Guntur Murder Case: ప్రియుడి కోసం కన్నతల్లినే.. దారుణంగా హత్య చేసిన కూతురు.. గుంటూరులో ఘోరం!
గుంటూరు(Guntur Murder Case) జిల్లాలో అత్యంత దారుణమైన ఘటన ఒకటి స్థానికంగా తీవ్ర కలకలం రేపింది.
- Published By: V Santhosh Kumar , Published On : September 12, 2026 / 02:14 PM IST
Daughter killed her own mother for her lover in Guntur district.
- ప్రియుడి కోసం తల్లి హత్య
- బంగారం డబ్బుల కోసం దారుణం
- రంగంలోకి దిగిన పొన్నూరు పోలీసులు
Guntur Murder Case: గుంటూరు జిల్లాలో అత్యంత దారుణమైన ఘటన ఒకటి స్థానికంగా తీవ్ర కలకలం రేపింది. కన్నపేగు బంధాన్ని, సభ్య సమాజం తలదించుకునేలా క్షణికావేశంలో ప్రియుడి మోజులో పడి కన్నతల్లిని ఓ కూతురు హత్య(Guntur Murder Case) చేసిన ఉదంతం పొన్నూరులో వెలుగుచూసింది. పొన్నూరు 8వ వార్డులో నివాసముంటున్న లక్ష్మి అనే మహిళ అనుమానాస్పద స్థితిలో దారుణ హత్యకు గురవడం ఆ ప్రాంతంలో భయాందోళనలు సృష్టించింది. మృతురాలికి ఒక కుమారుడు, కుమార్తె పుష్పలత ఉండగా, ఆరు నెలల క్రితమే రోడ్డు ప్రమాదంలో కుమారుడు మరణించాడని, ప్రస్తుతం కుమార్తెతోనే కుటుంబ పరిస్థితులు ముడిపడి ఉన్నాయని తెలుస్తోంది.
డబ్బు వివాదమే హత్యకు కారణమా?
ప్రియుడు రాజాతో తీవ్ర సన్నిహితంగా ఉంటున్న పుష్పలత, తల్లి లక్ష్మి బంగారం తాకట్టు పెట్టి తెచ్చిన డబ్బును ఇవ్వాలని ఒత్తిడి చేసినట్లు బంధువులు ఆరోపిస్తున్నారు. డబ్బు ఇచ్చేందుకు లక్ష్మి నిరాకరించడంతో, ఆగ్రహానికి గురైన పుష్పలత తన ప్రియుడితో కలిసి ఈ దారుణానికి ఒడిగట్టిందని సమాచారం. గతంలో రెండు పెళ్లిళ్లయి ఒంటరిగా ఉంటున్న పుష్పలత ప్రైవేట్ ఆస్పత్రిలో స్వీపర్గా పనిచేస్తూ, ఈ అరాచకానికి పాల్పడిందన్న వార్త స్థానికులను తీవ్రంగా దిగ్భ్రాంతికి గురిచేసింది.
పోలీసుల వేగవంతమైన దర్యాప్తు:
ఈ ఘోరంపై సమాచారం అందుకున్న వెంటనే పొన్నూరు అర్బన్ పోలీసులు సంఘటనా స్థలానికి చేరుకుని వివరాలు సేకరించారు. కేసు నమోదు చేసిన అధికారులు మృతదేహాన్ని పరిశీలించి, దర్యాప్తు వేగవంతం చేశారు. డబ్బుల గొడవే ఈ హత్యకు ప్రధాన కారణమా లేక వేరే ఏమైనా కోణాలు ఉన్నాయా అనే అంశాలపై నిందితులను అదుపులోకి తీసుకుని విచారిస్తున్నారు. పూర్తి వివరాలు త్వరలోనే వెల్లడిస్తామని పోలీసులు స్పష్టం చేశారు.
