Zomato: ‘తప్పు కాదు.. మీరే అపార్థం చేసుకుంటున్నారు’
ఫుడ్ డెలివరీ దిగ్గజం.. జొమాటో యాడ్ రూపంలో మరోసారి వివాదంలో ఇరుక్కుపోయింది. ప్రమోషన్ లో భాగంగా హాలీవుడ్ స్టార్లు హృతిక్ రోషన్, కత్రినా కైఫ్ లతో రెండు ప్రకటనలను విడుదల చేసింది.
- Published By: 10TV Digital Team ,Published On : August 31, 2021 / 02:43 PM IST
Zomato
Zomato: ఫుడ్ డెలివరీ దిగ్గజం.. జొమాటో యాడ్ రూపంలో మరోసారి వివాదంలో ఇరుక్కుపోయింది. ప్రమోషన్ లో భాగంగా హాలీవుడ్ స్టార్లు హృతిక్ రోషన్, కత్రినా కైఫ్ లతో రెండు ప్రకటనలను విడుదల చేసింది. ఆగష్టు 26న రిలీజ్ చేసిన ఈ యాడ్ పై సోషల్ మీడియాలో దుమారం చెలరేగింది. జొమాటో డెలివరీ ఏజెంట్ల పట్ల ఇలా ప్రవర్తిస్తున్నారా అంటూ నెటిజన్లు కామెంట్లు చేస్తున్నారు.
దీనిపై స్పందించిన జొమాటో.. ట్విట్టర్ లో అదర్ సైడ్ ఆఫ్ ద స్టోరీ అంటూ మరో ప్రకటన చేసింది. కొందరు వ్యక్తులు దురదృష్టవశాత్తు మమ్మల్ని అపార్థం చేసుకుంటున్నారు. ఉద్యోగులను హీరోలుగా చూపించడంలో భాగంగా.. డెలివరీ పార్టనర్లతో సెలబ్రిటీలు గౌరవంగా మాట్లాడటం వంటివి చూపించామని పేర్కొంది. ప్రతి కస్టమర్ తమకొక స్టార్ లాంటి వారని చెప్పడమే ముఖ్య ఉద్దేశ్యమని కంపెనీ వెల్లడించింది.
బాలీవుడ్ స్టార్లు హృతికి రోషన్, కత్రినా కైఫ్‌తో యాడ్స్‌ వివాదానికి సంబంధించిన ప్రకటనలు ఇలా ఉన్నాయి. హృతిక్ రోషన్ నటించిన జొమాటో యాడ్‌లో ఆర్డర్‌ను డెలివరీ చేసేందుకు వచ్చిన డెలివరీ పర్సన్ హృతిక్ డోర్‌బెల్ బెల్‌ మోగిస్తాడు. హృతిక్ రోషన్‌ను చూసి ఆశ్చర్యపోతాడు. ఇంతలో బాలీవుడ్ స్టార్ అతడిని సెల్ఫీ కోసం వేచి ఉండమంటాడు. డెలివరీ బాయ్‌ కూడా చాలా హ్యాపీగా ఫీలవుతాడు.
ఇంతలోనే ఫోన్ రింగ్ అవుతుంది. తరువాతి డెలివరీ చేయాల్సిన మరో ఆర్డర్‌కు సంబంధించి కాల్‌ అది. దీంతో రోషన్‌తో సెల్ఫీ ఛాన్స్‌ వదులుకొని, మరో ఆర్డర్ డెలివరీ కోసం వెళ్లిపోతాడు.
‘హృతిక్ రోషన్ హో, యా ఆప్, అప్నేలియే హర్ కస్టమర్ హై స్టార్ (హృతిక్ రోషన్ అయినా.. మీరైనా.. ప్రతీ కస్టమర్ జొమాటోకి ఒక స్టారే) అంటూ యాడ్ ముగుస్తుంది.
కత్రినా కైఫ్ నటించిన యాడ్‌లో బర్త్‌డే కేక్ డెలివరీ ఇచ్చిన బాయ్‌ని కేక్ తిందువు ఉండమని కత్రినా రిక్వెస్ట్ చేస్తుంది. మరొక ఫుడ్ ఆర్డర్ కోసం నోటిఫికేషన్‌ వస్తుంది. ఇక్కడే జొమాటోకు ఎదురుదెబ్బ తగిలింది. ఉద్యోగుల పట్ల ఇంత అన్యాయమా, ఇలాంటి ఆనందాలనువారికి దూరం చేస్తారా అంటూ నెటిజన్లు మండిపడుతున్నారు.
అంతేకాకుండా సరైన వేతనాలు చెల్లించడం కంటే కంపెనీ సెలబ్రిటీలతో ప్రకటనల కోసం డబ్బు ఖర్చు చేస్తుందని ఆగ్రహం వ్యక్తం చేశారు. దీనిపైనా స్పందించిన జొమాటో తమ ప్రకటన పట్ల సానుకూలంగా స్పందించారని, కొంతమందికి మాత్రమే నచ్చలేదని తెలిపింది. అలాగే తమ డెలివరీ పార్టనర్ల చెల్లింపులపై త్వరలోనే ఒక బ్లాగ్ పోస్ట్‌ను ప్రచురిస్తామని, డెలివరీ పార్టనర్ నెట్ ప్రమోటర్ స్కోర్ 10నుంచి 28 శాతానికి పెంచామని జొమాటో పేర్కొంది.
