Monkeypox : ఇజ్రాయెల్‌లో మొదటి మంకీపాక్స్ కేసు.. ఈ లక్షణాలుంటే జాగ్రత్త..! | Israel reports first monkeypox patient, more cases suspected

Monkeypox : ఇజ్రాయెల్‌లో మొదటి మంకీపాక్స్ కేసు.. ఈ లక్షణాలుంటే జాగ్రత్త..!

Monkeypox : కరోనావైరస్ వ్యాప్తి తగ్గిందిలే అనుకుంటే.. మరో కొత్త వైరస్ ప్రపంచాన్ని వణికిస్తోంది. మంకీ పాక్స్ అనే వైరస్ ప్రపంచ దేశాల్లో వేగంగా వ్యాపిస్తోంది.

Monkeypox : ఇజ్రాయెల్‌లో మొదటి మంకీపాక్స్ కేసు.. ఈ లక్షణాలుంటే జాగ్రత్త..!

Monkeypox : కరోనావైరస్ వ్యాప్తి తగ్గిందిలే అనుకుంటే.. మరో కొత్త వైరస్ ప్రపంచాన్ని వణికిస్తోంది. మంకీ పాక్స్ అనే వైరస్ ప్రపంచ దేశాల్లో వేగంగా వ్యాపిస్తోంది. ఇప్పటికే పలుదేశాల్లో ఈ మంకీ పాక్స్ కేసులు నమోదయ్యాయి. తాజాగా ఇజ్రాయెల్‌లోనూ మొదటి మంకీపాక్స్ కేసు నమోదైంది. విదేశాల నుంచి తిరిగి వచ్చిన ఓ వ్యక్తిలో మంకీ పాక్స్ లక్షణాలు ఉన్నాయని గుర్తించినట్టు ఇజ్రాయెల్ అధికారులు పేర్కొన్నారు. మంకీ పాక్స్ అనుమానిత కేసులను పరిశీలిస్తున్నామని తెలిపారు.

టెల్ అవీవ్ ఆసుపత్రిలో చేరిన వ్యక్తిలో మంకీ పాక్స్ లక్షణాలు ఉన్నాయని గుర్తించినట్టు ఇజ్రాయెల్ ఆరోగ్య మంత్రిత్వ శాఖ తెలిపింది. విదేశాల నుంచి ఎవరైనా జ్వరం, గాయాలతో తిరిగివస్తే.. వెంటనే వైద్యులను సంప్రదించాలని సూచించింది. ఇతర అనుమానిత మంకీపాక్స్ కేసులను వైద్య బృందాలు దర్యాప్తు చేస్తున్నాయని మంత్రిత్వ శాఖలోని పబ్లిక్ హెల్త్ సర్వీసెస్ హెడ్ షారన్ అల్రోయ్-ప్రీస్ ఇజ్రాయెలీ ఆర్మీ రేడియోతో చెప్పారు. ఇజ్రాయెల్‌లో మంకీ పాక్స్ కేసు మధ్యప్రాచ్యంలో మొట్టమొదటిగా గుర్తించారు.

ప్రపంచ ఆరోగ్య సంస్థ (WHO) ప్రపంచవ్యాప్తంగా 80 కేసులను గుర్తించింది. అందులో దాదాపు 50 అనుమానిత కేసులను గుర్తించింది. మంకీ పాక్స్ కేసులు మశూచికి సంబంధించిన వ్యాధి మాదిరిగానే ఉన్నాయని తెలిపింది. అయితే ఈ కేసులు గతంలో మధ్య, పశ్చిమ ఆఫ్రికాతో సంబంధాలు ఉన్న వ్యక్తులలో మాత్రమే కనిపించాయి. కానీ, బ్రిటన్, స్పెయిన్, పోర్చుగల్, ఇటలీ, యుఎస్, స్వీడన్ కెనడాలోనూ ఇదే తరహా కేసులు నమోదు కావడం ఆందోళన కలిగిస్తోంది. గతంలో ఆఫ్రికాకు వెళ్లని యువకులలోనూ ఈ మంకీ పాక్స్ కేసులు బయటపడ్డాయి.

ఫ్రాన్స్, జర్మనీ, బెల్జియం, ఆస్ట్రేలియాలో కూడా మంకీ పాక్స్ కేసులను గుర్తించాయి. ఈ వైరస్ ప్రైమేట్స్ సాధారణంగా ఇతర అడవి జంతువులలో ఉద్భవిస్తుంటుంది. ఈ వ్యాధి సోకిన బాధితుల్లో చాలామందిలో జ్వరం, శరీర నొప్పులు, చలి, అలసట వంటి సమస్యలతో బాధపడుతున్నారని గుర్తించింది. ఈ వ్యాధి తీవ్రత అధికంగా ఉన్న కేసుల్లో ముఖం, చేతులు, శరీరంలోని ఇతర భాగాలపై దద్దుర్లు, గాయాలు ఏర్పడతాయి. మంకీ పాక్స్ లక్షణాల ఆధారంగా వ్యాధి తీవ్రతను అంచనా వేయొచ్చునని వైద్యనిపుణులు చెబుతున్నారు.

Read Also : Monkeypox cases : 11 దేశాల్లో 80 మంకీపాక్స్‌ కేసులు.. అయినా ఆందోళనక్కర్లేదు.. నిపుణుల సూచన!

×