Zomato ‘Bring 500 change’: రూ.500 ‘చిల్లర’ తెమ్మంటే కేక్ పై రాసి పంపిన సిబ్బంది
ఆన్ లైన్ లో కేక్ ఆర్డర్ చేసిన మహిళకు షాక్ ఇచ్చారు బేకరీ సిబ్బంది. రూ.500 ‘చిల్లర’ తెమ్మని యాప్ లో డెలివరీ బాయ్ కు ఇన్ స్ట్రక్షన్ పెట్టింది.కానీ ’చిల్లర’ కేక్ పై రాసి పంపించారు సిబ్బంది.
- Published By: 10TV Digital Team ,Published On : July 19, 2022 / 05:34 PM IST
Zomato 'bring 500 Change
Zomato ‘Bring 500 change’: ఓ మహిళ జొమాటోలో కేక్ ఆర్డర్ చేసింది. నా దగ్గర రూజ500ల నోటు ఉంది చిల్లర లేదు..దయచేసి బాయ్ వచ్చేటప్పుడు రూ.500లకు చిల్లర తీసుకురావాలని యాప్ లో డెలివరీ బాయ్ కు ఇన్ స్ట్రక్షన్ పెట్టింది. దానికి జొమాటో సిబ్బంది ఆమె ఆర్డ్ చేసిన కేక్ మీద రూ.500 ల చిల్లర అంటూ రాసి పంపించారు. అది చూసి షాక్ అయిన సదరు మహిళ నవ్వుకుని దాన్ని సోషల్ మీడియాలో పోస్ట్ చేయటంతో అదికాస్తా వైరల్ గా మారింది.
ముంబైకి చెందిన వైష్ణవి అనే మహిళ కేక్ తెప్పించాలనుకుంది. జొమాటోలో ఓ మంచి బేకరీ చూసుకుని కేక్ ను ఆర్డర్ చేసింది. ఆన్ లైన్ పేమెంట్ కాకుండా.. క్యాష్ ఆన్ డెలివరీ ఆప్షన్ పెట్టుకుంది. తన దగ్గర సరిపోయినంత చిల్లర లేకపోవడంతో.. రూ.500కు చిల్లర తీసుకురండి (బ్రింగ్ 500 చేంజ్) అంటూ యాప్ లో డెలివరీ బాయ్ కు ఇన్ స్ట్రక్షన్ పెట్టింది. కానీ డెలివరీ బాయ్ కు పెట్టిన ఈ ఇన్ స్ట్రక్షన్ ను కేక్ పై రాయడానికి పెట్టారేమోనని అనుకున్నారేమో బేకరీ సిబ్బంది కేక్ పై ‘బ్రింగ్ 500 చేంజ్’ అని ఇంగ్లిష్ లో రాసిపెట్టి పంపారు.
తీరా ఇంటికి వచ్చాక చూసుకుంటే.. కేక్ పై రాసి ఉన్నదాన్ని చూసి వైష్ణవి అవాక్కయింది. ఏదో అంటే ఏదో అయిందంటూ కేక్ ఫొటోతో ఫేస్ బుక్ లో పోస్టు పెట్టింది. కేక్ ఫొటోతో వైష్ణవి పెట్టిన పోస్టు వైరల్ గా మారింది. నెటిజన్లు కామెంట్ల మీద కామెంట్లు పెట్టడం మొదలుపెట్టారు. ‘హ్యాపీ బర్త్ డే బ్రింగ్ 500 చేంజ్’ అంటూ కొందరు, ‘అందుకే ఆన్ లైన్ లో డబ్బులు పే చేయాలనేది’ అంటూ ఇంకొందరు కామెంట్లు పెట్టారు.
ఇక ‘డెలివరీ ఇన్ స్ట్రక్షన్ ఇచ్చారుగా. ఇంకే అలాగే వచ్చింది’, ‘వాళ్లు కావాలనే ఇలా చేస్తుంటారని అనిపిస్తోంది’, ‘కుకింగ్ ఇన్ స్ట్రక్షన్స్ లో రాశారేమో..’ ‘ఇంకా నయం.. ఏమేమో రాయలేదు..’ అని మరికొందరు వారి వారి అభిప్రాయాలను కామెంట్లుగా పెట్టారు.
కాగా గతంలో కూడా దాదాపు ఇటువంటి ఫన్నీ ఘటనే జరిగింది. మహారాష్ట్రలోని నాగ్ పూర్ కు చెందిన ఒకాయన కూడా ఇలాగే కేక్ కోసం స్విగ్గీలో ఆర్డర్ చేశారు. కేక్ లో గుడ్డు కలిపారా, లేదా అన్న విషయాన్ని చెప్పాలని ఇన్ స్ట్రక్షన్ ఇచ్చాడు. కానీ కేక్ ఇంటికి వచ్చాక చూసుకుంటే అతని దిమ్మ తిరిగిపోయింది. ఎందుకంటే.. కేక్ లో గుడ్డు కలిసి ఉంటుందని చెప్తూ.. కేక్ పైనే ‘కంటైన్ ఎగ్’ అని రాసి పంపారు. ఆ న్యూస్ కూడా బాగా వైరల్ అయ్యింది అప్పట్లో..
