Income Tax Return : ఆదాయ పన్ను ఇంకా చెల్లించలేదా? ఈ నెల 31లోగా ఆన్‌లైన్‌లో ITR ఎలా ఫైల్ చేయాలంటే? ఇదిగో సింపుల్ ప్రాసెస్..!
Income Tax Return : ప్రాథమిక మినహాయింపు పరిమితిని మించిన ఆదాయం ఉన్న భారతీయ పౌరులకు ఆదాయపు పన్ను రిటర్న్ (ITR) ఫైల్ చేయడం తప్పనిసరి. 2022-23 ఆర్థిక సంవత్సరానికి ఐటీఆర్ ఫైల్ చేయడానికి చివరి తేదీ జూలై 31, 2023 వరకు ప్రభుత్వం గడువు విధించింది.
- Published By: 10TV Digital Team ,Published On : July 24, 2023 / 11:13 PM IST
How to quickly file Income Tax Return or ITR online before July 31
Income Tax Return : మీరు ఆదాయ పన్ను చెల్లించలేదా? ఐటీఆర్ దాఖలు చేసేందుకు ఇంకా కొద్ది రోజులే గడువు ఉంది. గడువు తేదీ ప్రకారం.. ఈ నెల 31వరకు మాత్రమే సమయం ఉంది. ఆదాయపు పన్ను రిటర్న్ (ITR) దాఖలు చేయడం అనేది ప్రాథమిక మినహాయింపు పరిమితిని మించి ఆదాయం ఉన్న ప్రతి భారతీయ పౌరుడి బాధ్యత. ఇది కేవలం చట్టపరమైన బాధ్యత మాత్రమే కాదు. ఆదాయానికి సంబంధించి వివరాలను అందించడంతో పాటు లోన్ అప్లికేషన్‌లు, క్రెడిట్ కార్డ్ అప్లికేషన్‌లు, వీసా అప్లికేషన్‌లకు అవసరం వంటి అనేక ప్రయోజనాలను కూడా పొందవచ్చు. ప్రతి ఏడాది మాదిరిగానే ITR దాఖలు చేయడం అనేది వార్షిక ప్రక్రియగా చెప్పవచ్చు.
ఆదాయపు పన్ను శాఖ ప్రకారం.. చివరి తేదీ పొడిగించే పరిస్థితి కనిపించడం లేదు. పన్ను చెల్లింపుదారులందరూ గడువు తేదీకి ముందే తమ ITRని దాఖలు చేయాల్సి ఉంటుంది. అలా చేయడంలో విఫలమైతే.. సెక్షన్ 234F కింద రూ. 5వేలు ఆలస్య రుసుము చెల్లించాల్సి వస్తుంది. అయితే, వార్షిక ఆదాయం 5 లక్షల కన్నా తక్కువ ఉంటే.. ఆలస్య రుసుము రూ. వెయ్యికి పరిమితంగా చెల్లించాలి.
ఆదాయపు పన్ను రిటర్న్ ఎలా ఫైల్ చేయాలంటే? :
మీ ITRని ఆన్‌లైన్‌లో సులభంగా ఫైల్ చేయడం ఎలా అనేదానిపై ఇప్పుడు వివరంగా తెలుసుకుందాం..
డాక్యుమెంట్ల ప్రిపరేషన్ తప్పనిసరి :
మీ ITR ఫైల్ చేసే ప్రక్రియను ప్రారంభించడానికి ముందు.. అవసరమైన అన్ని డాక్యుమెంట్లను సేకరించండి. అందులో ఫారమ్ 16, ఫారం 26AS, TDS సర్టిఫికెట్లు, జీతం, ఫ్రీలాన్సింగ్ లేదా వడ్డీ ఆదాయం వంటి వివిధ వనరుల నుంచి మీ ఆదాయ వివరాలు ఉన్నాయి. అలాగే, సెక్షన్ 80C కింద ఏదైనా పన్ను ఆదా చేసే పెట్టుబడులు, సెక్షన్ 80D కింద చెల్లించిన మెడికల్ ఇన్సూరెన్స్ ప్రీమియం, సెక్షన్ 80G కింద చేసిన విరాళాలు, ఇతర సంబంధిత తగ్గింపుల వివరాలను తప్పనిసరిగా తెలియజేయాలి.
రిజిస్ట్రేషన్ (Registration) :
అధికారిక ఆదాయపు పన్ను ఇ-ఫైలింగ్ వెబ్‌సైట్- incometax.gov.in/iec/foportal/ని విజిట్ చేయండి. మీరు కొత్త యూజర్ అయితే.. మీ శాశ్వత ఖాతా సంఖ్య (PAN) ఉపయోగించి వెబ్‌సైట్‌లో రిజిస్టర్ చేసుకోండి. మీ PAN నెంబర్ మీ అకౌంట్ యూజర్ IDగా పనిచేస్తుంది.
