Kalyan Ram : ‘అమిగోస్’ ఎందుకు ఫ్లాప్ అయింది? ‘డెవిల్’ ప్రమోషన్స్ లో కళ్యాణ్ రామ్ ఎక్స్‌క్లూజివ్ ఇంటర్వ్యూ..

డెవిల్ సినిమా ప్రమోషన్స్ లో భాగంగా కళ్యాణ్ రామ్ తాజాగా మీడియాతో ముచ్చటించి పలు ఆసక్తికర విషయాలను తెలియచేశారు.

Nandamuri Kalyan Ram Exclusive Interview about Devil Movie

Nandamuri Kalyan Ram : సినిమా జయాపజయాలతో సంబంధం లేకుండా వరుస సినిమాలు చేస్తూ ప్రేక్షకులని అలరిస్తున్నారు కళ్యాణ్ రామ్. ఇటీవల బింబిసార(Bimbisara) సినిమాతో చాలా గ్యాప్ తర్వాత హిట్ కొట్టిన కళ్యాణ్ రామ్ ఇప్పుడు ‘డెవిల్'(Devil) సినిమాతో రాబోతున్నారు. ‘డెవిల్’- ది బ్రిటీష్ సీక్రెట్ ఏజెంట్ అనే ట్యాగ్ లైన్ తో రాబోతుంది ఈ సినిమా. అభిషేక్ పిక్చ‌ర్స్ బ్యాన‌ర్‌పై అభిషేక్ నామా ద‌ర్శ‌క నిర్మాత‌గా సంయుక్త మీనన్ హీరోయిన్ గా తెరకెక్కిన డెవిల్ సినిమా డిసెంబ‌ర్ 29న ప్ర‌పంచ వ్యాప్తంగా రిలీజ్ కాబోతుంది. ఈ సినిమా ప్రమోషన్స్ లో భాగంగా కళ్యాణ్ రామ్ తాజాగా మీడియాతో ముచ్చటించి పలు ఆసక్తికర విషయాలను తెలియచేశారు. మీడియా ప్రతినిధులు అడిగిన పలు ప్రశ్నలకు సమాధానాలు చెప్పారు.

‘అమిగోస్’ సినిమా ఎందుకు ఆశించిన ఫలితం ఇవ్వలేదు?

ప్రేక్షకులకు కొత్త సినిమాలను అందించడానికి నేను ఎప్పుడూ ప్రయత్నిస్తుంటాను. ఒక్కోసారి కమర్షియల్ అంశాలు ఎలిమెంట్స్ మిస్ అవుతుంటాను. అమిగోస్ సినిమా విషయానికి వస్తే అందులో డాపల్ గ్యాంగర్ అనే కొత్త కాన్సెప్ట్ ఉంది. దాన్ని చెప్పే క్రమంలో ఎక్కడో ఇంకొన్ని కమర్షియల్ ఎలిమెంట్స్ యాడ్ చేయాలనే ఆలోచన నాకు ఆ రోజు రాలేదు. డైరెక్టర్ తో కూర్చుని మాట్లాడి ఆ పని చేయాల్సింది. ఆ తప్పు నాదే. అందువల్ల మిస్ ఫైర్ అయ్యిందని అనుకుంటున్నాను. ఈ సినిమా విషయంలో కమర్షియల్ అంశాలు ఉండేలా చూసుకున్నాను. ఇన్వెస్టిగేటివ్ మూవీలో కమర్షియల్ ఎలిమెంట్స్ మిక్స్ అయ్యి ఉండటం నాకు కొత్తగా అనిపించింది. ఇది పక్కా ఫిక్షనల్ మూవీ.

డెవిల్ ప్రయాణం గురించి..

2021లో శ్రీకాంత్ విస్సా వచ్చి నాకు డెవిల్ కథను నెరేట్ చేశారు. 1940 బ్యాక్ డ్రాప్‌తో సాగే ఆ కథలో హీరో క్యారెక్టర్ డిఫరెంట్‌గా అనిపించింది. షెర్లాక్ హోమ్స్ సినిమాలలో లాగా ఇన్వెస్టిగేటివ్ తరహా సినిమా డెవిల్. కథ వినగానే నన్ను దృష్టిలో పెట్టుకునే ఈ కథను రాశారా అని అడిగాను. నేను దీన్ని కథగానే చేశాను. అభిషేక్‌ నామాగారు మీకు నెరేట్ చేయమంటే కమర్షియల్ హీరో కదా, ఆయన ఒప్పుకుంటారా అని అన్నారని చెప్పాడు. అప్పుడు నేను శ్రీకాంత్‌కి రెండు విషయాలు చెప్పాను. హీరో క్యారెక్టర్, బ్యాక్ డ్రాప్ అలాగే ఉండనిచ్చి కమర్షియల్ పంథాలో స్క్రిప్ట్ లో మార్పులు చేస్తే సినిమా చేద్దామని అన్నాను. అప్పటికే బింబిసార సినిమా సగం పైగానే పూర్తయ్యింది. మనం ఎలాంటి సినిమా చేస్తున్నాం. ఎలా వస్తుందనేది అప్పటికే ఓ ఆలోచనకు వస్తుంది. కాబట్టి శ్రీకాంత్‌కి స్క్రిప్ట్ లో మార్పులు చేయాలని సూచించాను. దాంతో శ్రీకాంత్ రెండు, మూడు నెలలు కూర్చుని కథ మార్పులు చేశారు. తర్వాత స్క్రిప్ట్ వర్క్ చేశాం. స్క్రిప్ట్ పూర్తవ్వడానికి ఏడాది సమయం పట్టింది. మేకింగ్ కోసం ఏడాది సమయం పట్టింది.

