AP Liquor Policy: ఏపీ ఎక్సైజ్ శాఖ కీలక నిర్ణయం.. 271 షాపులకు రెండో విడత నోటిఫికేషన్.. దరఖాస్తులకు లాస్ట్ డేట్ ఇదే!
ఆంధ్రప్రదేశ్ రాష్ట్రంలో మద్యం దుకాణాల(AP Liquor Policy) కేటాయింపు ప్రక్రియ తుది దశకు చేరుకుంది.
- Published By: V Santhosh Kumar , Published On : October 10, 2026 / 09:22 PM IST
AP Excise Department issued second notification for 271 liquor shops
AP Liquor Policy: ఆంధ్రప్రదేశ్ రాష్ట్రంలో మద్యం దుకాణాల కేటాయింపు ప్రక్రియ తుది దశకు చేరుకుంది. నూతన మద్యం విధానంలో భాగంగా చేపట్టిన తొలి విడత లాటరీ ప్రక్రియ ముగిసిన అనంతరం, వివిధ కారణాల వల్ల మిగిలిపోయిన, లైసెన్సుదారులు వెనక్కి తగ్గిన దుకాణాల కేటాయింపుపై ఎక్సైజ్ శాఖ(AP Liquor Policy) ప్రత్యేక దృష్టి సారించింది. ఈ క్రమంలో రాష్ట్రంలో మిగిలి ఉన్న 271 మద్యం షాపులకు సంబంధించి రెండవ విడత నోటిఫికేషన్‌ను ఎక్సైజ్ శాఖ కమిషనర్ చామకూరి శ్రీధర్ అధికారికంగా విడుదల చేశారు.
ఈ నెల 19 వరకు దరఖాస్తులు.. 21న పారదర్శకంగా లాటరీ:
నూతన కేటాయింపుల్లో పాల్గొనాలనుకునే ఆసక్తి కలిగిన దరఖాస్తుదారులు ఈ నెల 19వ తేదీ అర్ధరాత్రి వరకు ఆన్‌లైన్ విధానంలో తమ దరఖాస్తులను సమర్పించవచ్చని అధికారులు తెలిపారు. అనంతరం ఈ నెల 21వ తేదీ ఉదయం 8 గంటల నుంచి పూర్తి పారదర్శకమైన పద్ధతిలో లాటరీ నిర్వహించి లైసెన్సుదారులను ఎంపిక చేయనున్నారు. ఈ రెండో విడత ప్రక్రియ పూర్తయిన వెంటనే రాష్ట్రవ్యాప్తంగా మద్యం సరఫరాను పూర్తిగా క్రమబద్ధీకరించేందుకు ప్రభుత్వం చర్యలు వేగవంతం చేస్తోంది.
జిల్లాల వారీగా ఖాళీలు.. వైఎస్సార్ కడపలో అత్యధికంగా 33 షాపులు:
జిల్లాల వారీ ఖాళీల వివరాలను పరిశీలిస్తే.. వైఎస్సార్ కడప జిల్లాలో అత్యధికంగా 33 దుకాణాలు, నెల్లూరులో 24, గుంటూరు, తిరుపతి జిల్లాల్లో 19 చొప్పున నోటిఫై చేశారు. పశ్చిమ గోదావరి (17), ప్రకాశం (16), అనంతపురం (15) జిల్లాల్లో గణనీయంగా ఖాళీలు ఉండగా, విశాఖపట్నం, విజయవాడ (ఎన్టీఆర్), కర్నూలు వంటి ప్రధాన ప్రాంతాల్లో చాలా తక్కువ సంఖ్యలో షాపులు అందుబాటులో ఉన్నాయి. దరఖాస్తుదారులు నిబంధనలు పాటించి గడువులోగా ప్రక్రియ పూర్తి చేయాలని అధికారులు సూచించారు.
