Cyclone Ditwah: 123 మంది ప్రాణాలు తీసిన దిత్వాహ్‌ తుపాను..
వారం రోజుల పాటు కొనసాగిన భారీ వర్షాల వల్ల వేలాది ఇళ్లు దెబ్బతిన్నాయి.
- Published By: 10TV Digital Team ,Published On : November 29, 2025 / 02:58 PM IST
Cyclone Ditwah In Sri Lanka
Cyclone Ditwah: శ్రీలంకలో దిత్వాహ్‌ తుపాను కారణంగా 123 మంది ప్రాణాలు కోల్పోయారు. మరో 130 మంది అదృశ్యమయ్యారు. తుపాను వల్ల శ్రీలంకలో భారీ వర్షాలు, వరదల ధాటికి ప్రజాజీవనం అస్తవ్యస్తమైంది.
అధికారులు తెలిపిన వివరాల ప్రకారం.. వారం రోజుల పాటు కొనసాగిన భారీ వర్షాల వల్ల వేలాది ఇళ్లు దెబ్బతిన్నాయి. 43,995 మందిని ప్రభుత్వ సంక్షేమ కేంద్రాలకు తరలించారు. తుపాను భారత వైపు కదులుతుందని, కానీ అప్పటికే శ్రీలంకలో భారీగా నష్టం జరిగిందని తెలిపిపారు. భద్రతా దళాల సాయంతో సహాయక చర్యలు కొనసాగుతున్నాయని తెలిపారు.
సోమవారం నుంచి వర్షాలు కురుస్తుండగా బుధవారం తుపాను తీరాన్ని తాకిన సమయంలో రికార్డు స్థాయిలో వర్షాలు కురిశాయి. లోతట్టు ప్రాంతాల్లో వరదలు తీవ్రంగా పెరగడంతో, కొలంబో నుంచి సముద్రంలో కలిసే కెలాని నది తీర ప్రాంతాల ప్రజలు ఇళ్లను ఖాళీ చేయాలని ఆదేశాలు జారీ చేశారు.
కెలాని నది శుక్రవారం సాయంత్రం పొంగి ప్రవహించడం వల్ల వందలాది మందిని తాత్కాలిక షెల్టర్లకు తరలించారు. దేశంలోని చాలాచోట్ల వర్షాలు తగ్గినా, శ్రీలంక ఉత్తర భాగంలో జల్లులు పడుతున్నాయి.
మోదీ సంతాపం.. భారత్‌ సాయం
బాధితులకు సాయం చేయడానికి భారత్‌ శనివారం తెల్లవారుజామున సహాయక సామగ్రి, స్నాక్స్‌, మందులు, దుస్తుల వంటివి శ్రీలంకకు విమానం ద్వారా తరలించింది.
శ్రీలంకలో జరిగిన ప్రాణనష్టం పట్ల భారత ప్రధాని నరేంద్ర మోదీ సంతాపం వ్యక్తం చేసి, మరింత సాయం చేసేందుకు సిద్ధమని తెలిపారు. శ్రీలంకలో నివాసితులను తరలించేందుకు సైనిక హెలికాప్టర్లు, పడవలను వాడుతున్నారు.
