గూగుల్ ఆఫీసులో నల్లుల గోల.. ఉద్యోగులు చెంగు చెంగున ఎగరకముందే ఏం చేశారంటే?
నల్లుల వ్యాప్తి నివారణ కోసం గూగుల్ హడ్సన్‌ స్క్వేర్‌ క్యాంపస్‌ సహా న్యూయార్క్‌లోని ఇతర ఆఫీసుల్లోనూ జాగ్రత్తలు తీసుకుంటున్నారు.
- Published By: 10TV Digital Team ,Published On : October 21, 2025 / 02:45 PM IST
Bed bug: టెక్‌ దిగ్గజం గూగుల్‌కు న్యూయార్క్‌లోని ఆఫీసులో అనూహ్య సమస్య ఎదురైంది. న్యూయార్క్‌ సిటీ చెల్సియా క్యాంపస్‌లో నల్లులు (బెడ్ బగ్‌) వ్యాపిస్తున్నాయి. దీంతో ఉద్యోగులకు తాత్కాలికంగా వర్క్‌ ఫ్రమ్ హోమ్‌ ఇచ్చారు.
పేజ్‌ సిక్స్ వెబ్‌సైట్‌లో పేర్కొన్న వివరాల ప్రకారం.. అక్టోబర్‌ 19-20 తేదీల్లో గూగుల్ పర్యావరణ, ఆరోగ్య, భద్రత విభాగం ఉద్యోగులకు ఇంటర్నల్‌ ఈ-మెయిల్స్‌ పంపింది. వాటిని పరిశీలించాక పలు వివరాలు తెలిశాయని పేజ్‌ సిక్స్ పేర్కొంది. (Bed bug)
చెల్సియా ఆఫీసుని ఆదివారం మూసివేశారు. నల్లులు, పురుగుల నియంత్రణ చర్యలు తీసుకున్నాక సోమవారం ఉదయం నుంచి సిబ్బందిని తిరిగి ఆఫీసులోకి అనుమతించారు. నల్లుల వ్యాప్తి నివారణ కోసం గూగుల్ హడ్సన్‌ స్క్వేర్‌ క్యాంపస్‌ సహా న్యూయార్క్‌లోని ఇతర ఆఫీసుల్లోనూ జాగ్రత్తలు తీసుకుంటున్నారు.
Also Read: దీపావళికి బోనస్‌ ఇవ్వలేదని రచ్చ రచ్చ చేసిన ఉద్యోగులు.. చివరకు కంపెనీ ఏం చేసిందో తెలుసా?
గూగుల్ ఆఫీసుల్లో నల్లులు వ్యాప్తి చెందడం ఇది తొలిసారి కాదు. 2010లో అవెన్యూ-9 ఆఫీసులోనూ ఇలాగే నల్లుల వ్యాప్తి చోటుచేసుకుంది. అయితే, న్యూయార్క్‌ సిటీలో ఈ సమస్యను తగ్గించడంలో అధికారులు పురోగతి సాధించారు. ఆఫీసులోని పెద్ద బొమ్మలలో బెడ్ బగ్స్ ఉండవచ్చని, అక్కడి నుంచే నల్లులు వ్యాపిస్తుండొచ్చని ప్రచారం జరుగుతోంది.
అధిక జనసాంద్రత, పర్యాటకుల తాకిడి, పూర్తిస్థాయిలో పరిశుభ్రతలేకపోవడం వంటి సమస్యలతో బెడ్ బగ్స్ వ్యాపిస్తున్నాయి. పరిశోధనల ప్రకారం న్యూయార్క్‌లో నెలకు సగటున 5,680 బెడ్ బగ్‌ సంబంధిత ఆన్‌లైన్‌ సెర్చ్‌లు జరుగుతున్నాయి.
బెడ్ బగ్‌ను పూర్తిగా నిర్మూలించటం కష్టం. ఎందుకంటే అవి మానవ వాతావరణంలో సులభంగా విస్తరిస్తాయి. బట్టలు, లగేజీ, ఫర్నీచర్‌ ద్వారా ఒకచోటు నుంచి మరో చోటుకు వెళ్తాయి.
