పచ్చబొట్లు, మెడలో వేలాడే సంప్రదాయ ఆభరణాలు వారి అనాది పోరాట చరిత్రకు సజీవ సాక్ష్యాలుగా నిలుస్తాయి. అయితే, కాలం మారుతోంది. సరిహద్దుల భద్రతను పెంచేందుకు ఇరు దేశాల మధ్య ఫెన్సింగ్ వేయాలన్న తాజా ప్రతిపాదనలు ఈ ప్రజల్లో తీవ్ర ఆందోళన కలిగిస్తున్నాయి. తమ వంటిల్లును, పడకగదిని విడదీసేలా.. తమ కుటుంబాలను, పాఠశాలలను శాశ్వతంగా దూరం చేసేలా కంచెలు వేయవద్దని వారు కోరుకుంటున్నారు. ఎందుకంటే, వారికి సరిహద్దు అనేది కేవలం మ్యాప్లో గీసిన గీత కాదు.. వారి గుండెల్ని చీలుస్తూ సాగిపోయే ఒక సజీవ వేదన. మరి వీరి విజ్ఞప్తిని సరిహద్దు దేశాలు ఎలా తీసుకుంటాయి అనేది చూడాలి.
