Covaxin Phase 2-3 Trials : భారత్ బయోటెక్ కోవాగ్జిన్ : 2ఏళ్ల నుంచి 18ఏళ్ల పిల్లల్లో క్లినికల్ ట్రయల్స్‌కు అనుమతి
కోవాగ్జిన్ టీకా విషయంలో ప్రముఖ ఫార్మా కంపెనీ దిగ్గజం భారత్ బయోటెక్ ముందడగు వేసింది. రెండేళ్ల వయస్సు నుంచి 18ఏళ్ల వయస్సు ఉన్నవారిపై క్లినికల్ ట్రయల్స్ నిర్వహించేందుకు అనుమతి పొందింది.
- Published By: 10TV Digital Team ,Published On : May 12, 2021 / 10:47 AM IST
Bharat Biotech Covaxin Recommended For Phase 2 3 Trials On Those Aged Between 2 18 Years
Covaxin Phase 2-3 Trials : కోవాగ్జిన్ టీకా విషయంలో ప్రముఖ ఫార్మా కంపెనీ దిగ్గజం భారత్ బయోటెక్ ముందడగు వేసింది. రెండేళ్ల వయస్సు నుంచి 18ఏళ్ల వయస్సు ఉన్నవారిపై క్లినికల్ ట్రయల్స్ నిర్వహించేందుకు అనుమతి పొందింది. 2-18 వయస్సు వారిలో క్లినికల్ ట్రయల్స్ చేసేందుకు అనుమతి ఇవ్వాలంటూ భారత్ బయోటెక్ నిపుణుల కమిటిని విజ్ఞప్తి చేసింది. భారత్ బయోటెక్ అభ్యర్థనను నిపుణుల కమిటీ పరిశీలించింది.
ఫేజ్ 2, ఫేజ్ 3 క్లినికల్ ట్రయల్స్ నిర్వహించేందుకు నిపుణుల కమిటీ అనుమతినిచ్చింది. ఈ ట్రయల్స్ 2 నుంచి 18ఏళ్ల వయస్సు ఉన్న 525 మందిపై క్లినికల్ ట్రయల్స్ నిర్వహించనుంది. ఢిల్లీ, పాట్నా ఎయిమ్స్, నాగ్ పూర్ మెడిట్రినాలో క్లినికల్ ట్రయల్స్ జరుగనున్నాయి. సెంట్రల్ డ్రగ్స్ స్టాండర్డ్ కంట్రోల్ ఆర్గనైజేషన్ (CDSCO) లోని COVID-19 పై సబ్జెక్ట్ ఎక్స్‌పర్ట్ కమిటీ (SEC) మంగళవారం హైదరాబాద్‌కు చెందిన భారత్ బయోటెక్ దరఖాస్తును పరిశీలించింది.
2 నుండి 18 ఏళ్ల వయస్సు పిల్లల్లో కరోనావైరస్ వ్యాక్సిన్ ప్రతిపాదిత దశ II / III క్లినికల్ ట్రయల్ నిర్వహించడానికి కమిటీ సిఫార్సు చేసింది. గతంలో ఫిబ్రవరి 24 నాటి SEC సమావేశంలోనే ఈ ప్రతిపాదనపై చర్చించింది. సవరించిన క్లినికల్ ట్రయల్ ప్రోటోకాల్‌ను సమర్పించాలని సంస్థను కోరింది.