లాగిన్ (Login) చేయండి :
రిజిస్టర్ చేసుకున్న తర్వాత మీ యూజర్ ID, పాస్‌వర్డ్, స్క్రీన్‌పై కనిపించే (Captcha) క్యాప్చా కోడ్‌ను ఎంటర్ చేయడం ద్వారా పోర్టల్‌కు లాగిన్ చేయండి.
దాఖలు (Filing) చేయడం :
లాగిన్ అయిన తర్వాత, ‘e-File’ మెనుపై క్లిక్ చేసి, ఆపై ‘Income Tax Return’ లింక్‌పై క్లిక్ చేయండి. మీరు రిటర్న్‌ను ఫైల్ చేస్తున్న అసెస్‌మెంట్ సంవత్సరాన్ని ఎంచుకోండి. తగిన ITR ఫారమ్‌ను ఎంచుకోండి. ఆన్‌లైన్ ఫైలింగ్ కోసం.. పన్ను చెల్లింపుదారులు ITR1, ITR4ను ఫైల్ చేయవచ్చు.
వివరాలను ఎంటర్ చేయండి :
ఫారమ్‌లో అవసరమైన వివరాలను నింపండి. ఇందులో మీ వ్యక్తిగత సమాచారం, ఆదాయ వివరాలు, మినహాయింపు వివరాలు ఉంటాయి. తర్వాత ఏవైనా సమస్యలు తలెత్తకుండా ఉండేందుకు ఎంటర్ చేసిన మొత్తం సమాచారం కచ్చితమైనదని నిర్ధారించుకోండి.
How to quickly file Income Tax Return or ITR online before July 31
– మీరు ITR 1ని ఎంచుకుంటే.. 5 సెక్షన్లలో సరైన వివరాలతో నింపండి. వ్యక్తిగత సమాచారం, స్థూల మొత్తం ఆదాయం, మొత్తం తగ్గింపులు, చెల్లించిన పన్ను, మొత్తం పన్ను చెల్లించడం వంటి ప్రాథమిక వివరాలను అందించండి. వివిధ వనరుల నుంచి వచ్చే ఆదాయాన్ని ధృవీకరించండి. తగ్గింపులను క్లెయిమ్ చేయండి. తదనుగుణంగా పన్ను వివరాలను సమర్పించి చెల్లించాల్సి ఉంటుంది.
– మీరు ITR 4ని ఎంచుకుంటే.. 6 సెక్షన్లలో వివరాలను నింపాలి. వ్యక్తిగత సమాచారం, స్థూల మొత్తం ఆదాయం, మొత్తం తగ్గింపులు, చెల్లించిన పన్నులు, మొత్తం పన్ను బాధ్యతను వివరించాలి.
ధృవీకరణ (Verification) :
అన్ని వివరాలను నింపిన తర్వాత రిజిస్టర్ చేసిన మొత్తం డేటాను ధృవీకరించండి. పోర్టల్ అవసరమైన మొత్తం సమాచారం అందించిన తర్వాత ‘Validate’ బటన్‌ను అందిస్తుంది.
సమర్పించండి (Submit) :
అన్ని వివరాలు ధృవీకరించిన తర్వాత, ఫారమ్‌ను సమర్పించండి. చెల్లించాల్సిన పన్ను ఏదైనా ఉంటే.. ఇ-ఫైలింగ్ పోర్టల్ ద్వారా ఆన్‌లైన్‌లో పేమెంట్ చేయండి.
ఈ-ధృవీకరణ (E-Verification) :
ఫారమ్‌ను సమర్పించిన తర్వాత మీ వాపసును ధృవీకరించడం తప్పనిసరి. దీన్ని చేయడానికి సులభమైన మార్గం.. ఈ-వెరిఫికేషన్ ద్వారా మీ ఆధార్ OTP, ఎలక్ట్రానిక్ ధృవీకరణ కోడ్ (EVC)ని ఉపయోగించి లేదా ITR-V మాన్యువల్‌గా సైన్ చేసిన కాపీని CPC బెంగళూరుకు పంపడం ద్వారా మీ రిటర్న్‌ను ఈ-ధృవీకరించవచ్చు.
నిర్ధారణ (Confirmation) :
విజయవంతమైన సమర్పణ, ధృవీకరణ తర్వాత మీ రిజిస్టర్డ్ ఈ-మెయిల్ ID, మొబైల్ నంబర్‌లో కన్ఫర్మేషన్ మెసేజ్ అందుకుంటారు. మీరు ఈ-ఫైలింగ్ పోర్టల్‌లో మీ ITR స్టేటస్ కూడా చెక్ చేయవచ్చు.
