చైనా, పాకిస్థాన్ వణకాల్సిందే.. మోస్ట్‌ డేంజరస్‌ రాకెట్ లాంచర్‌ను పరీక్షించనున్న భారత్
దీనికి శత్రు దేశాల కమాండ్ సెంటర్లు, బంకర్లు, సరఫరా కేంద్రాలను నాశనం చేసేంత శక్తి ఉంటుంది.
- Published By: 10TV Digital Team ,Published On : May 28, 2025 / 11:55 AM IST
భారత రక్షణ పరిశోధన, అభివృద్ధి సంస్థ (డీఆర్‌డీవో) అత్యాధునిక గైడెడ్ రాకెట్ వ్యవస్థ పినాక ఎంకే-3ను అభివృద్ధి చేసింది. ఈ అధునాతన రాకెట్ 120 కిలోమీటర్ల దూరంలో ఉన్న లక్ష్యాలను కచ్చితంగా ఛేదిస్తుంది. ఈ వ్యవస్థ భారత సైన్యానికి ఒక గేమ్ ఛేంజర్‌ అవుతుంది. దీన్ని భారత్ త్వరలోనే పరీక్షించనుంది.
చైనా, పాకిస్థాన్‌కు దీని ద్వారా చెక్‌ పెట్టొచ్చు. పుణెలోని డీఆర్‌డీవో ఆర్మమెంట్ రీసెర్చ్ అండ్ డెవలప్‌మెంట్ ఎస్టాబ్లిష్‌మెంట్, ఇతర పరిశోధన ప్రయోగశాలలతో పినాక ఎంకే-3ను అభివృద్ధి చేసింది. ఇది మల్టీ బ్యారెల్ రాకెట్ లాంచర్ సిస్టమ్. పినాక సిరీస్‌లో అత్యాధునిక వెర్షన్ ఇది.
గతంలో అభివద్ధి చేసిన ఎంకే 1.. 40 కిలోమీటర్ల పరిధిలో లక్ష్యాన్ని ఛేదిస్తుంది. ఎంకే-2 60-90 కిలోమీటర్ల పరిధిలోని లక్ష్యాలను, గైడెడ్ పినాక 75-90 కిలోమీటర్ల పరిధిలోని లక్ష్యాలను ఛేదిస్తాయి. ఇప్పుడు అభివృద్ధి చేసిన పినాక ఎంకే-3 సిస్టమ్ ఏకంగా 120 కిలోమీటర్ల దూరంలోని లక్ష్యాలపై దాడి చేస్తుంది. 250 కిలోల వార్‌హెడ్‌ను మోసుకెళ్లి దాడులు చేసే సత్తా దీనికి ఉంది.
శత్రు దేశాల కమాండ్ కేంద్రాలు, బంకర్లు, సరఫరా సెంటర్లను ఇది నాశనం చేస్తుంది. ఈ రాకెట్ వ్యాసం 300 మిల్లీమీటర్లుగా ఉంటుంది. పాత రాకెట్ వ్యాసం 214 మిల్లీమీటర్లు. ఈ కొత్త రాకెట్ సిస్టమ్‌లో డీఆర్‌డీవోకు చెందిన రీసెర్చ్ సెంటర్ ఇమారత్ అభివృద్ధి చేసిన హైటెక్ గైడెన్స్, నావిగేషన్, కంట్రోల్ కిట్‌ను వాడారు.
కొత్తగా అభివృద్ధి చేసిన పినాక ఎంకే-3ను ఇప్పటికే మనదేశంలో ఉన్న పినాక లాంచర్ల నుంచే ప్రయోగించే అవకాశం ఉంటుంది. పినాక ఎంకే-3 అదనపు ఖర్చులను సైతం తగ్గిస్తుంది. ప్రతి లాంచర్ 8 గైడెడ్ రాకెట్లను మోసుకెళ్లి దాడులు చేస్తుంది. 44 క్షణాల్లో టార్గెట్లను ఛేదిస్తుంది.
మరోవైపు చైనాపీహెచ్ఎల్-03 పరిధి 70–130 కిలోమీటర్లు మాత్రమే. అలాగే, పాకిస్థాన్ ఏ-100 రేంజ్ 120 కిలోమీటర్లు. మన పినాక ఎంకే-3 మల్టీ-బ్యారెల్ రాకెట్ లాంచర్ (MBRL) వ్యవస్థ. దీనికి శత్రు దేశాల కమాండ్ సెంటర్లు, బంకర్లు, సరఫరా కేంద్రాలను నాశనం చేసేంత శక్తి ఉంటుంది.
