Navanethem Navi Pillay : తండ్రి బస్ డ్రైవర్.. భారత సంతతి మహిళకు నోబెల్ శాంతి బహుమతి.. నవీ పిళ్ళై ఎవరంటే?
Navanethem Navi Pillay : వర్ణవివక్షకు వ్యతిరేకంగా జరిగిన పోరాటం నుంచి అంతర్జాతీయ న్యాయస్థానం వరకు న్యాయానికి ఆదర్శంగా నిలిచిన భారత సంతతికి చెందిన దక్షిణాఫ్రికా న్యాయవాది నవీ పిళ్ళై 2026 నోబెల్ శాంతి బహుమతిని అందుకున్నారు.
- Published By: Sreehari A , Updated On : October 9, 2026 / 5:58 PM IST
Navanethem Navi Pillay
- 2026 సంవత్సరానికి ప్రతిష్టాత్మక నోబెల్ శాంతి బహుమతి
- అంతర్జాతీయ చట్టం, మానవ హక్కుల పరిరక్షణకు జీవితం అంకితం
- వర్ణవివక్షకు వ్యతిరేకంగా పోరాడిన మొట్టమొదటి నల్లజాతి మహిళా న్యాయవాది
Navanethem Navi Pillay : అణచివేతపై అక్షరాలనే ఆయుధంగా మలుచుకుని, న్యాయం కోసం దశాబ్దాలపాటు పోరాడిన నవనీతమ్‌ ‘నవీ’ పిళ్ళైకి 2026 నోబెల్ శాంతి బహుమతి లభించింది. అంతర్జాతీయ చట్టాన్ని బలోపేతం చేయడం, యుద్ధ నేరాలు, మానవత్వానికి వ్యతిరేకమైన నేరాలు, మారణహోమాలకు పాల్పడిన వారిని న్యాయస్థానం ముందు నిలబెట్టడంలో ఆమె చేసిన కృషికి ఈ పురస్కారం దక్కింది. భారతీయ తమిళ మూలాలున్న ఆమె ప్రస్థానం ఎంతోమందికి స్ఫూర్తిదాయకం.
పేదరికం నుంచి ప్రతిష్ఠాత్మక విద్య వరకు
1941 సెప్టెంబర్ 23న దక్షిణాఫ్రికాలోని డర్బన్‌లో పిళ్ళై జన్మించారు. ఆమె తాత 1890లలో బ్రిటిష్ వలస పాలన కాలంలో చెరకు తోటల్లో పనిచేసేందుకు భారత్ నుంచి దక్షిణాఫ్రికాకు వలస వెళ్లారు. బస్సు డ్రైవర్‌గా పనిచేసిన తండ్రి నారాయణస్వామి, తల్లి శాంతమా నాయుడు ఆమెను సంప్రదాయ విలువలతో పెంచారు.
స్థానిక భారతీయ సమాజం, దాతల సహకారంతో చదువుకున్న ఆమె నాటల్ యూనివర్శిటీలో డిగ్రీ, న్యాయ విద్యను అభ్యసించారు. అనంతరం అమెరికాలోని హార్వర్డ్ లా స్కూల్‌లో ఉన్నత విద్యను పూర్తి చేసి, 1988లో న్యాయశాస్త్రంలో డాక్టరేట్ పొందారు.
వర్ణవివక్షపై న్యాయపోరాటం :
చదువు పూర్తిచేసుకుని స్వదేశానికి తిరిగొచ్చిన ఆమెకు వర్ణవివక్ష కారణంగా న్యాయ సంస్థల్లో ఉద్యోగం దొరకలేదు. అయినా వెనక్కి తగ్గకుండా 1967లో డర్బన్‌లో సొంత న్యాయ సంస్థను ప్రారంభించారు. నాటల్ ప్రాంతంలో అలా చేసిన తొలి నల్లజాతి మహిళగా చరిత్ర సృష్టించారు. రాజకీయ ఖైదీలు, వర్ణవివక్ష వ్యతిరేక కార్యకర్తల తరఫున వాదిస్తూ, వారి హక్కుల కోసం పోరాడారు.
అంతర్జాతీయ న్యాయరంగంలో కీలక పాత్ర :
1995లో నెల్సన్ మండేలా ప్రభుత్వం ఆమెను దక్షిణాఫ్రికా హైకోర్టు న్యాయమూర్తిగా నియమించింది. 1999లో రువాండా అంతర్జాతీయ క్రిమినల్ ట్రిబ్యునల్ న్యాయమూర్తిగా, అనంతరం అధ్యక్షురాలిగా సేవలందించారు. లైంగిక హింసను మానవత్వానికి వ్యతిరేకమైన నేరాలు, మారణహోమంతో ముడిపడిన నేరాలుగా పరిగణించడంలో ఆమె కీలక పాత్ర పోషించారు.
2003లో అంతర్జాతీయ క్రిమినల్ కోర్టులో న్యాయమూర్తిగా బాధ్యతలు చేపట్టిన పిళ్ళై.. 2008 నుంచి 2014 వరకు ఐక్యరాజ్యసమితి మానవ హక్కుల హైకమిషనర్‌గా పనిచేశారు. ప్రపంచవ్యాప్తంగా బాధితుల హక్కులు, మహిళలు, పిల్లల రక్షణ, జాతి వివక్ష నిర్మూలన కోసం గళమెత్తారు. తన జీవితాంతం అణగారిన మానవాళి హక్కుల కోసం నిర్భయంగా పోరాడారు.
