Killer DEHP: బాబోయ్.. షాంపూలు, కర్టెన్స్‌లోని ఈ విష రసాయనం మీ ప్రాణాలకే ప్రమాదం..!- షాకింగ్ స్టడీ..

ప్లాస్టిక్‌ను మరింత సరళంగా(ఫ్లెక్సిబుల్) చేయడానికి ఉపయోగించే DEHP.. ఆహార ప్యాకేజింగ్, వినైల్ ఫ్లోరింగ్, షవర్ కర్టెన్లు, షాంపూ, సౌందర్య సాధనాలుతో పాటు IV బ్యాగులు, కాథెటర్ల వంటి వైద్య పరికరాలతో సహా విస్తృత శ్రేణి వినియోగ వస్తువుల్లో కనిపిస్తుంది.

Killer DEHP: గృహోపకరణాలు, వ్యక్తిగత సంరక్షణ ఉత్పత్తుల్లో సాధారణంగా కనిపించే ప్లాస్టిక్ సంకలితం di-2-ethylhexyl phthalate (DEHP) 2018లో 55 నుండి 64 సంవత్సరాల వయస్సు గల వారిలో 3 లక్షల 56వేల కంటే ఎక్కువ హృదయ సంబంధ మరణాలకు కారణమైందని ఒక కొత్త అధ్యయనం కనుగొంది. బయో మెడిసిన్‌లో ప్రచురించబడిన ఈ పరిశోధన థాలేట్‌లు గుండెలో మంటను ఎలా ప్రేరేపిస్తాయో, ప్రాణాంతక ఫలితాలకు ఎలా దోహదపడతాయో హైలైట్ చేస్తుంది. దక్షిణాసియా, తూర్పు ఆసియా, మధ్యప్రాచ్యం వంటి ప్రాంతాల్లో దాదాపు 75శాతం మరణాలు చోటు చేసుకున్నాయి. భారత్ లో అత్యధిక మరణాలు నమోదయ్యాయి.

అనేక సాధారణ ప్లాస్టిక్ ఉత్పత్తులలో కనిపించే సింథటిక్ రసాయనాలు థాలేట్స్ వల్ల కలిగే గణనీయమైన ఆరోగ్య ప్రమాదాలపై ఒక సంచలనాత్మక అధ్యయనం వెలువడింది. న్యూయార్క్ విశ్వవిద్యాలయంలోని గ్రాస్‌మన్ స్కూల్ ఆఫ్ మెడిసిన్ పరిశోధకులు ఒక నిర్దిష్ట థాలేట్, డి(2-ethylhexyl)థాలేట్ (DEHP)కి గురికావడం వల్ల 2018లో 55 నుండి 64 సంవత్సరాల వయస్సు గల వారిలో హృదయ సంబంధ వ్యాధుల వల్ల 3లక్షల 56వేల కంటే ఎక్కువ మంది మరణించారని కనుగొన్నారు.

ప్లాస్టిక్‌ను మరింత సరళంగా(ఫ్లెక్సిబుల్) చేయడానికి ఉపయోగించే DEHP.. ఆహార ప్యాకేజింగ్, వినైల్ ఫ్లోరింగ్, షవర్ కర్టెన్లు, షాంపూ, సౌందర్య సాధనాలుతో పాటు IV బ్యాగులు, కాథెటర్ల వంటి వైద్య పరికరాలతో సహా విస్తృత శ్రేణి వినియోగ వస్తువుల్లో కనిపిస్తుంది. ది లాన్సెట్ ఇ బయోమెడిసిన్‌లో ప్రచురించబడిన ఈ అధ్యయనం 200 దేశాలు మూత్ర నమూనాలను ఉపయోగించి ఎక్స్‌పోజర్ స్థాయిలను పరిశీలించి, విచ్ఛిన్నమైన రసాయనం వ్యక్తుల శరీరంలోకి ఎంతవరకు ప్రవేశించిందో అంచనా వేసింది. ఆ తర్వాత ఫలితాలను ప్రపంచ హృదయ సంబంధ మరణ గణాంకాలతో పోల్చారు.

Also Read: చికెన్ ప్రియులకు షాకింగ్ న్యూస్.. చికెన్ తింటే క్యాన్సర్..! తాజా అధ్యయనంలో విస్తుగొలిపే విషయాలు..

