Harish Rao: పోలవరం ప్రాజెక్టు మరో ఐదేళ్లైనా పూర్తి కాదు.. కాళేశ్వరంపై ప్రతిపక్షాలది అసత్య ప్రచారం: హరీష్ రావు
కాళేశ్వరం ప్రాజెక్టుపై ప్రతిపక్షాలు అసత్య ప్రచారం చేస్తున్నాయని విమర్శించారు తెలంగాణ మంత్రి హరీష్ రావు. అలాగే ఏపీలోని పోలవరం ప్రాజెక్టు మరో ఐదేళ్లైనా పూర్తి కాదని అభిప్రాయపడ్డారు.
- Published By: 10TV Digital Team ,Published On : November 13, 2022 / 06:05 PM IST
Harish Rao: ఆంధ్ర ప్రదేశ్‌లో నిర్మిస్తున్న పోలవరం ప్రాజెక్టు మరో ఐదేళ్లైనా పూర్తి కాదని అభిప్రాయపడ్డారు తెలంగాణ మంత్రి హరీష్ రావు. సిద్ధిపేట జిల్లాలో జరిగిన ఒక కార్యక్రమంలో హరీష్ రావు పాల్గొన్నారు. ఈ సందర్భంగా ఆయన మాట్లాడుతూ కాళేశ్వరం ప్రాజెక్టుపై ప్రతిపక్షాలు అసత్యాలు ప్రచారం చేస్తున్నాయని విమర్శించారు.
‘‘పోలవరం పనులపై అక్కడి ఇంజినీర్లతో మాట్లాడా. మరో ఐదేళ్లలో పోలవరం ప్రాజెక్టు పూర్తైతే గొప్పేనని ఇంజినీర్లు చెప్పారు. కాళేశ్వరం కంటే ముందే పోలవరం పనులు ప్రారంభమయ్యాయి. కాళేశ్వరం ప్రాజెక్టు పూర్తై, ఆ ఫలాల్ని తెలంగాణ ప్రజలు పొందుతున్నారు. కానీ, కేంద్రం చేపట్టిన జాతీయ ప్రాజెక్టు పోలవరం మాత్రం ఇంకా పూర్తి కాలేదు. ఆ ఫలితం ప్రజలకు అందడం లేదు. కాళేశ్వరం గురించి ప్రతిపక్షాలు అసత్య ప్రచారం చేస్తున్నాయి. ఒకే అబద్ధాన్ని పదేపదే చెప్పి నమ్మించే ప్రయత్నం చేస్తున్నాయి. కాళేశ్వరం ప్రాజెక్టు ఫలాల్ని అందుకుంటున్న మనం ఆ అబద్ధాలను తిప్పికొట్టాలి.
కాళేశ్వరం ప్రాజెక్టు గొప్పతనాన్ని చాటి చెప్పాలి. ప్రతిపక్షాలు ఢిల్లీలో, హైదరాబాద్‌లో కూర్చుని మాట్లాడితే ఏం తెలుస్తుంది. గ్రామాల్లోకి వెళ్లి చూస్తే కాళేశ్వరం ఫలాలు గ్రామాల్లో కనిపిస్తాయి’’ అని హరీష్ రావు వ్యాఖ్యానించారు.