డెవిల్ సినిమాలో పాత్ర గురించి..

ఈ పాత్రను చేసేటప్పుడు నేనేమీ ప్రత్యేకమైన పద్ధతులను పాటించలేదు. కథలో ఉండే క్యారెక్టర్ మనకు కొత్తగా అనిపిస్తే మన డైలాగ్ డెలివరీ, నటించే పద్ధతి అన్నీ మారిపోతాయి. అలాగే ఇందులో కూడా. డెవిల్ సినిమాలో హై మూమెంట్స్, దేశభక్తి గురించి సినిమా చూడాల్సిందే.

డెవిల్ సినిమాకు హర్షవర్ధన్ రామేశ్వర్ మ్యూజిక్ ఇచ్చాడు, అతని గురించి..

హర్షవర్ధన్ రామేశ్వర్ గురించి అర్జున్ రెడ్డి సినిమాకు బ్యాక్ గ్రౌండ్ స్కోర్ చేశారని అభిషేక్ నామాగారు చెప్పారు. తనే డెవిల్ సినిమాకు సంగీతాన్ని అందిస్తున్నారని చెప్పారు. అర్జున్ రెడ్డి సినిమాకు హర్ష అందించిన BGM చాలా బాగుంది. డెవిల్ లో పాటలు ఓ వైపు ఉంటే, బ్యాక్ గ్రౌండ్ స్కోర్ దాన్ని బ్యాలెన్స్ చేసేలా ఉండాలి. బింబిసారలో కీరవాణిగారిలా న్యాయం చేస్తాడా అనిపించింది. కానీ సినిమా చూసిన తర్వాత హ్యాపీగా అనిపించింది.

ఈ సినిమాలో హీరోయిన్స్ గురించి..

సంయుక్తా మీనన్, మాళవికా నాయర్ పాత్రలు చాలా బాగుంటాయి. వీరి పాత్రలే కాదు.. ప్రతీ పాత్రకు కథలో ప్రాముఖ్యత ఉంటుంది. హీరోకు సమానంగా సంయుక్తా మీనన్ క్యారెక్టర్‌కి ఇంపార్టెన్స్ ఉంటుంది.

Also Read : Devara Teaser : ‘దేవర’ టీజర్ రెడీ అయిపోయింది.. హైప్ పెంచిన అనిరుధ్.. రిలీజ్ ఎప్పుడు?

నిర్మాతగా మీరు ఎలాంటి జాగ్రత్తలు తీసుకుంటారు?

నటనలో ఎంత కష్టపడాలో ప్రొడక్షన్‌లో అంతకు మించి కష్టపడాలి. ఓం సినిమా విషయంలో నాకు ఆ విషయం అర్థమైంది. ఆ తర్వాత మా బ్యానర్ లో చేసే సినిమాలకు సంబంధించిన కథ వింటాను. మిగిలిన విషయాలను మా హరిగారు చూసుకుంటారు.

డెవిల్ కి సీక్వెల్ ఉంటుందా?

డెవిల్ సినిమాకు సీక్వెల్ గురించి ఓసారి డిస్కషన్ చేశాం. 40-50 శాతం స్క్రిప్ట్ వర్క్ అయితే చేశాం. ఓ దశలో షూటింగ్ కూడా చేయాలనుకున్నాం. కానీ ఆ తర్వాత వద్దనుకున్నాం. డిసెంబర్ 29న డెవిల్ సినిమాకు వచ్చిన రెస్పాన్స్ చూసి సీక్వెల్ అనౌన్స్ చేస్తాం.

మీ తర్వాతి సినిమాలు..

ఇప్పుడు ఓ సినిమా సెట్స్ పై ఉంది. దాని తర్వాతే బింబిసార 2 స్టార్ట్ చేస్తాను.

దేవర సినిమా గురించి..

మేము చేసే సినిమాలు గొప్పగా ఉండాలని అనుకుంటాం. అందుకనే ఔట్‌పుట్ విషయంలో జాగ్రత్తలు తీసుకుంటాం. నేను, తారక్ దేవర విషయంలో క్లియర్ గా ఉన్నాం. ఇద్దరికీ మాకొక క్లారిటీ వచ్చి క్లియర్‌గా లేకపోతే దేని గురించి స్పందించకూడదని నిర్ణయించుకున్నాం. త్వరలోనే టీజర్ వస్తుంది. సగంపైగా షూటింగ్ పూర్తయింది.

Also Read : Pooja Hegde : వెండితెరపై బుట్టబొమ్మ పని అయిపోయిందా? ఓటీటీ బాట పట్టిన పూజా హెగ్డే?