సౌత్ సినిమాల్లో చాన్స్ .. ఎగబడుతున్న బాలివుడ్ హీరోలు
- Published By: veegamteam ,Published On : April 4, 2019 / 05:40 AM IST
ఆ రోజుల్లో సౌత్ ఇండియన్ యాక్టర్స్ బాలివుడ్లో నటిస్తే చాలా గొప్పగా ఫీలయ్యేవాళ్లు. కానీ ఇప్పుడు హిందీ యాక్టర్లే సౌత్ సినిమాల్లో అవకాశాల కోసం క్యూ కడుతున్నారు. తెలుగు, తమిళ్ సినిమాల్లో నటించేందుకు బాలివుడ్ నటీ, నటులు తెగ ఇంట్రెస్ట్ చూపిస్తున్నారు. గతంలో సౌత్ యాక్టర్స్ హిందీ సినిమాల్లో నటించేందుకు ఎక్కువ ఇంట్రెస్ట్ చూపించేవాళ్లు. కానీ ఇప్పుడు బాలివుడ్ యాక్టర్సే సౌత్ సినిమాల్లో కనిపించేందుకు ఉవ్విళ్లూరుతున్నారు. ప్రస్తుతం తెలుగులో తెరకెక్కుతోన్న స్టార్ హీరోల సినిమాలన్నింటిలోనూ బాలివుడ్ స్టార్స్ తళుక్కుమంటున్నారు. రాజమౌళి డైరెక్షన్ లో తెరకెక్కుతోన్న RRR లో బాలివుడ్ బ్యూటీ ఆలియా భట్ హీరోయిన్ గా నటిస్తోంది. అంతేకాదు హీరో అజయ్ దేవగణ్ మరో ఇంపార్టెంట్ రోల్ లో నటిస్తున్నాడు.
త్రివిక్రమ్, అల్లు అర్జున్ కాంబినేషన్ లో పట్టాలెక్కనున్న అప్ కమింగ్ మూవీలో హిందీ సీనియర్ నటుడు నానా పటేకర్ నటించనున్నట్లు వార్తలొస్తున్నాయి. సైరాలో బిగ్ బీ అమితాబ్ మెగాస్టార్ కి గురువుగా నటిస్తున్నాడు. ఇక ప్రభాస్ నటిస్తోన్న సాహో సినిమాలో హీరోయిన్ శ్రద్దా కపూర్ తో పాటు నీల్ నితిన్ ముకేష్, జాకీ ష్రాఫ్, మందిరా బేడీ, ఆదిత్య శ్రీవాస్తవ్, ఇవిలిన్ శర్మ ఇలా అరడజను మంది హిందీ నటీ, నటులు నటిస్తున్నారు.
ఇక తమిళ్ సినిమాల విషయానికి వస్తే తమిళ్ లో కూడా హిందీ నటుల హడావిడి రోజు రోజుకి పెరుగుతోంది. ఎస్ జె సూర్య లీడ్ రోల్ లో నటిస్తోన్న ‘ఉయర్నద మణిదన్’ సినిమాలో అమితాబ్ బచ్చన్ ఓ ఇంపార్టెంట్ రోల్ లో నటిస్తున్నాడు. అంతేకాదు విజయ్, అట్లీ కాంబినేషన్ లో రాబోతున్న స్పోర్ట్స్ బ్యాక్ డ్రాప్ మూవీలో షారుక్ ఖాన్ గెస్ట్ రోల్ చేయనున్నట్లు ప్రచారం జరుగుతోంది. ఇలా బాలివుడ్ స్టార్ హీరోల దెగ్గరి నుంచి క్యారెక్టర్ ఆర్టిస్టుల దాకా సౌత్ సినిమాల్లో నటించేందుకు క్యూ కడుతున్నారు.
