Gold Prices: వావ్.. బంగారం ధరలపై బంగారం లాంటి న్యూస్.. లైఫ్ టైమ్ చాన్స్.. మళ్లీ వస్తుందో రాదో!
ఇటీవలి కాలంలో పసిడి ధరలు (Gold Prices)స్వల్పంగా కోలుకున్నప్పటికీ, 2026 జనవరిలో నమోదైన ఆల్ టైమ్ రికార్డు స్థాయిలను మళ్లీ అందుకోవడం కష్టమేనని 'బిఎమ్ఐ' సంస్థ స్పష్టం చేసింది.
- Published By: V Santhosh Kumar , Published On : July 15, 2026 / 05:09 PM IST
BMI organization stated that gold prices would not rise to record levels this year
- రికార్డు ధరల నమోదు కష్టమే
- తగ్గుతున్న పసిడి సగటు అంచనా
- ఐదు కీలక అంశాల ప్రభావం
Gold Prices: పెట్టుబడిదారులకు ఎప్పుడూ అత్యంత సురక్షితమైన ఆశ్రయంగా నిలిచే బంగారం ధరల భవిష్యత్తుపై ప్రముఖ రేటింగ్ సంస్థ ఫిచ్ సొల్యూషన్స్కు చెందిన ‘బిఎమ్ఐ’ (BMI) ఒక కీలక నివేదికను వెల్లడించింది. మార్కెట్లో ఇటీవలి కాలంలో పసిడి ధరలు స్వల్పంగా కోలుకున్నప్పటికీ, 2026 జనవరిలో నమోదైన ఆల్ టైమ్ రికార్డు స్థాయిలను ఈ ఏడాది మళ్లీ అందుకోవడం చాలా కష్టమేనని ఆ సంస్థ స్పష్టం చేసింది. ముఖ్యంగా బలమైన యూఎస్ డాలర్, క్రమంగా సడలుతున్న భౌగోళిక రాజకీయ ఉద్రిక్తతల కారణంగా 2026 సగటు బంగారం ధరల అంచనాను బిఎమ్ఐ సవరించింది. ఈ అంచనాను ప్రతి ఔన్స్కు 4,600 డాలర్ల నుంచి ఏకంగా 4,400 డాలర్లకు తగ్గించడం గమనార్హం.
ధరలు తగ్గడానికి కారణమవుతున్న ఐదు కీలక అంశాలు:
బంగారం ధరల పెరుగుదలను అదుపులో ఉంచే ఐదు ముఖ్యమైన అంశాలను ఈ నివేదిక హైలైట్ చేసింది. మొదటిది, అమెరికా ఫెడరల్ రిజర్వ్ వడ్డీ రేట్లను 3.75% వద్దే స్థిరంగా ఉంచే అవకాశం ఉండటంతో బాండ్ ఈల్డ్స్ పెరిగి, వడ్డీ లేని ఆస్తి అయిన బంగారం(Gold Prices)పై పెట్టుబడులు తగ్గుతున్నాయి. రెండవది, యూఎస్ డాలర్ ఇండెక్స్ మరింత బలపడే అవకాశం ఉండటం వల్ల ఇతర కరెన్సీల కొనుగోలుదారులకు బంగారం ప్రియంగా మారుతోంది. ఇకపోతే, అమెరికా-ఇరాన్ ఒప్పందం తర్వాత గ్లోబల్ ట్రేడ్ మెరుగుపడటం, భౌగోళిక ఉద్రిక్తతలు, ద్రవ్యోల్బణ ఒత్తిళ్లు భారీగా తగ్గడం వల్ల పెట్టుబడిదారులు బంగారం నుంచి ఈక్విటీల వైపు వేగంగా మొగ్గు చూపుతున్నారు.
భవిష్యత్తు అంచనాలు ఎలా ఉండబోతున్నాయి?
మార్కెట్ పరిస్థితులు ఇలా ఉన్నప్పటికీ, కోవిడ్ పూర్వపు రోజుల్లో ఉన్నంత కనిష్ట స్థాయికి మాత్రం బంగారం ధరలు పడిపోవని బిఎమ్ఐ స్పష్టం చేసింది. ప్రపంచవ్యాప్తంగా వివిధ దేశాల సెంట్రల్ బ్యాంకులు నిరంతరం జరుపుతున్న భారీ పసిడి కొనుగోళ్లు మార్కెట్కు పెద్ద రక్షణ కవచంగా నిలుస్తున్నాయి. భవిష్యత్తులో ఒకవేళ ఫెడ్ వడ్డీ రేట్లను అనూహ్యంగా తగ్గిస్తే, అప్పుడు బంగారం ధర మళ్లీ ఊపందుకుని 4,500 డాలర్ల పైకి చేరవచ్చని నివేదిక తెలిపింది. అలా కాకుండా, యూఎస్ డాలర్ మరింత బలోపేతమైతే మాత్రం పసిడి ధరలు 3,500 డాలర్ల స్థాయికి పడిపోయే ప్రమాదం ఉందని సంస్థ అంచనా వేసింది.
