CJP-Nadda Meeting: ముగిసిన సీజేపీ-నడ్డా కీలక భేటీ.. కాక్రోచ్ పార్టీ మూడు డిమాండ్స్ ఇవే
ఢిల్లీలోని కాన్స్టిట్యూషన్ క్లబ్లో జరిగిన ఈ కీలక సమావేశంలో కేంద్రమంత్రులు జేపీ నడ్డా, జితేంద్ర సింగ్లు(CJP-Nadda Meeting) సీజేపీ ప్రతినిధులతో ముఖాముఖి చర్చలు జరిపారు.
- Published By: V Santhosh Kumar , Updated On : July 24, 2026 / 3:30 PM IST
cjp and jp nadda meeting and cockroach party main three demands
- జంతర్మంతర్లో ఉధృతంగా ఆందోళనలు
- కేంద్రమంత్రులతో సీజేపీ నేతల భేటీ
- ప్రధాన డిమాండ్ల పరిపరిశీలన
CJP-Nadda Meeting: దేశరాజధాని ఢిల్లీలోని చారిత్రాత్మక జంతర్మంతర్ వేదికగా నీట్ పరీక్ష ప్రశ్నాపత్రాల లీకేజీకి వ్యతిరేకంగా దేశ వ్యాప్తంగా ఉన్న విద్యార్థులు, యువజన సంఘాలు చేపట్టిన ఆందోళనలు తీవ్ర ఉద్రిక్తతకు దారితీశాయి. విద్యార్థుల భవిష్యత్తుతో ఆడుకుంటున్న లీకేజీ వ్యవస్థకు వ్యతిరేకంగా పార్లమెంట్ ముట్టడికి యత్నించిన సమయంలో పోలీసులు జరిపిన లాఠీచార్జ్ ప్రతిఘటనకు దారితీయడంతో, అక్కడ పరిస్థితులు ఇంకా పూర్తిగా సద్దుమణగలేదు. ప్రశాంత వాతావరణాన్ని పునరుద్ధరించడం, విద్యార్థుల ఆవేదనను వినడం లక్ష్యంగా, ఆందోళనల్లో కీలక పాత్ర పోషిస్తున్న కాక్రోచ్ జనతా పార్టీ ప్రతినిధులతో కేంద్ర ప్రభుత్వం అత్యున్నత స్థాయి భేటీ నిర్వహించడం ఇప్పుడు రాజకీయంగా ఎంతో ప్రాధాన్యత సంతరించుకుంది.
Bullet Train India: బుల్లెట్ ట్రైన్ లో ఖతర్నాక్ టెక్నాలజీ.. జర్నీలో భూకంపం వస్తే..
కాన్స్టిట్యూషన్ క్లబ్లో ఉన్నత స్థాయి భేటీ – సీజేపీ మూడు డిమాండ్లు:
ఢిల్లీలోని కాన్స్టిట్యూషన్ క్లబ్లో జరిగిన ఈ కీలక సమావేశంలో కేంద్రమంత్రులు జేపీ నడ్డా, జితేంద్ర సింగ్లు(CJP-Nadda Meeting) సీజేపీ ప్రతినిధులతో ముఖాముఖి చర్చలు జరిపారు. నీట్ పేపర్ లీకేజీ వ్యవహారంతో పాటు దేశంలోని విద్యావ్యవస్థలో చేపట్టాల్సిన సమగ్ర మార్పులపై ఇరువర్గాల మధ్య సుదీర్ఘంగా చర్చ జరిగింది. ఈ భేటీలో సీజేపీ ప్రధానంగా మూడు కీలక డిమాండ్లను ప్రభుత్వం ముందుంచింది. నీట్ లీకేజీలకు నైతిక బాధ్యత వహిస్తూ కేంద్ర విద్యాశాఖ మంత్రి ధర్మేంద్ర ప్రధాన్ తక్షణమే రాజీనామా చేయాలని, పేపర్ లీక్ ఘటనలతో మనస్తాపానికి గురై ఆత్మహత్య చేసుకున్న విద్యార్థుల కుటుంబాలకు రూ.కోటి చొప్పున పరిహారం అందించాలని, ఆందోళనల్లో పాల్గొన్న విద్యార్థులపై ఎలాంటి ఎఫ్ఐఆర్లు నమోదు చేయకూడదని డిమాండ్ చేసింది.
ప్రభుత్వం స్పందన – చర్చల ముగింపు:
విద్యార్థుల ప్రయోజనాలు, వారి ప్రశాంతమైన భవిష్యత్తే తమకు ప్రధాన ప్రాధాన్యమని, శాంతియుత మార్గంలో చర్చల ద్వారా సమస్య పరిష్కారానికి సిద్ధంగా ఉన్నామని కేంద్రమంత్రి జేపీ నడ్డా స్పష్టం చేశారు. విద్యార్థుల ఆవేదనను సమగ్రంగా వినేందుకు ప్రభుత్వం సుముఖంగా ఉందనే సంకేతాలు ఇస్తూనే, ఈ అంశంపై పార్లమెంట్లోనూ చర్చించేందుకు సిద్ధమని వెల్లడించారు. ఆందోళనకారులపై కేసుల విత్డ్రా, బాధితులకు పరిహారం లాంటి ప్రాథమిక అంశాలపై సానుకూలత కనిపించినప్పటికీ, కేంద్ర విద్యాశాఖ మంత్రి రాజీనామా డిమాండ్పై సీజేపీ పట్టుబట్టడంతో తొలి విడత చర్చలు సంపూర్ణ ముగింపునకు రాలేదు. లీకేజీలపై చట్టబద్ధ విచారణ కమిటీ ఏర్పాటు మరియు భవిష్యత్తు పరీక్షల భద్రతపై కూడా ఇరువర్గాలు చర్చించాయి.