సీనియర్ అధ్యయన రచయిత డాక్టర్ లియోనార్డో ట్రాసాండే ప్రకారం, DEHP “కరోనరీ ధమనులలో వాపు” కు దోహదం చేస్తుంది. ఇది ఇప్పటికే ఉన్న గుండె సమస్యలను మరింత దిగజార్చి ప్రాణాంతక ఫలితాలకు దారితీయవచ్చు. జీవక్రియ, గుండె ఆరోగ్యం వంటి ముఖ్యమైన జీవ సంబంధమైన విధులను నియంత్రించే హార్మోన్లతో జోక్యం చేసుకునే ఎండోక్రైన్ డిస్ట్రప్టర్లుగా థాలేట్‌ల పాత్రను డాక్టర్ ట్రాసాండే కూడా నొక్కి చెప్పారు.

థాలేట్‌లు ఇప్పటికే పురుషుల పునరుత్పత్తి సమస్యలకు, వీర్యకణాల సంఖ్య తగ్గడం, టెస్టోస్టెరాన్ అంతరాయం, జననేంద్రియ అసాధారణతలతో సంబంధం కలిగి ఉండటం వల్ల బాగా ప్రసిద్ధి చెందాయి. అవి ఉబ్బసం, ఊబకాయం, మధుమేహం కొన్ని క్యాన్సర్లతో కూడా సంబంధం కలిగి ఉన్నాయి. ముఖ్యంగా DEHP.. పునరుత్పత్తి హాని, క్యాన్సర్‌ను కలిగించే సామర్థ్యం కలిగుంది.

DEHP సంబంధిత హృదయ సంబంధ మరణాలు భారత్ లో అత్యధికంగా (1,03,000) సంభవించాయి. ఆ తర్వాత చైనా, ఇండోనేషియాలో మరణాల సంఖ్య ఎక్కువగా ఉంది. వేగవంతమైన పారిశ్రామికీకరణ, ప్లాస్టిక్ ఉత్పత్తిపై తక్కువ నియంత్రణ పరిమితుల కారణంగా ఈ ప్రాంతాల్లో ఆ సమస్య ఎక్కువగా ఉందని గుర్తించారు.

థాలేట్లు ఎంత ప్రబలంగా ఉన్నాయో చూస్తే వాటిని పూర్తిగా నివారించడం కష్టం కావచ్చు. అయితే, ఎక్స్‌పోజర్‌ను తగ్గించడానికి నిపుణులు అనేక ఆచరణాత్మక దశలను సూచిస్తున్నారు.

* వినియోగదారులు ప్లాస్టిక్ కంటైనర్లలో ఆహారాన్ని మైక్రోవేవ్ చేయవద్దని సలహా ఇస్తున్నారు. ఎందుకంటే వేడి వల్ల రసాయనాలు ఆహారంలోకి కలుస్తాయి.
* ఆహార నిల్వ కోసం గాజు, స్టెయిన్‌లెస్ స్టీల్ లేదా సిరామిక్ కంటైనర్లను ఉపయోగించడం మంచిది.
* అదనంగా, ప్రజలు సువాసన లేని వ్యక్తిగత సంరక్షణ, శుభ్రపరిచే ఉత్పత్తులను ఎంచుకోవాలి.
* ఎయిర్ ఫ్రెషనర్‌లను నివారించాలి
* ప్లాస్టిక్ రీసైక్లింగ్ లేబుల్‌లను తనిఖీ చేయాలి. 3, 6, 7 కోడ్‌లతో గుర్తించబడిన ఉత్పత్తులను తొలగించాలి.

అల్ట్రా ప్రాసెస్డ్ ఆహార పదార్థాల వాడకాన్ని తగ్గించడం వల్ల రసాయనాల ప్రభావాల స్థాయిలు తగ్గుతాయని అధ్యయనకర్తలు తెలిపారు.

DEHP, ఇతర థాలేట్‌లపై కఠినమైన ప్రపంచ నిబంధనల ఆవశ్యకతను పరిశోధకులు నొక్కి చెప్పారు. ప్రపంచవ్యాప్తంగా థాలేట్‌ రసాయనాలు మానవ ఆరోగ్యానికి అపారమైన ప్రమాదాన్ని కలిగిస్తాయని తేల్చి చెప్పారు.