US Census Data : అమెరికా జనాభా లెక్కలు విడుదల..తగ్గుతున్న శ్వేతజాతీయులు
అగ్రరాజ్యంలో శ్వేతజాతీయులు లేదా తెల్లజాతీయుల జనాభా వేగంగా తగ్గిపోతోంది. గత దశాబ్ద కాలంలో మొదటిసారిగా నల్లజాతీయులతో పోలిస్తే వీరి జనాభా గణనీయంగా తగ్గింది. తాజా అమెరికా జనాభా లెక్కలను ఆ దేశ సెన్సస్ బ్యూరో గురువారం విడుదల చేసింది.
- Published By: 10TV Digital Team ,Published On : August 13, 2021 / 09:35 PM IST
Usa
US Census Data అగ్రరాజ్యంలో శ్వేతజాతీయులు లేదా తెల్లజాతీయుల జనాభా వేగంగా తగ్గిపోతోంది. గత దశాబ్ద కాలంలో మొదటిసారిగా నల్లజాతీయులతో పోలిస్తే వీరి జనాభా గణనీయంగా తగ్గింది. తాజా అమెరికా జనాభా లెక్కలను ఆ దేశ సెన్సస్ బ్యూరో గురువారం విడుదల చేసింది. 2010లో 63.8 శాతం ఉన్న శ్వేతజాతీయుల జనాభా 2020 నాటికి 59.7 శాతానికి పడిపోయిందని యూఎస్ సెన్సస్ బ్యూరో తెలిపింది. మొత్తంగా 2010 నుంచి తెల్లజాతీయుల జనాభా 8.6శాతం తగ్గిందని తెలిపింది. అమెరికాలో తెల్లజాతీయుల జనాభా ఇంత వేగంగా పడిపోవడం ఇదే తొలిసారి. శ్వేతజాతి ప్రజలు ఆలస్యంగా వివాహాలు చేసుకోవడం, తక్కువ మంది పిల్లలను కనడంతో ఈ ధోరణి కనిపిస్తోందని తాజా అధ్యయనాలు చెబుతున్నాయి.
యూఎస్ సెన్సస్ డేటా ప్రకారం…ఐరోపా, పశ్చిమాసియా మూలాలు ఉన్న తెల్లజాతి అమెరికన్ల జనాభా 2010లో 19.6 కోట్లు ఉండగా.. 2020 నాటికి 19.1 కోట్లకు తగ్గింది. హిస్పానిక్ (స్పానిష్, లాటిన్ అమెరికా మూలాలు ఉన్నవారు) జనాభా కాలిఫోర్నియాలో 37.6 శాతం నుంచి 39.4 శాతానికి పెరిగింది. అయితే ఈ ప్రాంతంలో శ్వేతజాతీయుల జనాభా మాత్రం 40.1 శాతం నుంచి 34.7 శాతానికి పడిపోయింది. 2020 నాటికి దేశవ్యాప్తంగా హిస్పానిక్స్ సంఖ్య 6.2 కోట్లగా నమోదైంది. అయితే బహుళజాతులకు చెందిన వారి సంఖ్య పెరుగుదలే ఈ గణాంకాలపై ప్రభావం చూపించిందని నిపుణులు పేర్కొంటున్నారు. 2010లో వీరి జనాభా 90 లక్షలు ఉండగా.. 2020కి ఆ సంఖ్య 3.3 కోట్లకు చేరింది. ప్రస్తుతం ఉన్న అమెరికా జనాభాలో 10 శాతం వీరే ఉన్నారు.
పెరిగిన భారతీయ అమెరికన్లు-ఆసియన్ల జనాభా
మరోవైపు, అగ్రరాజ్యంలో భారతీయ అమెరికన్ల జనాభా పెరిగినట్లు అమెరికా సెన్సెస్ బ్యూరో తెలిపింది. ఇక, గడిచిన దశాబ్దంలో ఆసియా అమెరికన్ల జనాభా జనాభా మూడు వంతులు పెరిగినట్లు పేర్కొంది. 2020 నాటికి వీరి జనాభా 2.4 కోట్లకు చేరినట్లు తెలిపింది. శ్వేతజాతీయులు, ఆసియా, అమెరికన్ ఇండియన్, హవాయియన్, నల్లజాతి, పసిఫిక్ దీవుల వారు మినహా ఇతర జాతుల వారి సంఖ్య దాదాపు 5 కోట్లకు చేరింది. ఇది 4.6 కోట్లగా ఉన్న నల్లజాతి వారి జనాభా కంటే ఎక్కువ.
మొత్తం అమెరికా జనాభా
ఇక,18 ఏళ్ల కంటే తక్కువ వయసు ఉన్న వారి జనాభా స్వల్పంగా తగ్గింది. అమెరికాలో వీరి జనాభా 2010లో 7.4 కోట్లు ఉండగా 2020లో అది 7.3 కోట్లుగా నమోదైంది. గత దశాబ్దంలో దేశంలోని వయోజన జనాభా వేగంగా పెరిగింది. మొత్తంగా 2020 నాటికి అమెరికాలో 331.4 మిలియన్ల మంది(33 కోట్ల 14లక్షలు)అమెరికాలో నివసిస్తున్నట్లు యూఎస్ సెన్సస్ డేటా తెలిపింది. ఇందులో 25 కోట్ల 83 లక్షల మంది పెద్దవారు(18 సంవత్సరాలు లేదా అంతకంటే) ఉన్నారని తెలిపింది. 1946 మరియు 1964 మధ్య జన్మించిన వారు, 2021లో 57 నుండి 75 సంవత్సరాల వయస్సులో ఉన్నారు వయోజన జనాభాలో పెరుగుదలను పాక్షికంగా నడిపిస్తోందని తెలిపింది. మరోవైపు, అగ్రరాజ్యంలో గడిచిన పదేళ్లలో మెట్రో నగరాలకు వలసలు పెరిగాయి. దాదాపు 80 శాతం మెట్రో నగరాల్లో జనాభా పెరిగింది. అయితే ఈ కొత్త గణాంకాలు 2022లో రానున్న ఎన్నికలపై తీవ్ర ప్రభావం చూపే అవకాశం ఉందని విశ్లేషకులు భావిస్తున్నారు.
