Tirumala Hundi Income: తిరుమల హుండీ ఆల్ టైమ్ రికార్డు.. శ్రీవారి చరిత్రలోనే మొదటిసారి.. ఒక్కరోజులో ఎన్నికోట్లు వచ్చాయో తెలుసా?
తిరుమల గిరులలో నిన్న ఒక్కరోజే రికార్డు స్థాయి హుండీ ఆదాయం(Tirumala Hundi Income) వచ్చినట్లు తిరుమల తిరుపతి దేవస్థానం అధికారులు వెల్లడించారు.
- Published By: V Santhosh Kumar , Updated On : September 10, 2026 / 8:37 PM IST
Record Hundi income for Tirumala Srivari 6.93 crore in a single day
- శ్రీవారి హుండీ అరుదైన రికార్డు
- ఒక్కరోజే రూ.6.93 కోట్ల రాబడి
- పాత రికార్డులను తుడిచిపెట్టిన ఆదాయం
Tirumala Hundi Income: కలియుగ వైకుంఠమైన తిరుమల దివ్యక్షేత్రంలో శ్రీవేంకటేశ్వరస్వామివారికి భక్తులు అర్పించే కానుకల రూపంలో ఊహించని రీతిలో భారీ ఆదాయం సమకూరింది. నిత్యం లక్షలాది మంది భక్తులతో కళకళలాడే తిరుమల గిరులలో నిన్న ఒక్కరోజే రూ. 6.93 కోట్ల రికార్డు స్థాయి హుండీ ఆదాయం (Tirumala Hundi Income)వచ్చినట్లు తిరుమల తిరుపతి దేవస్థానం అధికారులు వెల్లడించారు. భక్తుల రద్దీ నిరంతరం పెరుగుతుండటం, స్వామివారికి కానుకలు అర్పించే వారి సంఖ్య ఊహించని విధంగా పెరగడంతో ఈ స్థాయి ఆదాయం నమోదైంది. గతంలోనూ పలు సందర్భాల్లో హుండీ రాబడి మైలురాళ్లను తాకినప్పటికీ, ఒక్క రోజు వ్యవధిలోనే ఈ స్థాయిలో భారీమొత్తం రావడం తిరుమల చరిత్రలోనే ఒక అరుదైన, అద్భుతమైన ఘట్టంగా నిలిచింది.
చరిత్ర తిరగరాసిన శ్రీవారి హుండీ రాబడి.. గత రికార్డులు అన్నీ తుడిచిపెట్టుకుపోయాయ్:
తిరుమలలో స్వామివారి హుండీ రాబడి గతంలో కేవలం మూడుసార్లు మాత్రమే రూ.6 కోట్ల మార్కును దాటినట్లు టీటీడీ రికార్డులు చెబుతున్నాయి. అయితే, ఇప్పుడు నమోదైన రూ.6.93 కోట్లు ఆ పాత రికార్డులన్నింటినీ అధిగమించి, అత్యంత గరిష్ఠ ఆదాయంగా సరికొత్త అధ్యాయాన్ని లిఖించింది. వేసవి సెలవులు, వరుస సెలవుల కారణంగా ఏడుకొండలవాడి దర్శనానికి దేశ విదేశాల నుండి భక్తులు భారీగా పోటెత్తారు. శ్రీవారి దర్శనానంతరం తమ మొక్కుబడులను చెల్లించుకోవడంలో భాగంగా నగదు, బంగారం, వెండి వస్తువులను హుండీలో సమర్పించారు. భక్తుల రద్దీని దృష్టిలో ఉంచుకుని తితిదే అధికారులు భద్రతాపరమైన, వసతుల పరమైన చర్యలను మరింత వేగవంతం చేశారు.
