RCB : క‌ప్పు గెలిచిన ఆనందంలో ఉన్న ఆర్‌సీబీకి బిగ్ షాక్..
ఎట్ట‌కేల‌కు ఐపీఎల్ ట్రోఫీని సాధించామ‌ని ఆనందంలో ఉన్న రాయ‌ల్ ఛాలెంజ‌ర్స్ టీమ్, వారి ఫ్యాన్స్‌కు ఊహించని షాక్ త‌గిలింది
- Thota Vamshi Kumar
- Published on- June 4, 2025 / 02:38 PM IST
Courtesy BCCI
ఎట్ట‌కేల‌కు ఐపీఎల్ ట్రోఫీని సాధించామ‌ని ఆనందంలో ఉన్న రాయ‌ల్ ఛాలెంజ‌ర్స్ టీమ్, వారి ఫ్యాన్స్‌కు ఊహించని షాక్ త‌గిలింది. తొలిసారి ఐపీఎల్ క‌ప్పును గెలవ‌డంతో బెంగ‌ళూరు న‌గ‌రంలో ఆర్‌సీబీ టీమ్‌తో విక్టరీ ప‌రేడ్ నిర్వ‌హించాల‌ని ఆర్‌సీబీ మేనేజ్‌మెంట్ భావించింది. ఈ క్ర‌మంలోనే ఈ రోజు (బుధ‌వారం) మ‌ధ్యాహ్నం 3.30 గంట‌ల‌కు విక్టరీ ప‌రేడ్‌ను, సాయంత్రం 6 గంట‌ల‌కు చిన్న‌స్వామి స్టేడియంలో సెల‌బ్రేష‌న్స్ ప్లాన్ చేశారు.
అయితే.. పోలీసులు పెద్ద షాక్ ఇచ్చిన‌ట్లుగా తెలుస్తోంది. విక్టరీ ప‌రేడ్‌కు బెంగ‌ళూరు పోలీసులు అనుమ‌తి ఇవ్వ‌లేద‌ని స‌మాచారం. వ‌ర్కింగ్ డే కావ‌డంతో న‌గ‌రంలో ట్రాఫిక్ స‌మ‌స్య ఏర్ప‌డుతుంద‌ని చెప్పార‌ట. ఈ క్ర‌మంలో విక్టరీ ప‌రేడ్‌ను ర‌ద్దు చేసిన‌ట్లుగా వార్తలు వ‌స్తున్నాయి. ఈ వార్త విన్న ఆర్‌సీబీ అభిమానులు నిరాశ‌ను వ్య‌క్తం చేస్తున్నారు.
ఇప్పుడు కేవ‌లం చిన్న‌స్వామి స్టేడియంలో సెల‌బ్రేష‌న్స్ మాత్ర‌మే నిర్వ‌హించ‌నున్నారు. ఈ కార్య‌క్ర‌మానికి పాసులు ఉన్న‌వారినే అనుమతించ‌నున్నారు. పార్కింగ్ స‌మ‌స్య త‌లెత్త‌కుండా ప్ర‌జా ర‌వాణాను ఉప‌యోగించుకోవాల‌ని పోలీసులు సూచిస్తున్నారు. బెంగ‌ళూరులోని సీబీడీ ప్రాంతం వైపు మ‌ధ్యాహ్నం 3 నుంచి రాత్రి 8 గంట‌ల వ‌ర‌కు వెళ్ల‌క‌పోవ‌డ‌మే మంచిద‌ని సాధార‌ణ ప్ర‌జ‌ల‌కు పోలీసులు సూచించారు.